E martia anel bari dukh ai baro nekazo. Pala godia e Biblia phenel ke e martia si iek dushmano (1 Korintiana 15:26). Ando sikaimos 27, tu sikilian ke o Jehova si te peravel ka gado dushmano. Numa so si te avel le manushentsa kai gata mule? Ande kako sikaimos si te sikios mishto aver shukar prama kai shinavel o Jehova: vo si te zhuvindil millonuria manushen te avel len iek lasho traio pe sa e vriama. Pale si te train! Chachimasa shai avel kako? Ai si te zhuvindin ando cheri, vai pe Phuv?

1. So kamel te kerel o Jehova pala amare zhene kai mule?

O Jehova kamel ilesa te del len pale o traio godolen manushen kai mule. O Job, iek mursh kai sas les baro pakiamos, zhanelas chachimasa ke o Del nas te bistrel lestar kana merela ai avela “ande Grapa”. Phendias le Devleske: “Tu si te akhares man ai me si te dau tu suato” (chito Job 14:13-15).

2. Sar zhanas ke le mule shai zhuvindin?

Kana o Jesus sas pe Phuv, o Del dias les e zor te zhuvindil le manushen. Pala godia o Jesus dias pale o traio ka iek shovorhi 12 borshengi ai ka o shau katar iek phivli (Marko 5:41, 42; Lucas 7:12-15, NWT). Mai angle o Lazaro lesko amigo mulo. Ai makar sas angropome de shtar gies, o Jesus zhuvindisardias les. Polme te rhugilpe ka o Del, tsipisardias: “Lazaro, ankli avri!”. Ai o mursh kai sas mulo anklisto, ai akana trailas! (Iovano 11:43, 44). Shai des tu gogi ke veselime sas e familia ai le amiguria katar o Lazaro?

3. Si te train pale le manush kai kames ai jasardian ande martia?

E Biblia shinavel ke si te avel e vriama kai “zhuvindina le manush” (Le Apostolengo 24:15). Le manush kai zhuvindisardias o Jesus chi geletar ando cheri (Iovano 3:13). Von ambolde ando traio katse pe Phuv ai pala godo sas defial veselime. Gadia sar sas atunchi, o Jesus si te zhuvindil ande tsirha vriama millonuria manush te avel len iek shukar traio katse pe Phuv kana avela iek paraiso. Vo phendias ke “sa godola kai si andel greposhevuria” si te zhuvindin. Sa godola kai mule ai si ando gindo le Devlesko si te avel len pale o traio. Vi godola manush kai mule de dumut ai khonik chi mai seren lendar (Juan 5:28, 29, NWT).

 TE MAI SIKIOS

4. O Jesus sikadias ke shai zhuvindin le mule

Dikhta so mai kerdias o Jesus pala pesko amigo o Lazaro. Chiton Juan 11:14 ai 38-44 [NWT], ai den duma pa:

• Sar zhanas chachimasa ke o Lazaro mulo sas? (Dikhen o verseto 39).

• Te gelosas o Lazaro ando cheri le Devlesa, sas te anel les o Jesus zorasa pale pe Phuv?

Dikhen o VIDEO.

5. But manush si te train pale!

Chiton Salmo 37:29 ai den duma pa:

• Kai si te train le millonuria manush kai zhuvindina?

O Jesus si te zhuvindil bute manushen ai na numa godolen kai luvudinas ka o Jehova. Chiton Hechos 24:15 [NWT], ai den duma pa:

• Kana zhuvindina le manush, kas kames te dikhes?

• Sar dias pacha ai zor kal dada katar e Phelicity te zhanen ke si te zhuvindin le manush?

 SO DIKHLIAM

E Biblia shinavel ke millonuria manush si te zhuvindin. O Jehova kamel chachimasa te train pale ai dias ka o Jesus e zor te zhuvindil len.

So sas te mothos?

• Sar zhanas ke o Jehova ai o Jesus kamen ilesa te den o traio pale le manushen kai mule?

• Kai si te train le millonuria manush kai zhuvindina: ando cheri, vai pe Phuv? Sostar gindis gadia?

• Pala soste zhanes chachimasa ke kire niamuria ai amiguria kai jasardian shai train pale?