ATE woy maatekki miila buutote dhibbi amadinoha ikkiro, tini mageeshshi geeshsha yaachishshannoro huwata dandaatto. Dhibbano agurranna yaaddonna dadillu amadaˈnera dandaanno. Lawishshaho, akimete minira hodha, xagga hidhinanni woxe woy xagicho hooga woy xagichu umisi abbanno qarri yaaddonna shetto ledara dandaanno. Buutote dhibbinni kainohunni dagganno yaaddo wolqankera aleenni ikkitara dandiitanno.

Ikkina kaaˈlo afiˈra dandiineemmohu hiikkiinniiti? Batinyu manni Magano huucciˈransanna sheshifachishshannota Qullaawu Maxaafi hedo nabbawansa lowo geeshsha jawaachishshinonsa.  Maatekkinna jaallakki baxillinna insa uyitannohe kaaˈlono jawaante ikkitahera dandiitanno.

Rooberti yinannihu 58 diro ikkannosi manchi togo yee amaalino: “Magano addaxxite dhibbikki ledo sharrami; isi dhibbakki dandiite heeˈratto gede kaaˈlannohe. Yihowa huucciˈri. Giddokkita isira hasaaphi. Qullaawa ayyaana aannohe gede huucciˈri. Sheshifatte maatekki jawaachisha dandaatto gedenna wodanaaˈmatto gede kaaˈlahera huucciˈri.

“Maatete kaaˈlono loworeeti. Barru barrunku mittu woy lamu manchi silke bilbile woyyimma xaˈmannoe. Addi addi bayicho heedhanno jaallaˈyano jawaachishshannoe. Insa jawaachishshannoe woyite beya afiˈreemmo; tini hexxo mudheemmokki gede kaaˈlitinoe.”

Dhiwamino jaalakki laˈˈattora haˈratto woyite Linda yitinori kaaˈlahera dandaanno: “Dhiwamino manchi dandaamisi deerrinni fayyu manchi gede ikke heeˈra hasiˈranno daafira, woˈmante yannara dhibbisi daafira hasaawa baxa hoogara dandaanno. Hakko daafira, wole yannarano hasaawattoha rosamino coye hasaawate woˈnaali.”

Buutote dhibbi waadanni noonkeha ikkiro nafa, heeshshonke waaga afidhinota huwante qarranke cincine heeˈra dandiineemmo; korkaatuno Maganu aannonke jawaantenna Qullaawu Maxaafinni afiˈneemmo shesho, hattono baxillaano maatenke miillanna jaallanke kaaˈlitannonke kaaˈlo wolqa ikkitannonke.