ATINO heeshsho giwisseennahe reyo halchite egennootto? Hatto ikkiro, Adiriyaana qarri leellahera dandaanno. Akimootu isera bayicho assidhino yaaddo nooseta kultinose.

Jaappaanete gobbahu Kaaoruu yinanni manchi, geedhinorenna dhiwamino annasinna amasi towaaxxa hasiissinosi. Isi togo yiino: “Hatte yannara loosu basera iillannoe fonqoli wolqaˈyara aleenni ikkinoe. Gale hosanni sagale giwisie; qoleno goxichu giwie. Hakko daafira, ‘Reyommoro fooliishshiˈreemmo’ yee heda hanafummo.”

Ojeboodi yinannihu Nayijeeriyu gobba manchi togo yiino: “Woˈmanka woyite dadille wiˈleemmo; konni daafira aneneeto sheemmo gara hasiˈra hanafummo.” Ojeboodi, Kaaoruuno ikko Adiriyaana insaneeto dishiino; tini hagiirsiissannote. Ikkollana diru kiiro 800,000 meddi yaanno manni insaneeto shaanno.

Insaneeto shaanno manni giddo rooriidihu labballoho; insa giddo batinyu wolootu kaaˈlitannonsa gede xaˈmiˈra saaltanno. Yesuusi dhiwantinorira xagisannohu hasiisannota coyiˈrino. (Luqaasi 5:31) Konni daafira, atino lowo geeshsha hexxo mudhite ateneeto shaate heddanni noottoha ikkiro, ballo woloota kaaˈlo xaˈmiˈra saalfattooti. Quwa saˈino yaaddo waaddannohu batinyu manni, xagisiˈre beedho afiˈra dandiino. Ojeboodi, Kaaoruunna Adiriyaanano akime uyitinonsa kaaˈlo adhite beya afidhino.

Akimootu quwa saˈino yaaddo noonsare xaggatenni woy giddonsata hasaaphitanno gede assite (toki teraappii yinanni ogimma) woy lamenta ogimma mitteenni horoonsidhe xagissara dandiitanno. Quwa saˈino yaaddo noonsare maatensanna jaallansa cincite shaqqillunni kaaˈlanna qarransa huwata hasiissannonsa. Baalunkunni roorino jaali Magano Yihowaati; isi Qaalisi Qullaawu Maxaafi widoonni togoo manna irkisanno.

Quwa saˈino yaaddo noonsa manni seeda yanna xagicho adhanna heeshshonsa giddo mito coye biddi assiˈra hasiissannonsaha ikkara dandaanno. Ateno quwa saˈino yaaddo waaddannoheha ikkiro, Ojeboodi gede albillitte daggannota hagiirsiissanno yanna hexxotenni agadha dandaatto. Isi togo yiino: “Isayaasi 33:24te nooti uullate aana ‘Dhiwamoommo yaannoha dianfanni’ yitanno masaalo woˈmitanno yanna quqquxame agadheemmo.” Atino Maganu “dadillu” heeˈrannokkita ‘haaro baatto’ abbeemmo yee uyino hexxonni shesho afiˈra dandaatto. (Yohaannisi Ajuuja 21:1, 4) Tini hexxo surrete xissonna dadilli baalu heeˈrannokkita kultanno. Xa waaddanni noohe xisso hegerera baˈanno. Hakkawoyite tenne xissokki ‘hawatto’ hattono ‘horonta diqaagatto.’—Isayaasi 65:17.