TË RINJTË PYESIN
Si mund të më ndihmojë Bibla?—Pjesa 1: Eksploro Biblën tënde
«Jam përpjekur ta lexoj Biblën, por më zë frika se është libër goxha i madh.»—Briana 15 vjeçe.
A ndihesh edhe ti kështu? Atëherë, ky artikull mund të të ndihmojë.
Pse ta lexosh Biblën?
A të duket e mërzitshme ideja që të lexosh Biblën? Nëse po, kjo është e kuptueshme. Mbase Bibla të duket thjesht si një libër me mbi një mijë faqe, me shkronja të vogla e pa figura. Konkurrent jo shumë i fortë i televizorit dhe videove.
Por shihe nga ky këndvështrim: po të gjeje një arkë të vjetër thesari të stërmadhe, a nuk do të bëheshe kurioz se çfarë ka brenda?
Bibla është tamam si një arkë thesari, plot me xhevahire mençurie që do të të ndihmojnë:
të marrësh vendime të mira
të shkosh mirë me prindërit
të gjesh miqtë më të mirë
të përballosh stresin
Si ka mundësi që një libër i lashtë të jetë kaq praktik për kohën tonë? Sepse «i gjithë Shkrimi është i frymëzuar nga Perëndia». (2 Timoteut 3:16) Kjo do të thotë se këshillat e Biblës vijnë nga Burimi më i mirë që ekziston.
Si ta lexoj Biblën?
Një mënyrë është ta lexosh nga fillimi deri në fund. Kështu do të kuptosh tablonë e përgjithshme të mesazhit të saj. Ka shumë mënyra për të lexuar të gjithë Biblën. Shqyrto dy shembuj:
Mund t’i lexosh 66 librat e saj sipas radhës, pra nga Zanafilla te Zbulesa.
Mund ta lexosh në mënyrë kronologjike, domethënë sipas radhës që kanë ndodhur ngjarjet.
Sugjerim: shtojca 9 te Përkthimi Bota e Re (botimi i shtypur) tregon në radhë kronologjike ngjarjet kryesore nga jeta e Jezuit në tokë.
Një mënyrë e dytë për të lexuar Biblën është të zgjedhësh një ngjarje që lidhet me ndonjë vështirësi që po kalon. Për shembull:
A dëshiron të gjesh miq të besueshëm? Atëherë, lexo historinë e Jonatanit dhe të Davidit. (1 Samuelit, kapitujt 18-20) Pastaj, që të nxjerrësh mësime praktike nga ky tregim, përdor fletën e punës «Si të gjesh miq besnikë?»
A do që të jesh më i fortë përballë tundimit? Lexo se si i rezistoi tundimit Jozefi. (Zanafilla, kapitulli 39) Pastaj, që të nxjerrësh mësime praktike nga ky tregim, përdor fletët e punës «Si t’i rezistosh tundimit . . . Jozefi—Pjesa 1» dhe «E akuzuan padrejtësisht . . . Jozefi—Pjesa 2».
A dëshiron të mësosh si mund të të ndihmojë lutja? Lexo çfarë i ndodhi Nehemisë. (Nehemia, kapitulli 2) Pastaj, që të nxjerrësh mësime praktike nga ky tregim, përdor fletën e punës «Perëndia iu përgjigj lutjes së tij».
Sugjerim: lexoje Biblën në një ambient të qetë që të kesh mundësi të përqendrohesh.
Një mënyrë e tretë për të lexuar Biblën është të zgjedhësh një tregim ose psalm, ta lexosh e pastaj të mendosh si zbatohet në rastin tënd. Pas leximit, pyet veten:
Pse e përfshiu Jehovai këtë në Bibël?
Çfarë tregon për personalitetin e Jehovait apo për mënyrën si vepron ai?
Si mund ta zbatoj këtë informacion në jetën time?
Sugjerim: vendos një synim. Shkruaj datën kur dëshiron të nisësh programin e leximit të Biblës.