Lo mbuzo unokubuzwa ngeendlela ezininzi, ezifana nezithi, Kutheni silapha nje? okanye Ngaba ubomi bethu bunenjongo? IBhayibhile ithi injongo yobomi bethu kukuba ngabahlobo bakaThixo. Khawuve ezi nyaniso zityhilwa yiBhayibhile.

•   UThixo nguMdali wethu. IBhayibhile ithi: “Nguye [uThixo] owasenzayo, asisithi.”​—INdumiso 100:3; ISityhilelo 4:11.

•   UThixo unenjongo ngayo yonke indalo yakhe, kuquka nathi.​—Isaya 45:18.

•   UThixo wasenza ‘sanentswelo yokomoya’ kunye nomnqweno wokufumana injongo yobomi. (Mateyu 5:3) Ufuna siwanelise loo mnqweno.​—INdumiso 145:16.

•   Le ntswelo yokomoya, siyanelisa xa sisakha ubuhlobo noThixo. Nangona abanye besenokuthi ayinakwenzeka into yokuba sibe ngabahlobo bakaThixo, iBhayibhile isinika la mazwi akhuthazayo: “Sondelani kuThixo, naye uya kusondela kuni.”​—Yakobi 4:8; 2:23.

•   Ukuze sibe ngabahlobo bakaThixo, kufuneka siphile ngokwenjongo awasidalela yona. IBhayibhile iyichaza le njongo kwiNtshumayeli 12:13: “Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.”

•   Kwixesha elizayo, siza kukwazi ukuzalisekisa laa njongo yokuqala kaThixo xa eza kube esuse konke ukubandezeleka, aze aphe bonke abahlobo bakhe ubomi obungunaphakade.​—INdumiso 37:10, 11.