Ani Esa akɛ Atsɔɔ Gbekɛbii Nyɔŋmɔ He Nii?

“Nyɔŋmɔjamɔ ni wɔyɔɔ lɛ haaa wɔsumɔ wɔhe, shi moŋ ehaa wɔnyɛ̃ɔ wɔhe.”—JONATHAN SWIFT, ŊLESHI NIŊMALƆ.

SWIFT wie sane nɛɛ yɛ afi 1700 afii lɛ amli tɔ̃ɔ, shi ŋmɛnɛ lɛ, mɛi pii kɛ lɛ kpãa gbee. Anɔkwa, mɛi komɛi heɔ amɛyeɔ akɛ fɔlɔi bɛ hegbɛ akɛ amɛtsɔɔ amɛbii Nyɔŋmɔ he nii. Amɛsusuɔ akɛ nɔ ko ŋmɛɔ gbekɛbii ní amɛfɔlɔi kɛ Nyɔŋmɔjamɔ tsɔseɔ amɛ lɛ.

Te osusuɔ tɛŋŋ? Te saji ni nyiɛ sɛɛ nɛɛ ateŋ nɔ ni nilee yɔɔ mli lɛ?

● Esaaa akɛ aŋmɛɔ fɔlɔi agbɛ ni amɛtsɔɔ amɛbii Nyɔŋmɔ he nii.

● Esa akɛ fɔlɔi amɛ ni amɛbii ahiɛ asara dani amɛkɛ amɛ asusu Nyɔŋmɔjamɔ saji ahe.

● Esa akɛ fɔlɔi atsɔɔ amɛbii nibii ni amɛheɔ amɛyeɔ yɛ Nyɔŋmɔ he lɛ kɛjɛ amɛgbekɛbiiashi. Shi beni gbekɛbii lɛ daraa lɛ, esa akɛ fɔlɔi lɛ awo amɛ hewalɛ ni amɛ diɛŋtsɛ amɛkpɛ yiŋ yɛ saji nɛɛ ahe.

● Esa akɛ gbekɛbii amɔ amɛfɔlɔi ahemɔkɛyeli mli nakai nɔŋŋ ni amɛkapɛi nibii amli.

Ani Nyɔŋmɔjamɔ Yeɔ Gbekɛbii Awui?

Fɔlɔ ni yɔɔ suɔmɔ ko bɛ ni baasumɔ ni eye ebi awui. Shi ani mɛi ni wieɔ akɛ esaaa akɛ atsɔɔ gbekɛbii Nyɔŋmɔ he nii lɛ yɛ nibii kpakpai ahewɔ ni amɛwieɔ nakai lɛ? Niiamlitaolɔi kɛ afii nyɔŋmai abɔ epɛi bɔ ni fɔlɔi ahemɔkɛyeli náa amɛbii anɔ hewalɛ lɛ mli jogbaŋŋ. Mɛni amɛyɔse?

Niiamlitaolɔi eyɔse akɛ Nyɔŋmɔjamɔ fiteee gbekɛbii, shi moŋ eyeɔ ebuaa amɛ yɛ amɛdaramɔ mli jogbaŋŋ. Yɛ afi 2008 lɛ, wolo ni ji Social Science Research * lɛ mli amaniɛbɔɔ ko wie akɛ: “Ana akɛ Nyɔŋmɔjamɔ wajeɔ wekukpaa ni kã bii kɛ amɛfɔlɔi ateŋ lɛ waa.” Etsa nɔ akɛ: “Nyɔŋmɔjamɔ kɛ shwelɛ ni mɔ yɔɔ akɛ etsu emumɔŋ hiamɔ nii ahe nii lɛ ahe baa sɛɛnamɔ waa yɛ gbekɛbii pii ashihilɛ mli, ni amɛhaa wekukpaa kpakpa hiɔ weku mli bii ateŋ.” Kadimɔ akɛ sane nɛɛ kɛ nɔ ni Yesu Kristo wie lɛ kpãa gbee. Ekɛɛ akɛ: “Mɛi ni hiɛ yɔɔ amɛmumɔŋ hiamɔ nii anɔ lɛ yɛ miishɛɛ.”—Mateo 5:3, NW.

Mɛni hu abaanyɛ akɛɛ yɛ susumɔ ni ahiɛ akɛ gbekɛbii adara dani atsɔɔ amɛ Nyɔŋmɔ kɛ Nyɔŋmɔjamɔ he nii lɛ he? Nakai susumɔ lɛ tswaa anɔkwa sane nɛɛ efɔ̃ɔ: Gbekɛ jwɛŋmɔ tamɔ goga ni nu bɛ mli. Fɔlɔi yɛ nibii enyɔ ni amɛbaanyɛ amɛfee; amɛ diɛŋtsɛ amɛkɛ jeŋba he mlai kɛ hemɔkɛyelii ni amɛsusuɔ akɛ ehi lɛ awo “goga” lɛ mli yɛ shĩa, loo amɛŋmɛ gbɛ ni nibii babaoo ni gbekɛbii lɛ nuɔ yɛ mɛi anaa lɛ ayi amɛtsui kɛ amɛjwɛŋmɔŋ.

Mɛni Baaye Abua?

Yinɔsane tsɔɔ akɛ Nyɔŋmɔjamɔ baanyɛ ekɛ nyɛɛ kɛ hetsɛ̃ aba mɛi ateŋ. No hewɔ lɛ, te fɔlɔi aaafee tɛŋŋ amɛtsĩ shihilɛ ni Jonathan Swift wie he lɛ naa? Te amɛaafee tɛŋŋ amɛtsɔɔ amɛbii lɛ hemɔkɛyelii ni baaha amɛsumɔ mɛi?

Sanebimɔi etɛ nɛɛ ahetoo baaye abua: (1) Mɛni esa akɛ gbekɛbii lɛ akase? (2) Namɔ esa akɛ etsɔɔ amɛ? (3) Mɛɛ nitsɔɔmɔ gbɛi hi fe fɛɛ?

[Shishigbɛ niŋmaa]