Peteĩ kuimbaʼe Jehová oguerohorýva

MBAʼÉPA ou ne akãme oñeñeʼẽramo ndéve David rehe? Ojuka hague Goliátpe, pe filistéo tuichaitéva; oho hague okañy pe desiértope Saúl opersegírõ guare chupe; oñeno hague Bat-seba ndive ha umi mbaʼe vai ohupytyvaʼekue upévare; térãpa ohai hague umi ñeʼẽpoty oĩva lívro vívliko de Sálmospe.

David ojapovaʼekue hetaiterei mbaʼe oservívo Ñandejárape, avei ohasa heta mbaʼe iporã ha ivaíva hekovépe. Proféta Samuel heʼivaʼekue voi hese haʼeha ‘peteĩ kuimbaʼe Jehová oguerohorýva’ (1 Samuel 13:14). Jahechamína koʼág̃a mbaʼépepa ñanepytyvõta jaikuaávo upe heʼivaʼekue hese.

Upéva oñekumplivaʼekue David rehe imitãrõ guare. Katuete ningo ñande avei jaipotaitereíta Jehová ñandeguerohory, ajépa? Upearã iporãta ñahesaʼỹijomi mbaʼépa David ohasavaʼekue yma imitãrõ guare.

Ifamília ha itraváho

David túva ningo Jesé, Rut ha Boaz niéto. Katuete Jesé ojeroviavaʼekue Jehováre ipyʼaite guive, upévare omboʼe Moisés Léi Davídpe, umi siete itaʼýra ha mokõi itajýrape imitãite guive. Avei, peteĩ sálmope David heʼi isy haʼeha peteĩ kuña oservíva Jehovápe (Salmo 86:16). Ñandejára Ñeʼẽ ningo nomombeʼúi mbaʼéichapa héra isy, péro heta oĩ heʼíva oipytyvõ hague avei chupe  omombarete hag̃ua ijerovia. Peteĩ karai iñarandúva heʼi voi: “Oiméne isy omombeʼu ypy rakaʼe chupe umi mbaʼe porãita Ñandejára ojapovaʼekue yma hembiguaikuéra rehehápe”. Umíva apytépe omombeʼunerakaʼe chupe Rut ha Boaz rembiasakue.

La Biblia oñepyrũvo oñeʼẽ David rehe, heʼi haʼeha peteĩ mitãrusu oñangarekóva itúva ovechakuérare. Ha ojapo hag̃ua upéva oiméne ohasarakaʼe heta ára ha pyhare pe ñúre. Ñapensamína mbaʼeichaitépa ipukunerakaʼe chupe umi ára ha oñeñandu haʼeñomi upérupi.

David róga ningo opytavaʼekue Belénpe, peteĩ tavaʼi oĩva Judápe, umi yvy ijyvatevehápe. Umi kokue itaty oĩvape ijerére oñeñotỹ heta heta hiʼupyrã, umi yvy huʼũveha ha ipevehápe katu ojeguereko uérta, olívo ha parralty; ha oiméne umi yvy ijyvatevehárupi oĩ heta pastoty. Jahasapa rire koʼã lugár oĩ pe Judá desiérto.

David rembiapo ningo ipeligrosovaʼekue avei sapyʼánte. Umírupi haʼe oñorairõ leõ ha ósondi pono ogueraha chugui ijovechakuéra. * Ko mitãrusu ipyʼaguasuetéva omuña umi animál pochýpe, ojuka ha oipeʼa chuguikuéra ijovecha (1 Samuel 17:34-36). Oiméne upe tiémpope oaprenderakaʼe oiporukuaa hag̃ua hónda, ha ipulsoitereígui oñembojoja voi chupe umi kuimbaʼe katupyry Benjaminguáre, umíva ningo “ndojavýiva peteĩ akãrague hóndape ohaʼãramo” (Jueces 20:14-16; 1 Samuel 17:49).

Oiporu porã itiémpo

Heta vése umi oñangarekóva ovechakuérare oĩ haʼeño ha ndorekoguasúi ojapovaʼerã, péro umi mbaʼe nomongaiguéi Davídpe. Haʼe oiporu upe tiémpo ikatu hag̃uáicha ojepyʼamongeta, ha oiméne ohairakaʼe sálmope umi mbaʼe opensavaʼekue  imitãrusúpe. Upérõ ojepyʼamongetáneraʼe yvypóra rekovére, ha umi mbaʼe ijojahaʼỹva Jehová ojapovaʼekuére, pór ehémplo kuarahy, jasy ha mbyjakuérare. Belén jerére oiméne ohecharakaʼe umi yvy porã, mymba saʼi, gueikuéra, umi guyra ha mymba saite oikóva pe ñúre (Salmo 8:3-9; 19:1-6).

David oñangareko rupi ovechakuérare ohechakuaa mbaʼeichaitépa Jehová oñangareko mborayhúpe hembiguaikuérare. Upévare opurahéi kóicha: ‘Ñandejára Jehová oñangareko cherehe, mbaʼeve naikotevẽmoʼãi. Ñu rovyũ asýpe chemombytuʼu, y renda sakãme chemog̃uahẽ. Ahasáramo jepe kaʼaguy ypytũ rupi, ndakyhyjeichéne, nde che Jára reimégui chendive; nde yvyra puku chembopyʼaguapy’ (Salmo 23:1, 2, 4).

Péro ikatu oime ñañeporandu, mbaʼépepa chepytyvõta koʼã mbaʼe? Heta mbaʼépe. David ningo Jehová amigoitevaʼekue ha Haʼe oguerohory chupe. Mbaʼérepa? Ojepyʼamongeta rupi ipyʼaite guive Jehová rembiapokuére ha umi mbaʼe ojapóvare oĩ porã hag̃ua Ijárandi. Ha ñande, ñañehaʼãpa avei jajapo upéicha?

Ñahesaʼỹijo rire peteĩ mbaʼe Jehová ojapovaʼekue, ñanemomýipa ñamombaʼeguasu hag̃ua Chupe? Ajépa jahayhuetereive Jehovápe jahechávo mbaʼéichapa otrata mborayhúpe yvyporakuérape. Upévare akóintekena ñañemboʼe ha jajepyʼamongeta Ñandejára Ñeʼẽ heʼívare ha avei opa hembiapokuére. Koʼã mbaʼe jajapóramo ñanepytyvõta jaikuaa porãve hag̃ua Jehovápe ha jahayhuve hag̃ua chupe. Ha upéva ningo enterovéva voi ikatu jajapo, ñanemitã térã ñande edáramo jepe. Upéicha ojapovaʼekue David ha imitãite guive oñemoag̃ui Jehováre. Mbaʼéichapa jaikuaa upéva?

Ojeporavo Davídpe rreirã

Rréi Saúl ohechaukárõ guare noisãmbyhyporãveimaha Ñandejára puévlo Israélpe, Jehová heʼi proféta Samuélpe: ‘Arakaʼe pevépa rejaheʼóta Saúl rehe. Che voi amboykéma chupe anive hag̃ua oiko Israel ruvicháramo. Emyenyhẽ peteĩ mymba ratĩngue aséitegui, ha eju, che romondóta Jesé rendápe oikóva táva Belénpe, itaʼyrakuéra apytégui aiporavóma peteĩ oiko hag̃ua rréiramo Israélpe’ (1 Samuel 16:1, ÑÑB).

Pe proféta og̃uahẽvo Belénpe heʼi Jesépe ombyatypa hag̃ua itaʼyrakuérape. Mavaitévapepa oiporavotahína rreirã? Ohechávo Eliábpe, Jesé raʼy ypykue ipínta porãva, proféta Samuel heʼi: “Kóva haʼemantevaʼerã”. Péro Jehová heʼi chupe: ‘Ani remaʼẽ hova térã ijyvatekue rehe. Che ndaipotái chupe.  Peẽ pemaʼẽ upe kuimbaʼe rováre, che katu amaʼẽ ipyʼapy rehe’. Upéicha avei Jehová omboyke Abinadab, Samah ha umi cuatro iñermánope. ‘Ipahápe Samuel oporandu Jesépe: “Ndereguerekovéipa ótro nde raʼy?”. Jesé heʼi: “Oĩ gueteri pe ipahague, oñangarekovahína ovechakuérare”.’ (1 Samuel 16:7, 11.)

Upéicha Jesé haʼete heʼivahína: “Aníchenengo Davídpe rehekareína”. David imitãve ha naiñimportanteguasúi rupi oñemondo chupe oñangareko hag̃ua ovechakuérare. Péro Jehová ningo ohecha oĩva ñandepyʼapýpe, ha katuete ohecháneraʼe peteĩ mbaʼe iporãitereíva ko mitãrusu rehe; upévare oiporavo chupe. Jesé ohenoikárõ guare Davídpe, Jehová heʼi proféta Samuélpe: ‘Epuʼã emoĩ hese aséite, péva che aiporavóma. Ha Samuel ojagarra pe aséite ha omoĩ hese iñermanokuéra renondépe; ha upe ára guive Jehová espíritu ou David ári’ (1 Samuel 16:12, 13, ÑÑB).

Ndajaikuaái ningo mboy áñopa orekorakaʼe David upérõ, péro la Biblia omombeʼu mbohapy iñermáno itujavéva, Eliab, Abinadab ha Samah, oike hague Saúl ehérsitope. Ha oiméne haʼe ha umi ótro cuatro iñermáno imitãiterei gueteri oho hag̃ua hendivekuéra. Upe tiémpope kuimbaʼekuéra okumplivaʼerã veinte áño oike hag̃ua Israel ehérsitope, ha haʼekuéra oiméne ndohupytýi gueteri upéva (Números 1:3; 1 Samuel 17:13). Upéicha rupi jaʼekuaa David imitãiti hague Jehová oiporavórõ guare chupe, ha oiméne upe tiémpopema voi ijerovia mbarete rakaʼe. David ohechauka Jehová amigoiteha ha oñemoag̃uive hese ojepyʼamongetávo umi mbaʼe oikuaámavare chugui.

Koʼág̃a rupi enterovéva ñamokyreʼỹvaʼerã avei mitãrusukuérape ojapo hag̃ua upéicha. Tuvakuéra, pemokyreʼỹpa pene familiakuérape ojepyʼamongeta ha omombaʼe hag̃ua Jehová rembiapokue ha ohesaʼỹijo hag̃ua mbaʼépa heʼi la Biblia Hese? (Deuteronomio 6:4-9.) Ha peẽ mitãrusukuéra, peñehaʼãpa pendejehegui peñemoag̃uive Jehováre? Oĩ heta puvlikasión oñeguenohẽva la Bíbliagui ikatúva penepytyvõ pejapo hag̃ua upéva, pór ehémplo umi rrevísta Ñemañaha, La Atalaya ha ¡Despertad! *

Ombopukuaa árpa

Umi sálmo David ohaivaʼekue oikuaauka ñandéve hembiasakue, upéicha avei imúsika ohechaukanerakaʼe umi mbaʼe ohasavaʼekue oñangareko tiémpope ovechakuérare. Ha ndajaikuaáiramo jepe mbaʼeichagua músikapa omoĩrakaʼe David umi sálmope, ojepurahéiva oñemombaʼeguasu hag̃ua Ñandejárape, jaikuaa haʼe peteĩ músiko katupyry hague. Ha ombopukuaaiterei rupi pe árpa oñehenoika chupe ombopu hag̃ua rréi Saúlpe g̃uarã (1 Samuel 16:18-23). *

Moõ ha arakaʼépa David oñembokatupyryvaʼekue péicha? Oiméne oñangareko aja umi ovechakuérare ñúme. Haʼe opuraheinerakaʼe ipyʼaite guive Jehovápe yma imitãme. Avei omombaʼe ha ojerovia haguére Ñandejárare, Haʼe oiporavo ha ojokuái chupe.

Ko artíkulope oñeñeʼẽ David imitãrõ guare rehe. Péro umi mbaʼe ohasavaʼekue imitãme Belén ñúre ojehecha hekove pukukuére ha ohaivaʼekuére ko sálmope: ‘Umi mbaʼe yma guare ou che akãme, ajepyʼamongeta umi ne rembiapokuére ha amombaʼeterei’ (Salmo 143:5). Kóva, ha ambue sálmo porãite David ohaivaʼekue, oipytyvõta opavave oipotávape Jehová oguerohory chupe.

[Nóta]