HEADAVA TAUDIA
2: Ḡaukara Hebou
ANINA BE DAHAKA?
Headava ta lalonai tau bona hahine e ḡaukara heboumu (teamwork) neganai, idia na vaitani pilot ta bona copilot heḡereḡeredia, idia na pleini tamona ai e gui bona e uramu baela gabuna na tamona. Ena be hekwakwanai bae vara, to tau o hahine na baine gwa, “ita,” dia “lau.”
BAIBUL ENA SISIBA: “Idia na dia rarua, anidia vada tamona.”—Mataio 19:6.
“Headava lalonai ta sibona baine hekwarahi na dia namo. Namona na tau bona hahine bae ḡaukara hebou edia headava baine heau namonamo totona.”—Christopher.
DAHAKA DAINAI MAI ANINA BADA?
Headava taudia basie ḡaukara heboumu neganai, idia ese hekwakwanai ta na basie hamaoromaoroa heboumu to be heaimu. Bona hekwakwanai maraḡidia na be bada be laomu.
“Headava taudia bae ḡaukara hebou na mai anina bada. Bema lau bona adavagu basiama ḡaukara hebou, anina na aina dia headava taudia to aina roommate heḡereḡeredia—taunimanima rarua e noho hebou kavamu to decision badadia ikaradia ai basie lalotamonamu na heto.”—Alexandra.
DAHAKA BA KARAIA DIBA?
SIBOMU BA HENANADAI
-
Lau ese ḡaukara ai na abimu pei o moni “ibounai be lau sibogu egu,” a?
-
Lau be adavagu na rakataniamu bena sibogu gabu ta na laomu holiday totona, a?
-
Lau ese adavagu varavarana be na hadaudaudiamu, ena be adavagu ese varavarana na e lalokau henidia badamu, a?
ADAVAMU IDA BA HEREVALAI ḠAUDIA
-
Eda headava lalonai, ededia ḡau haida ai be ta ḡaukara hebou namonamomu?
-
Ededia ḡau ma haida ai eda ḡaukara hebou karana baita hanamoa na namo?
-
Dahaka baita kara diba, eda ḡaukara hebou karana baita hanamoa?
HEDURU HEREVADIA
-
Mani a laloa umui raruosi na tennis gadarana ta o karaiamu, oi kahanai adavamu kahanai. O laloamu dahaka ba kara diba, unu amo umui raruosi na tim tamona ai ba gadara hebou?
-
Dia ini ba lalo toma, ‘Lau be ede baina kwalimu toma?’ to namona na ini ba lalo toma, ‘Ai raruosi be ede baia kwalimu toma?’
“Daika maoro eiava daika kerere na basio laloa. Headava lalonai unu na dia ḡau badadia, to maino bona lalotamona hari ḡau badadia.”—Ethan.
BAIBUL ENA SISIBA: “Ta ta ena namo ena namo basio tahu, a bamomui edia namo ba tahu.”—Filipi 2:3, 4.
