E kara momokanimu taudia na tamadia sinadia, turadia, bona edia ḡaukara biagudia ese e abidadama henidiamu. Badina taravatu e badinamu, edia gwauhamata e hamomokanimu, bona nega iboudiai hereva momokani e gwauraimu.

Nega momo, ura kwalimu ba ḡaukaralaia diba ena bada eiava ena maraḡi na, emu mauri lalonai kamonai karana o hahedinaraiamu heḡereḡerenai, tama sina ese be henimumu.

“Tama sina ese bae abidadama henimu dalana na, ba hahedinaraia oi na da lo tauna bona maduna bo hua dibamu, una na dia idia nohodia ai mo ba hahedinaraia, to idia lasihidia ai danu ba hahedinaraia karana.”​—Sarahi.

BAIBUL ENA SISIBA: “Sibomui ba hetahu bona sibomui ba hediba.”​—2 Korinto 13:5.

Tama sina edia abidadama oiemu ai bae habadaia, eiava una abidadama karana na o haboioa dainai o uramu ma bavabia lou neganai, ini dala haida ba badina diba.

Ba kara momokani. Koikoi karana ese taunimanima edia abidadama oiemu ai baine hadikaia haraḡa diba. Bema o herevaherevamu neganai, hereva momokani bo gwauraimu bona emu kerere bo gwaurai hedinaraimu, ma haida ese be abidadama henimumu.

“Ḡau iboudiai na be heau namonamomu neganai, kara momokani ikarana na be haraḡamu. To, bema mai momokanimu ida emu kerere bo hahedinaraimu, taunimanima ese be abidadama henimumu.”​—Caiman.

BAIBUL ENA SISIBA: “A uramu ḡau idoidiai baia kara maoromaoro.”​—Heberu 13:18.

Oi na heḡereḡere sibomu ḡau ba kara diba. United States ai e karaia hetahu ḡaukarana ta ai e davaria, ḡaukara taudia e naridiamu oreadia 100 amo 78 ese e hahedinaraia, ta na heḡereḡere sibona ḡau baine kara diba karana na “kampani ta ta ese bae ḡaukara taudia ediai e tahumu kara badadia toi amo, una danu ta.” Bema hari oi na heḡereḡere sibomu ḡau ba kara diba, bo badamu neganai basio hekwarahimu.

“Tamagu bona sinagu na be dibamu bema egu maduna na na huadiamu bona egu ruma ḡaukaradia na dia e hamaorogu louloumu dainai na karamu. Sibogu egu ura ai ḡaukara na karamu neganai, idia ese ḡau momo ai e abidadama henigumu.”​—Sarah.

BAIBUL ENA SISIBA: “Lalogu na e tomamu ba kamonai henigu dainai . . . dibagu na gwauraimu karadia ba hereadia.”​—Filemona 21.

Ba haheauka. Tauani oromana e tubumu karana na ta itaia haraḡamu, to ta ena hemami bona ena diba e badamu karana na laḡani e laomu lalonai e hedinaraimu.

“Dia kara maorona tamona o karaia dainai, tamamu sinamu bona ma haida ese bae abidadama henimu diba. To, nega bainela lalonai bo karamu karadia ese metairametaira edia abidadama oiemu ai be habadaia be laomu.”​—Brandon.

BAIBUL ENA SISIBA: “Ini na ba hahedokilai: . . . Haheauka.”​—Kolose 3:​12.