EREGABE TAUDIA
9: Oi be Taunimanima Ede Hetomana?
ANINA BE DAHAKA?
Oi be taunimanima ede hetomana eiava oi oromamu be ede bamona, na dia ladamu eiava toamu ese mo be hahedinaraimu. To, o lalo badamu karadia, o abi daemu herevadia bona emu kara ese danu be hahedinaraiamu. Anina na oi be daika, na oi oromamu ibounai, oi murimurimu toana bona kudoumu ai e miamu ḡaudia ese be hahedinaraimu.
DAHAKA DAINAI MAI ANINA BADA?
Bema oi ese oromamu na o laloa badamu, turamu ese na basie biagumumu, to o abi daemu ḡaudia daidiai bo gini aukamu.
“Taunimanima momo na stoa ai e ginimu dolidia na heto. Bae hahedokilai dabuadia na sibodia ese asie abi hidimu, haida ese e abi hidimu.”—Adrian.
“Hari, kara maorona totona baina gini auka diba, ena be nega haida una na auka. Daidia be tura korikoridia na edia kara amo na dibamu bona idia padadiai na karamu karadia amo danu na dibamu.”—Courtney.
BAIBUL ENA SISIBA: “Ina tanobada oromana na basio tohotohoa; a lalomui ba hamatamata, bae idau vaitani.”—Roma 12:2.
DAHAKA BA KARAIA DIBA?
Oi be taunimanima ede bamona na hari ba hahedinaraia diba, bona o uramu taunimanima ede bamona ai baola totona o goadalaimu ḡaudia, o manokalaimu ḡaudia, bona o abi daemu ḡaudia na ba haerodia. Unu ba kara totona ini henanadai ba haerelai.
O goadalaimu ḡaudia: Baina kara diba ḡaudia bona baina kara diba ḡaukaradia be dahaka? Lau ese dahaka be na kara namonamomu? (Heḡereḡere: Nega korikori ai na kaumu, a? sibogu na hebiagumu, a? na ḡaukara goadamu, a? na hariharimu, a?) Lau be ededia kara namodia na karamu?
HEDURU HEREVANA: O hekwarahimu emu kara namodia ba dibadia, a? Tamamu, sinamu eiava turamu namona ta ba noia bena ia ese oiemu ai e itamu kara namodia bona badidia baine gwaurai hedinarai.
BAIBUL ENA SISIBA: “Ta ta ena ḡaukara ena ḡaukara bae diba, a bamona ena basine diba, unu amo sibona ena ḡaukara baine heaḡilaia.”—Galatia 6:4.
O manokalaimu ḡaudia: Egu kara ai dahaka be baina hanamoa diba? Ededia negai be, hahetoho baina davari diba? Ededia kara ai haheauka baina hahedinaraia na namo?
BAIBUL ENA SISIBA: ‘Ita baitato ita na asi eda kara dika,
be siboda ta hekoimu.’—1 Ioane 1:8.
O abi daemu ḡaudia: Edena haheḡani na badinaiamu, bona dahaka dainai? Dirava na abia daemu, eiava? Dahaka hahemomokani ḡaudia daidiai na abia daemu Ia na e nohomu? Lauegu ai ededia kara be dia hahemaoro maoromaoro karadia, bona dahaka dainai? Vaira nega totona dahaka na abi daemu?
BAIBUL ENA SISIBA: “Kara-balaheni ese baine narimu, lalo-parara ese baine gimamu.”—Hereva Lada-isidia 2:11.
