Herevahereva namonamo karana baine vara diba bema oi bona natumu na emui lalohadai bona hemami ba herevalai hebou.

Natu laḡanidia 13 ela 19 ai, herevahereva karana na be aukamu. Buka ladana Breaking the Code, na e gwa: “Vanegai be natumu ida ḡau iboudiai o karava bona o herevalaiva. To hari oi na da idau tauna ta heḡereḡerena, bona idia na asie uramu ba ḡaukara hebou bona ba herevahereva hebou.” Ena be unu e vara tomamu, to una na nega namona natumu ida emui herevahereva karana ba hanamoa!

Natumu ena nega ba badinaia. Unu ba kara toma, herevana una na malo ai ba herevahereva.

“Reana oi na bo uramu bao gwa, ‘Hari o uramu baita herevahereva? Lau be oi ida dina ibounai tame noho!’ To dahaka dainai baita maumau bema natuda na e uramu baita herevahereva? Una na tama sina iboudiai ese e uramu baine vara ḡauna, ani?”​—Lisa.

“Ena be na uramu baina mahuta, to natugu ida emai herevahereva karadia namodia na daba kahadiai a abimu.”​—Herbert.

BAIBUL ENA SISIBA: “Ta sibona ena namo basine tahua, a dekena tauna ena namo danu baine tahua.”​—1 Korinto 10:24.

Natumui ihakala henidia karana baine hadikaia ḡaudia basio kara. Tama ta na eto: “Nega haida natugu e herevamu negadiai, lau na ḡau idauidau na lalomu. Bona basina koidia diba​—idia na mai dibadia!”

Bema TV eiava mobael fon dainai natumu ena hereva na so lalopararalaia, namona na ba ha-ofudia. Natumu ese e herevalaiamu ḡauna ba kamonaia, bona e lalo-hekwarahilaiamu ḡauna na ba laloa bada, herevana una na dia ḡau badana.

“Namona na natuda ese bae mamia ita ese edia hemami na ta lalodia badamu. Bema una basie mamiamu, edia lalohekwarahi ḡaudia na basie hadibalaidamu bona ma haida ediai heduru be tahumu.”​—Maranda.

“Basio badu haraḡa, ena be natumu ena lalohadai na kerere.”​—Anthony.

BAIBUL ENA SISIBA: “Emui kamonai nahuana ba tohoa.”​—Luka 8:​18.

Nega idauidau ai ba herevahereva. Nega haida natu na basie uramu e lalo-hekwarahilaimu ḡaudia na tama sina ida bae helai bena bae hevaira heheni neganai bae herevalai.

“Ai ese motuka amo a loamu negadia a ḡaukaralaimu baia herevahereva. Asi a hevaira heheni dainai a herevahereva namonamomu.”​—Nicole.

Aniani negadia na nega namona ba herevahereva totona.

“Aniani negadiai, una dina ai e vara ḡaudia namodia bona dikadia a herevalaimu. Una ese e hatamonamaimu bona e hadibamaimu emai hekwakwanai na dia sibomai ese baia hahanaidia.”​—Robin.

BAIBUL ENA SISIBA: “Ta ta hereva ikamonaina ai baine haraḡa [bona] hereva igwauraina ai baine halahe.”​—Iakobo 1:​19.