Во оваа статија ќе прочиташ на што треба да внимаваш во врска со тоа:

•  Кому праќаш пораки

•  Што пишуваш во пораките

•  Кога праќаш пораки

Ќе најдеш и:

•  Предлози

•  Квиз

 За многу тинејџери праќањето пораки е основен начин на комуникација. Преку пораките можеш да бидеш во контакт со секој што ти е во именикот — се разбира, доколку твоите родители немаат приговор.

 „На татко ми не му се допаѓа кога јас и сестра ми зборуваме со момчиња. Ако сакаме да зборуваме со некое момче мораме да зборуваме од фиксниот телефон во дневната соба и само пред други“ (Ленор).

 Што треба да знаеш: Ако секому го даваш својот број, може да си направиш беља.

 „Ако не пазиш на кој сѐ го даваш твојот број, кога-тогаш ќе добиеш непожелни пораки или слики“ (Скот).

 „Ако редовно си праќаш пораки со некој од спротивниот пол, може многу брзо емотивно да се приврзеш кон него“ (Стивен).

 Библијата вели: „Паметниот човек го гледа злото и се трга“ (Изреки 22:3). Со малку претпазливост можеш да се поштедиш од многу главоболки.

 Вистинска приказна: „Јас и едно момче бевме другари и често си праќавме пораки. Во мојата глава, ние бевме само добри другари. И сѐ си беше ОК, додека еден ден не ми кажа дека се заљубил во мене. Кога подобро ќе размислам, јасно ми е дека не требаше да поминувам толку многу време со него и да му праќам толку многу пораки“ (Мелинда).

 Размисли: Што мислиш, како ќе влијае врз нивното пријателство тоа што Мелинда сега знае дека другар ѝ е вљубен во неа?

 Што би сменил? Што можела да направи Мелинда за да си останат само пријатели?

 Толку е лесно, а и интересно да се праќаат пораки што може да заборавиме дека некои луѓе се склони да читаат меѓу редови.

 Што треба да знаеш: Зборовите во пишана порака можат да се сфатат погрешно.

 „Во комуникацијата преку пораки не можеш да ги осетиш чувствата и тонот на гласот — дури и ако во пораката има емотикони или други симболи. Тоа може да доведе до недоразбирања“ (Бриана).

 „Познавам девојки што си го расипаа угледот и сега се на глас дека флертуваат само поради она што им го им пишале на некои момчиња“ (Лора).

 Библијата вели: „Праведникот промислува што ќе одговори“ (Изреки 15:28). Што учиме од ова? Препрочитај ја пораката пред да ја пратиш!

 Би можел сам да си поставиш разумни правила во врска со праќањето пораки.

 Што треба да знаеш: Ако не внимаваш што пишуваш, ќе излезеш прост и некултурен, поради што другите ќе те избегнуваат.

 „Многу е лесно кога пишуваш да заборавиш на манирите. Ми се случува да зборувам со некого или да сум на сред јадење и во исто време да си пишувам пораки со друг“ (Алисон).

 „Опасно е да возиш и да пишуваш пораки. Ако ги тргнеш очите од патот, има шанси да направиш сообраќајка“ (Ана).

 Библијата вели: „Сѐ си има свое време... време за молчење и време за зборување“ (Проповедник 3:1, 7). Ова важи и за пишувањето пораки!

Кому праќаш пораки

•  ;-) Почитувај ги правилата што ти ги поставиле родителите (Колошаните 3:20).

•  ;-) Избери кому ќе го дадеш својот број. Кога љубезно одбиваш да дадеш лични информации — вклучувајќи го и твојот број — учиш вештина што ќе ти треба како возрасен.

•  ;-) Немој да флертуваш преку пораки. Ако се родат романтични чувства, можеш да му го скршиш срцето некому.

 „Родителите гледаат дека внимавам како го користам мобилниот и затоа имаат доверба дека мудро ќе одлучам и чиј број ќе го меморирам“ (Бриана).

Што пишуваш во пораките

•  ;-) Пред да почнеш да ја пишуваш пораката, прашај се: ,Дали во оваа ситуација е најдобро да комуницирам преку порака?‘ Можеби е подобро да се јавиш или да почекаш за да зборуваш лице в лице.

•  ;-) Не ставај во порака нешто што не би го кажал лично. „Ако нешто не е убаво да се каже гласно, тогаш не е убаво ни да се напише во порака“, вели Сара (23).

 „Ако некој ти испрати провокативни слики, кажи им на родителите. Така ќе се заштитиш себеси, а и родителите ќе имаат поголема доверба во тебе“ (Сирван).

Кога праќаш пораки

•  ;-) Одреди време кога нема да го користиш телефонот. „Кога јадеме, кога учам или кога ја проучувам Библијата, телефонот не е до мене“, вели една девојка по име Оливија. „А кога сум на христијанските состаноци, сосема го исклучувам за да не се најдам на искушение да погледнам во него.“

•  ;-) Биди обѕирен (Филипјаните 2:4). Не праќај и не читај пораки додека зборуваш со некого.

 „Си поставив правила, на пример, не праќам пораки кога сум во друштво, освен ако е нешто итно. Исто така, не го давам мојот број на луѓе што не ги познавам добро“ (Јанели).