Стивен загъта: «Мӕ уарзон чызгимӕ куы нал ӕмбӕлдыстӕм, уӕд мӕм цӕрын дӕр нал цыд. Мӕ царды мын афтӕ зын никуыма уыди».

 Дӕуыл дӕр искуы ахӕм хабар ӕрцыд? Кӕд о, уӕд дын ацы статья баххуыс кӕндзӕн.

•  Адӕймаг цы фенкъары?

•  Дӕ бон цы у аразын

 Лӕппу ӕмӕ чызг куы нал фембӕлынц, уӕд уый зын вӕййы сӕ дыууӕйӕн дӕр.

•   Кӕд дӕу бафӕндыд афтӕ, цӕмӕй мауал ӕмбӕлат, уӕд, ӕвӕццӕгӕн, Жасмины хорз бамбардзынӕ. Жасмин загъта: «Зынаргъ мын чи уыд, уыцы адӕймаджы зӕрдӕ кӕй фӕриссын кодтон, уый тыххӕй мӕ мӕ цӕсгом афтӕ хордта, ӕмӕ йын зӕгъӕн дӕр нӕй. Ныфс мӕ ис, ахӕм хабар мыл кӕй никуыуал ӕрцӕудзӕн».

•   Кӕд дӕу нӕ, фӕлӕ иннӕйы нал фӕнды, цӕмӕй ӕмбӕлат, уӕд дӕм, ӕвӕццӕгӕн, диссаг нӕ фӕкӕсдзӕн, иуӕй-иутӕн уый афтӕ зын кӕй вӕййы, цыма сын исчи амард. Иу ӕрыгон чызг, Джанет, зӕгъы: «Зианджын цы фенкъары, уый ӕнкъардтон: иумӕ кӕй нал стӕм, уый мӕ нӕ уырныдта, мӕсты кодтон, архайдтон, цӕмӕй та ногӕй ӕмбӕлын райдыдтаиккам, ӕмӕ стӕй фӕстагмӕ – иу-афӕдзы фӕстӕ – мӕ бон базыдтон ӕмӕ ӕрсабыр дӕн».

 Цавӕр хатдзӕг ис скӕнӕн. Дӕ уарзонимӕ куы нал ӕмбӕлат, уӕд, гӕнӕн ис, ӕмӕ дын тынг зын уа ӕмӕ дӕхимӕ ныхъхъусай. Библийы фыст ис: «Ныфссаст зӕрдӕ... стджытӕ хус кӕны» (Ӕмбисӕндтӕ 17:22).

•  Фӕлтӕрдджын ӕмбалимӕ аныхас кӕн. Библийы фыст ис: «Ӕцӕг ӕмбал алкӕддӕр уарзы. Уый у, зын сахат адӕймаджы фарсмӕ ӕрбалӕууынӕн чи райгуыры, ахӕм ӕфсымӕр» (Ӕмбисӕндтӕ 17:17). Дӕ зӕрдӕйы цы ис, уый дӕ ныййарджытӕй искӕмӕн кӕнӕ фӕлтӕрдджын ӕмбалӕн куы радзурай, уӕд дын уый, гӕнӕн ис, ӕмӕ баххуыс кӕна, цӕмӕй дӕхимӕ ӕрцӕуай ӕмӕ дӕ хабармӕ ӕндӕр цӕстӕй ракӕсай.

   «Цалдӕр мӕйы мӕ никӕй уынын фӕндыд ӕмӕ мын куыд зын уыд, уый тыххӕй никӕмӕн дзырдтон. Фӕлӕ ӕмбӕлттӕ адӕймагӕн тынг баххуыс кӕнынц. Мӕ зӕрдӕйы цы уыд, уый сын куы раргом кодтон, уӕд мын фенцондӕр» (Джанет).

•  Цы ’рцыд, уымӕй дӕ бон зондӕн райсын цы у? Библийы ма ис ахӕм ӕмбисонд дӕр: «Амал кӕн зонд, амал кӕн ӕмбарындзинад» (Ӕмбисӕндтӕ 4:5). Исты маст куы бавзарӕм, уӕд, чи зоны, нӕхи тыххӕй бирӕ цыдӕртӕ базонӕм. Стӕй ма базонӕм, куы фӕфыдӕнхъӕл вӕййӕм, уӕд уый сӕрты нӕ бон ахизын вӕййы ӕви нӕ.

   «Мӕ уарзонимӕ куы нал ӕмбӕлдыстӕм, уӕд мӕ ме ’мбал бафарста: „Ацы хабарӕй дӕхицӕн зондӕн цы райстай, уый дын куыд баххуыс кӕндзӕн, ногӕй искӕимӕ ӕмбӕлын куы райдайай, уӕд?“» (Стивен).

•  Кув. Библи зӕгъы: «Дӕ уаргъ Йегъовӕйыл сӕвӕр, ӕмӕ дын уый баххуыс кӕндзӕн» (Псалом 55:22). Куы кувай, уӕд дын уый баххуыс кӕндзӕн, цӕмӕй мауал мӕт кӕнай ӕмӕ, кӕй нал ӕмбӕлут, уымӕ ӕндӕр цӕстӕй ракӕсай.

   «Ӕдзух кув. Йегъовӕ дын дӕ зӕрдӕйы рыст ӕмбары ӕмӕ, уавӕр куыд у, уый дӕуӕй хуыздӕр зоны» (Маршия).

•  Иннӕтӕн ӕххуыс кӕн. Библи зӕгъы: «Уӕхицӕн куыд хуыздӕр уа, ӕрмӕст ууыл ма хъуыды кӕнут, фӕлӕ, иннӕтӕн куыд хуыздӕр уа, ууыл дӕр» (Филиппӕгтӕм 2:4). Иннӕтӕн фылдӕр ӕххуыс кӕн, ӕмӕ дӕ дӕхи рыст дӕр тагъддӕр ферох уыдзӕн.

   «Адӕймаг, кӕимӕ ӕмбӕлд, уымӕй куы фӕхицӕн вӕййы, уӕд ыл дуне баталынг вӕййы, ӕмӕ, цы рыст бавзары, уый буары рыстӕй дӕр фыддӕр вӕййы. Фӕлӕ йӕ мӕхицӕй зонын, уыцы рыст сабыргай кӕй фӕкъаддӕр вӕййы. Ӕрмӕст мӕ хъуыди цасдӕр рӕстӕг банхъӕлмӕ кӕсын, цалынмӕ мӕ зӕрдӕйы хъӕдгӕмттӕ байгас уыдаиккой» (Эвелин).