ФӔСИВӔДЫ ФАРСТАТӔ
Ӕнкъард мын куы уа, уӕд мӕ бон цы у саразын?
Иуӕй-иутӕн уымӕй зындӕр ницы вӕййы, къӕвда бон хӕдзары куы фӕбадынц ӕмӕ, цы кусой, уый куы нӕ фӕзонынц кӕнӕ, кӕдӕм ацӕуой, уый дӕр сын куы нӕ вӕййы. Иу ӕрыгон лӕппу, Роберт, загъта: «Ахӕм рӕстӕг фӕбадын ӕмӕ, цы кусон, уый нӕ фӕзонын».
Дӕуӕн дӕр дӕ хабар афтӕ у? Кӕд о, уӕд дын ацы статья баххуыс кӕндзӕн.
Цы хъуамӕ зонай
Технологитӕ алы хатт нӕ баххуыс кӕнынц.
Адӕймаг интернеты истӕмӕты куы фӕкӕсы, уӕд рӕстӕг тагъд атӕхы. Фӕлӕ афтӕмӕй сӕры магъз нӕ фӕкусы, ӕмӕ адӕймаг ноджы тынгдӕр нынкъард вӕййы. Джереми, цӕуы йыл 21 азы, зӕгъы: «Адӕймаг экранмӕ ныджджих вӕййы ӕмӕ ӕппындӕр ницӕуыл фӕхъуыды кӕны».
Афтӕ зӕгъы иу ӕрыгон чызг Еленӕ дӕр: «Технологитӕй бирӕ пайда нӕй. Рӕстӕгмӕ дӕ алцыдӕр айрох вӕййы. Фӕлӕ стӕй дӕ телефон кӕнӕ дӕ планшет куы ахуыссын кӕныс, уӕд тынгдӕр ӕрӕнкъард вӕййыс».
Алцыдӕр кӕнгӕ у, хъуыддагмӕ цы цӕстӕй кӕсыс, уымӕй.
Бирӕ хъуыддӕгтӕ дын куы уа, уӕд дын цымӕ ӕнкъард нӕ уыдзӕн? Бирӕ аразгӕ у, цы аразыс, уый дӕ зӕрдӕмӕ цӕуы ӕви нӕ, уымӕй. Иу ӕрыгон чызг, Карен, зӕгъы: «Скъолайы куы ахуыр кодтон, уӕд-иу мын тынг ӕнкъард уыд, кӕд мӕ алы бон дӕр бирӕ цыдӕртӕ аразын хъуыди, уӕддӕр. Фӕлӕ, цы аразыс, уый зӕрдиагӕй куы аразай, уӕд дын ӕнкъард нӕ уыдзӕн».
Зыдтай йӕ? Куы ницы куыст дын уа, уӕд дын уый хорз фадат уыдзӕн дӕ курдиӕттӕ раргом кӕнынӕн.
Рӕстӕг абарӕн ис хорз зӕххимӕ – дӕ бон дзы у дӕ аивадон курдиӕттӕ сырӕзын кӕнын
Дӕ бон цы у аразын
Дӕ цард фӕхъӕздыгдӕр кӕн. Ног адӕмимӕ базонгӕ у. Дӕхицӕн ног ирхӕфсӕн ӕрхъуыды кӕн. Ногӕй исты базон. Бирӕ цыдӕртӕ кӕй цымыдис кӕны, ахӕм адӕмӕн ӕнкъард нӕ вӕййы. Стӕй иннӕтӕн дӕр семӕ ӕнкъард нӕ вӕййы.
Библийы уагӕвӕрд: «Цыфӕнды ма аразай, араз ӕй ӕппӕт хъарутӕй» (Екклесиаст 9:10).
«Ӕрӕджы райдыдтон китайаг ӕвзаг ахуыр кӕнын. Алы бон дӕр ӕй фӕахуыр кӕнын. Ӕмӕ бамбӕрстон, нырмӕ дӕр мӕ афтӕ бакӕнын кӕй хъуыд. Уарзын исты аразын. Уый фӕрцы мӕ сӕр фӕкусы, ӕмӕ мӕ рӕстӕг дзӕгъӕлы нӕ ацӕуы» (Мелиндӕ).
Дӕ нысан ма рох кӕн. Цыдӕр цӕмӕн аразыс, уый куы зонай, уӕд ӕй зӕрдиагдӕрӕй араздзынӕ. Суанг дын дӕ уроктӕ кӕнын дӕр ӕхсызгондӕр уыдзӕн.
Библийы уагӕвӕрд: «Царды мидӕг адӕймагӕн уымӕй хуыздӕр ницы ис, ӕмӕ... йӕ уӕззау фыдӕбонӕй йӕ удӕн хорзӕй исты куы уынын кӕна» (Екклесиаст 2:24).
«Скъола куы фӕуд кодтон, уӕд-иу алы бон дӕр мӕ уроктыл аст сахаты фӕбадтӕн, уымӕн ӕмӕ, уымӕй размӕ цы нӕ сахуыр кодтон, уый мӕ сахуыр кӕнын хъуыди. Фӕлӕ мын ӕнкъард нӕ уыд, уымӕн ӕмӕ мӕ разы уыд нысан – экзаментӕ раттын,– ӕмӕ мын уый ӕххуыс кодта» (Ханнӕ).
Дӕ зӕрдыл дар, дӕ бон алцы аивын кӕй нӕу. Алы куысты дӕр вӕййы, адӕймаг аразын цы нӕ фӕуарзы, ахӕм цыдӕртӕ. Хатт афтӕ вӕййы, ӕмӕ дӕ хорз ӕмбалимӕ цыдӕр спълан кодтат, фӕлӕ йӕ пълӕнттӕ фӕивта, ӕмӕ, цы кусай, уый нӕ зоныс. Афтӕ куы рауайа, уӕд дӕхицӕн тӕригъӕд кӕныны бӕсты дӕ уавӕрмӕ ӕндӕр цӕстӕй ракӕс ӕмӕ ӕндӕр исты сараз.
Библийы уагӕвӕрд: «Йӕ зӕрдӕ хъӕлдзӕг кӕмӕн у, уымӕн... ӕдзухдӕр вӕййы куывд» (Ӕмбисӕндтӕ 15:15).
«Ме ’мбал мын загъта, цӕмӕй-иу цин кӕнон, иунӕгӕй баззайыны фадат мын кӕй фӕвӕййы, ууыл. Загъта мын, адӕймаг иннӕтимӕ дӕр кӕй хъуамӕ ӕрвита йӕ рӕстӕг ӕмӕ-иу иунӕгӕй дӕр кӕй хъуамӕ уа» (Айви).
Чи зоны ма дӕ зӕрдӕмӕ фӕцӕуа
КУСӔН СХЕМӔТӔ
Цы ис саразӕн, дӕхимӕ иунӕг куы кӕсай
Мыййаг, дӕхимӕ иунӕг фӕкӕсыс? Ацы кусӕн схемӕйы фӕрцы ахъуыды кӕн, дӕхимӕ иунӕг цӕй тыххӕй фӕкӕсыс ӕмӕ базон, уыцы ӕнкъарӕнтыл цӕй фӕрцы фӕуӕлахиз уыдзынӕ.
ФӔСИВӔДЫ ФАРСТАТӔ
Мӕхицӕн фылдӕр ӕмбӕлттӕ скӕнон ӕви нӕ?
Ӕрмӕстдӕр цалдӕр адӕймагимӕ лымӕн кӕнай, уый дӕм кӕд хорз кӕсы, уӕддӕр уый алы хатт пайда нӕ вӕййы. Цӕуылнӕ?
ФЛОМАСТЕРӔЙ НЫВ АНИМАЦИ
Чи у хицау: ды ӕви дӕ телефон?
Ацы дуне ӕнӕ технологитӕй нӕ фӕразы, фӕлӕ дӕ хабар афтӕ ма уӕд – ды сын у хицау. Дӕ бон куыд у базонын, дӕ телефон кӕнӕ дӕ планшетыл тынг кӕй сахуыр дӕ? Дӕ бон куыд у уыцы уавӕр фӕивын?
