Fayyo noottohu hedeweelcho xiwamoottoni? Hatto ikkiro, dhiwanu mageeshshi geeshsha yaachishannoronna surre daafursannoro, hattono mageeshshi woxe gudannoro afootto yaate. Xissokki dandiite heeˈratto gede kaaˈlahera dandaannori maati? Minikki manni woy jaallakki giddo xiwaminohu nooha ikkiro, kaaˈla dandaattohu hiittoonniiti? Qullaawu Maxaafi fayyimmate agarooshshi maxaafa ikka hoogirono, qarrakki dandiite heeˈratto gede kaaˈlitanno amaale aannohe.

•   Akimete kaaˈlo afiˈrate woˈnaali

   Qullaawu Maxaafi yaannore: “Dhiwantinorira ikkinnina fayyaaleeyyete xagisaanchu dihasiisannonsa.”—Maatewoosi 9:12.

   Hatto yaa mayyaate? Hasiisannoha ikkiro, xagissanno ogeeyye kaaˈlitannohe gede assiˈrate woˈnaali.

   Togo assate woˈnaali: Dandaamihe deerrinni, dancha xagga afiˈrate woˈnaali. Mito woyite, addi addi akime amaaˈla dancha ikkitara dandiitanno. (Lawishsha 14:15) Xagissanno ogeeyye ledo coye fante hasaawi; insa yitannore seekkite huwatate woˈnaali; hattono xiwanikki gari leellinonsaronna teˈee buuxi. (Lawishsha 15:22) Xiwanikki daafiranna xagisiˈra dandaattote addi addi doogga daafira ledde afate woˈnaali. Amadinohe xiwaninna xaginsanni doogga daafira seekkite afakki, qarrakki qeelate wodanaaˈmite sharramatto gedenna fayyimmakki daafira danchare doodhatto gede kaaˈlitannohe.

•   Fayyimmate kaaˈlannore assa rosi

   Qullaawu Maxaafi yaannore: “Manninate kaajjishiˈrate rosi . . . kaaˈlanno.”—1 Ximootewoosi 4:8.

   Hatto yaa mayyaate? Fayyimmate kaaˈlanno rosichi heeˈrihero, lawishshaho ganyite ispoorte loosattoha ikkiro kaaˈlitannohe.

   Togo assate woˈnaali: Ganyite ispoorte loosi, fayyimmate kaaˈlitanno sagale iti, hattono duushshanno goxicho goxi. Amadinohe dhibbi qarrisiherono, fayyimmate kaaˈlanno rosichi heeˈrihero hakku kaaˈlannota fullahaano coyidhino. Kayinni assatto coyi fayyimmakki roore gawajjannoha ikkannokki gede qorophi; qoleno adhitanni nootto xagga ledo sumuu yaannore assi.

•   Woloota kaaˈleˈˈe yii

   Qullaawu Maxaafi yaannore: “Jaalu woˈmanka woyite jaalaholla; roduuno qarru barra iillanno.”—Lawishsha 17:17.

   Hatto yaa mayyaate? Jaallakki amadinohe qarra dandaatto gede kaaˈlitahera dandiitanno.

   Togo assate woˈnaali: Addaxxatto jaalira giddokkita fushshite hasaaphi. Hatto assakki beya afiˈratto gedenna hisatatto gede kaaˈlitahera dandiitanno. Jaallakkinna fiixikki wole dooggannino kaaˈlahera hasiˈrannoti egennantinote; kayinni ma garinni kaaˈlannohero afa hoogara dandaanno. Hakko daafira, ma garinni kaaˈlitahera dandiitannoro xawisse kulinsa. Lowore assitahera agadhitooti; qoleno assitannoherira woˈmanka woyite galatattota leellishi. Ikkollana, jaallakki kaaˈlitahera yite ikkirono mito woyite furro-fuuqqo hooltahera dandiitanno; hakko daafira, laˈahera meˈˈe higge daa dandiitannoronna atewa mageeshshi saate keeshsha dandiitannoro badde kula hasiissannoheha ikkara dandaanno.

•   Dancha danchare hedi

   Qullaawu Maxaafi yaannore: “Hagiirraamu wodani mannimmate fayyimma aanno; dadillaamu wodani kayinni mannimma maniissanno.”—Lawishsha 17:22.

   Hatto yaa mayyaate? Dancha danchare hedanna hexxo mudha hooga, wodanaaˈmatto gedenna xiwana cincate kaaˈlitanno jawaante afiˈratto gede kaaˈlitannohe.

   Togo assate woˈnaali: Amadinohe dhibba qeelate woˈnaalatto woyite, wolqakkira aleenni ikkinore agurte assa dandaattore illachishi. Ateneeto wolu manni ledo woy fayyu nootto waro assattori ledo heewisiissooti. (Galatiyu Sokka 6:4) Wonshiˈra dandaatto mixo fushshiˈri; hatto assakki albillittete yanna daafira dancha danchare hedatto gede kaaˈlitannohe. (Lawishsha 24:10) Wolqakki assitu deerrinni, woloota kaaˈlannore assi. Uyiniro afiˈnanni hagiirri, qarrakki calla hedattokki gede kaaˈlannohe.—Soqqamaasinete Looso 20:35.

 Qullaawu Maxaafi, Maganu Yihowa a xiwamino mancho xiwanasi dandee heeˈranno gede kaaˈlannota kulanno. Maganu maalaletenni hursannonke yine agadha didandiineemmo; ikkirono, isi magansidhannosire aante noo doogganni kaaˈlannonsa:

 Keere. Yihowa, ‘Mannu hedora aleenni ikkinoha Maganu keere’ aannonke. (Filiphisiyusi Sokka 4:6, 7) Kuni keeri woy giddoyidi harshammo, mittu manchi quwa sae yaadannokki gede kaaˈlitannosi. Maganu huuccattotenni yaaddonsa isira kuˈlitannorira togoo keere aannonsa.—1 Pheexiroosi 5:7.

 Hayyo. Yihowa danchare doodha dandiineemmo gede hayyo aannonke. (Yaiqoobi 1:5) Mittu manchi Qullaawu Maxaafi giddo nooha woˈmanka woyite kaaˈlanno biddishsha huwate harunsiro, togoo hayyo afiˈranno.

 Jawaachishshanno hexxo. Yihowa “Dhiwamoommo” yaannohu heeˈrannokki yanna daggannota kule hexxo uyino. (Isayaasi 33:24) Tini hexxo, batinyu manni buuto dhiwame heeˈre nafa sheshifatanno gede kaaˈlitino.—Ermiyaasi 29:11, 12.