Qullaawu Maxaafi giddo nooha Ajuujate maxaafa Giriikete Afiinni Apokaalypisisi yinanni; kuni qaali “Diwamino Coye Fana” woy “Xawo Fulanno Gede Assa” yitanno tiro afiˈrino. Kuni suˈmi Ajuujate maxaafi tiro huwanteemmo gede kaaˈlannonke; kuni maxaafi, dahaawino coyenna konne maxaafa borreessinihunni lowo diri gedensaanni woˈmitanno coyibba xawise kulannoho. Konni maxaafi giddo borreessinoonniti batinye masaalo xaara diwoˈmitino.

Ajuujate Maxaafi Amado

•   Bitima.—Yohaannisi Ajuuja 1:1-9.

•   Yesuusi lamala songora soyino sokka.—Yohaannisi Ajuuja 1:10–3:22.

•   Maganu iima zuufaanesira ofolle ajuujatenni leellino.—Yohaannisi Ajuuja 4:1-11.

•   Hoode hoodete leeltinota addi addi ajuuja:

  •   Lamala sumuda.—Yohaannisi Ajuuja 5:1–8:6.

  •   Lamala xurumba; jeefote ufuunfoonnihu sasu xurumbi sase aanneˈe woy bayissibao daggannota kulanno.—Yohaannisi Ajuuja 8:7–14:20.

  •   Lamala gawatta; mitte mittenti gawate baattote aana dunnanniha Maganu hanqo amaddino.—Yohaannisi Ajuuja 15:1–16:21.

  •   Maganu baarigaarra baˈanna leellishshannota addi addi ajuuja.—Yohaannisi Ajuuja 17:1–20:10.

  •   Gordohonna baattote aana dirrannoha Maganu atoote leellishshanno ajuuja.—Yohaannisi Ajuuja 20:11–22:5.

•   Gumulo.—Yohaannisi Ajuuja 22:6-21.

Ajuujate maxaafi yaannore huwatate kaaˈlannore

1.   Ajuujate maxaafi sokka, Maganu soqqamaasinera danchare kultannote ikkinnina waajjishshannota woy shabbarsitannota diˈˈikkitino. Batinyu manni “apokaalypsi” yaannoha ajuujate maxaafi suˈma danotenna dawaawanote ledo xaadise hedanno; ikkirono, Ajuujate maxaafi bitimahono ikko gumulote, konni maxaafi sokka nabbawannohu, huwatannohunna harunsanno manchi konne assasinni hagiirraamo ikkannota kulanno.—Yohaannisi Ajuuja 1:3; 22:7.

2.   Ajuujate maxaafi kulannoti batinye malaatta noo gedeenni adhinannita diˈˈikkitino.—Yohaannisi Ajuuja 1:1.

3.   Ajuujate maxaafira kulloonnihu batinyu coyinna malaatta, Qullaawu Maxaafi giddo balanxe kulloonnireeti:

   •   Yihowa—‘iima gordoho noo Maganonna’ woˈmunku coyi Kalaqaancho.—Marro 4:39; Faarso 103:19; Yohaannisi Ajuuja 4:11; 15:3.

   •   Yesuusi Kiristoosi—‘Maganu Geˈrecho.’—Yohaannisi 1:29, Haaro Gondooro; Yohaannisi Ajuuja 5:6; 14:1.

   •   Sheexaane Daawuloosi—Maganu baarigaara.—Kalaqama 3:14, 15; Yohaannisi 8:44; Yohaannisi Ajuuja 12:9.

   •   Batiˈra Baabiloone—hundi Baabiloonente gede (Baabeeli), Maganu Yihowanna mannisi diinaati; qolteno ammaˈno rosiissannohu kaphu rosi buichooti.—Kalaqama 11:2-9; Isayaasi 13:1, 11; Yohaannisi Ajuuja 17:4-6; 18:4, 20.

   •   “Baara”—Magano giwannoha busha manna.—Isayaasi 57:20; Yohaannisi Ajuuja 13:1; 21:1.

   •   Hunda Magano magansiˈrate horoonsiˈnannihu xaadooshshu dunkaani ledo xaadooshshe afidhino coyibba—gondooru taawoota, hincilaallote baara (hayishshiˈnanni saane), caabbicho, hixaanu kakkalonna kakkalote darga mitteenni.—Fulo 25:10, 17, 18; 40:24-32; Yohaannisi Ajuuja 4:5, 6; 5:8; 8:3; 11:19.

   •   Moyichu—uullate gashshoote riqiwannoho.—Daanieeli 7:1-8, 17-26; Yohaannisi Ajuuja 13:2, 11; 17:3.

   •   Lawishshu tiro afidhino kiiro.—Yohaannisi Ajuuja 1:20; 8:13; 13:18; 21:16.

4.   Ajuuja woˈma hanaffinohu “Mootichu barra,” yaano 1914nni Maganu Mangiste xintantu yannaranna Yesuusi Moote ikke gashsha hanafi woyiteeti. (Yohaannisi Ajuuja 1:10) Konni daafira, Ajuujate maxaafi giddo kulloonni masaalo roorenka woˈmitannohu ninke yannaraati yaa dandiineemmo.

5.   Ajuujate maxaafa huwatate kaaˈlannonkeri, wole Qullaawu Maxaafi gafa huwatate kaaˈlannonkeri ledo mittoho; kuri giddo gamu: Maganu aanno hayyonna konne maxaafa huwatino manni kaaˈlooti.—Soqqamaasinete Looso 8:26-39; Yaiqoobi 1:5.