Afya ya Akili—Tatizo la Ulimwenguni Pote

CHEZA

“Mara nyingi ninakuwa na mahangaiko kwa kiasi fulani, hata kama niko peke yangu chumbani.”

“Ninapohisi vizuri ninaanza kuwa na wasiwasi. Ninakumbuka kwamba mara nyingi ninapokuwa na furaha sana, muda mfupi tu baadaye nitakuwa na huzuni sana.”

“Ninajaribu kuhangaikia mambo ya leo tu, lakini wakati mwingine ninalemewa na mahangaiko ya siku kadhaa.”

Je, unakubaliana na maneno ya watu hao ambao wana matatizo ya afya ya akili? Je, wewe au mtu mwingine unayempenda anakabili matatizo kama hayo?

Uwe na uhakika kwamba hauko peke yako. Watu wengi leo wanaathiriwa na matatizo ya afya ya akili, iwe ni wao wenyewe au wapendwa wao.

Bila shaka, tunaishi katika “nyakati za hatari zilizo ngumu kushughulika nazo” zinazosababisha mahangaiko mengi. (2 Timotheo 3:1) Utafiti mmoja ulikadiria kwamba duniani pote, mtu mmoja kati ya watu nane, anakabili matatizo ya afya ya akili. Katika mwaka wa 2020, janga la COVID-19 lilisababisha kuongezeka kwa mahangaiko kwa asilimia 26 na kushuka moyo kwa asilimia 28.

Hata hivyo, afya yetu ya akili haifafanuliwi na takwimu. Inahusu jinsi wewe na wapendwa wako mnavyohisi na mnavyoishi.

Afya ya akili ni nini?

Afya njema ya akili ni hali ya mtu kuhisi vizuri na kuweza kufanya mambo kwa njia inayofaa. Unaweza kukabiliana na mahangaiko ya kawaida, kupata matokeo mazuri kazini, na kuridhika maishani.

Tatizo la afya ya akili . . .

HALISABABISHWI na udhaifu wa mtu.
NI tatizo la afya linalomsababishia mtu mahangaiko mengi na kuvuruga uwezo wake wa kufikiri, kudhibiti hisia, na tabia.
Mara nyingi linaweza kuharibu uwezo wa mtu wa kushughulika na watu na kushughulikia mahitaji yake ya msingi maishani.
Linaweza kuathiri watu wote haijalishi umri, utamaduni, taifa, kabila, dini, elimu, au mapato.

Kupata msaada kwa ajili ya matatizo ya afya ya akili

Ikiwa mtu fulani anaanza kubadili tabia, ana matatizo ya kulala au kula, au ana mahangaiko yasiyoisha, wasiwasi, au huzuni, huenda akahitaji msaada wa daktari ili kutambua chanzo cha tatizo hilo na kulitibu. Unaweza kupata wapi msaada?

Mwanamume mwenye hekima zaidi, Yesu Kristo, alisema hivi: “Watu wenye afya hawahitaji daktari, lakini wagonjwa wanamhitaji.” (Mathayo 9:12) Wale wenye matatizo ya afya ambao wanapata matibabu yanayofaa na dawa, wanaweza kupunguza matatizo yao kwa kiasi kikubwa na kuishi maisha yenye furaha. Ni jambo la hekima kwa mtu kutafuta matibabu mapema ikiwa hali yake ni mbaya au amekabili hali hizo kwa muda mrefu. a

Ingawa Biblia si kitabu cha matibabu, mambo inayozungumzia yanaweza kunufaisha afya yetu ya akili. Tunakukaribisha kwa uchangamfu uchunguze makala zinazofuata zitakazozungumzia jinsi Biblia inavyoweza kutusaidia kukabiliana na matatizo ya afya ya akili.

a Mnara wa Mlinzi halipendekezi matibabu fulani hususa. Kila mtu anahitaji kuchunguza hali yake kwa makini kabla ya kufanya uamuzi.