Baebele ya Reng ka go Aba?
Karabo ya Baebele
Baebele e re ruta gore re abele ba bangwe ka go rata, mme ya re re dire jalo ka maitlhomo a a siameng. Gape ya re fa re abela ba bangwe, re a itumela e bile le bone ba a itumela. (Diane 11:25; Luke 6:38) Jesu o ne a re: “Go na le boitumelo jo bogolo mo go abeng go na le jo bo leng gone mo go amogeleng.”—Ditiro 20:35.
Ke leng go aba go itumedisang Modimo?
Go aba go itumedisa Modimo fa re go dira ka go rata. Baebele ya re: “A mongwe le mongwe a dire fela jaaka a sweditse mo pelong ya gagwe, e seng ka go ikgoga fela kgotsa ka go patelelwa, gonne Modimo o rata yo o nayang ka boitumelo.”—2 Bakorintha 9:7.
Fa re batla go obamela Modimo ka tsela e a e amogelang, re tshwanetse go abela ba bangwe ka go rata. (Jakobe 1:27) Fa re thusa batho ba ba tlhokang, go tshwana le fa re dira mmogo le Modimo, e bile go ntse jaaka e kete re mo adima sengwe. (Diane 19:17) Mme Baebele ya re Modimo o tla re duela.—Luke 14:12-14.
Ke leng go aba go sa itumediseng Modimo?
Fa motho a go dira ka maitlhomo a a sa siamang. Ka sekai:
Fa o aba ka gonne o batla go kgatlha batho ba bangwe.—Mathaio 6:2.
Fa o abela ba bangwe ka gonne o batla gore ba go fe sengwe.—Luke 14:12-14.
Fa o aba ka maitlhomo a go reka Modimo gore a go boloke.—Pesalema 49:6, 7.
Fa go abela motho sengwe go mo rotloetsa go dira dilo tse di sa itumediseng Modimo. Ka sekai, ga re a tshwanela go naya motho madi gore a ye go betšha kgotsa gore a reke diritibatsi. (1 Bakorintha 6:9, 10; 2 Bakorintha 7:1) Gape fa motho a gana go bereka, ga re a tshwanela go mo naya madi.—2 Bathesalonika 3:10.
Fa go abela motho go dira gore o se ka wa diragatsa maikarabelo a Modimo a go a neileng. Baebele e ruta gore ditlhogo tsa malapa di tshwanetse go tlamela malapa a tsone. (1 Timotheo 5:8) Ga ba a tshwanela go aba thata jaana mo malapa a bone a feleletsang a se na sepe. Jesu o kile a kgala batho ba ba neng ba gana go tlhokomela batsadi ba bone ba ba godileng ka gonne ba re dilo tsotlhe tse ba nang le tsone ke “mpho e e tshwaetsweng Modimo.”—Mareko 7:9-13.
Tse Dingwe Tse O ka Di Kgatlhegelang
TORA YA TEBELO
Itumelele Masego a go Abela ba Bangwe
Go aba go dira gore wena le batho ba bangwe lo itumele. Go dira gore batho ba dirisane sentle ba bo ba nne ditsala. O ka dira eng go itumelela go aba?
TSOGANG!
Tsela ya go Itumela—Go Kgotsofala le go Abela ba Bangwe
Batho ba le bantsi ba re dithoto tse dintsi le dikhumo di dira gore motho a itumele. A mme madi le dithoto di dira gore motho a nne a itumetse?
DIPOTSO TSE GANTSI DI BODIWANG
Tiro ya Basupi ba ga Jehofa e Tshegediwa Jang ka Madi?
Iponele kafa tiro ya go rera mo lefatsheng lotlhe e golang ka teng le fa go sa kopiwe dikoleke kgotsa ditsabosome.
KA GA RONA
Kopa Thuto ya Baebele ya Mahala
Tlotlang ka potso nngwe ya Baebele kgotsa ithute mo go oketsegileng ka Basupi ba ga Jehofa.