Dyondza Eka Rito Ra Xikwembu

Xana U Nga Tshinela Njhani Eka Xikwembu?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xana Xikwembu xi yingisa swikhongelo hinkwaswo?

Yehovha u rhamba vanhu va matiko hinkwawo leswaku va tshinela eka yena hi xikhongelo. (Pisalema 65:2) Kambe a nga yingisi swikhongelo hinkwaswo. Hi xikombiso, loko Vaisrayele va phikelele eswidyohweni swa vona, Xikwembu a xi swi yingisanga swikhongelo swa vona. (Esaya 1:15) Hambi ku ri swikhongelo swa wanuna loyi a xanisaka nsati wakwe swi nga siveriwa. (1 Petro 3:7) Kambe, Xikwembu xi nga yingisa ni swikhongelo swa vadyohi lavakulu loko va hundzuka.—Hlaya 2 Tikronika 33:9-13.

2. Xana hi fanele hi khongela njhani?

I lunghelo eka hina ku va hi kota ku khongela eka Yehovha naswona xikhongelo i yin’wana ya tindlela to va hi n’wi gandzela kutani hi fanele hi khongela yena ntsena. (Matewu 4:10; 6:9) Leswi hi nga hetisekangiki, hi fanele hi khongela hi vito ra Yesu hikuva i “ndlela” leyi vekiweke. (Yohane 14:6) Yehovha a nga lavi hi phindha-phindha swikhongelo leswi hlokohatiweke kumbe leswi tsariweke kambe u lava hi khongela swi suka embilwini.—Hlaya Matewu 6:7; Vafilipiya 4:6, 7.

Muvumbi wa hina u twa hambi ku ri swikhongelo leswi nga twaliki leswi vuriwaka hi mbilu. (1 Samuwele 1:12, 13) U hi rhamba leswaku hi n’wi khongela nkarhi wihi na wihi, loko ri xa ni loko ri pela, loko hi dya ni loko hi langutana ni swiphiqo.—Hlaya Pisalema 55:22; Matewu 15:36.

3. Ha yini Vakreste va hlangana swin’we?

Ku tshinela eka Xikwembu a swi olovi hikuva hi hanya ni vanhu lava nga pfumeriki eka xona naswona va sandzaka xitshembiso xa xona xa misava leyi nga ni ku rhula. (2 Timotiya 3:1, 4; 2 Petro 3:3, 13) Kutani hi fanele hi hlangana ni vapfumeri-kulorhi leswaku hi ta khutazana.—Hlaya Vaheveru 10:24, 25.

U nga tshinela eka Xikwembu loko u endla xinghana ni vanhu lava xi rhandzaka. Minhlangano ya Timbhoni ta Yehovha yi hi nyika nkarhi wo va hi vuyeriwa loko hi vona ripfumelo leri van’wana va nga na rona.—Hlaya Varhoma 1:11, 12.

  4. Xana u nga tshinela njhani eka Xikwembu?

U nga tshinela eka Yehovha hi ku va u anakanyisisa hileswi u swi dyondzeke eRitweni rakwe. Anakanyisisa hi mintirho yakwe, minkongomiso yakwe ni switshembiso swakwe. Loko u anakanyisisa hi xikhongelo swi ta endla leswaku u tlangela rirhandzu ni vutlhari bya Xikwembu.—Hlaya Yoxuwa 1:8; Pisalema 1:1-3.

U nga va ekusuhi ni Xikwembu ntsena loko u tshembela eka xona u tlhela u va ni ripfumelo eka xona. Kambe ripfumelo ri fana ni xilo lexi hanyaka lexi lavaka ku hlayisiwa. Nkarhi hinkwawo u fanele u hlayisa ripfumelo ra wena hi ku anakanyisisa hileswi u swi hlayeke.—Hlaya 1 Vatesalonika 5:21; Vaheveru 11:1, 6.

5. Xana ku tshinela eka Xikwembu swi ta ku vuyerisa njhani?

Yehovha u khathalela lava n’wi rhandzaka. U va sirhelela eka xin’wana ni xin’wana lexi nga vekaka ripfumelo ra vona ekhombyeni ni ntshembo lowu va nga na wona wa vutomi lebyi nga heriki. (Pisalema 91:1, 2, 7-10) U hi lemukisa hi tindlela ta vutomi leti nga xungetaka rihanyo ra hina ni ntsako wa hina. Yehovha u hi dyondzisa ndlela leyinene ya vutomi.—Hlaya Pisalema 73:27, 28; Yakobo 4:4, 8.

Leswaku u kuma rungula leri engetelekeke, vona ndzima 17 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.