KUCACISWA IIVESI ZEBHAYIBHILE
Genesis 1:1—“Ekuqaleni uThixo wadala amazulu nomhlaba”
“Ekuqaleni uThixo wadala amazulu nomhlaba.”—Genesis 1:1, INguqulelo Yehlabathi Elitsha.
“Ekuqaleni uThixo wadala izulu nomhlaba.”—Genesis 1:1, IBhayibhile yesiXhosa yowe-1996.
Oko Kuthethwa YiGenesis 1:1
Le vesi yokuqala yeBhayihile ichaza iinyaniso ezimbini ezibalulekileyo. Okokuqala, ‘amazulu nomhlaba’ ayenesiqalo. Okwesibini, ayedalwe nguThixo.—ISityhilelo 4:11.
IBhayibhile ayitsho ukuba uThixo wawadala nini amazulu nomhlaba ibe ingatsho nokuba wawadala njani. Kodwa xa icacisa, ithi wawadala amazulu nomhlaba “ngenxa yobukhulu namandla akhe amangalisayo.”—Isaya 40:26.
Igama elithi “wadala” liguqulelwe kwisenzi sesiHebhere esichaza into eyenziwa nguThixo yedwa. a IBhayibhile ithi nguYehova b uThixo kuphela onguMdali.—Isaya 42:5; 45:18.
Umongo weGenesis 1:1
Le vesi yokuqala yeBhayibhile ekwincwadi yeGenesis itshayelela ingxelo engendalo efumaneka kwisahluko 1 no-2 kule ncwadi. Ukususela kwiGenesis 1:1 ukuya kwiGenesis 2:4 iBhayibhile ishwankathela izinto awazenzayo uThixo xa wayedala. Ezo zinto ziquka indoda nomfazi wokuqala ize emva koko ichaze iinkcukacha ezingakumbi zokudalwa kwendoda nomfazi.—Genesis 2:7-25.
IGenesis ithi uThixo wathatha ‘iintsuku’ ezintandathu xa wayedala. Ezi ayizontsuku zokoqobo zeeyure eziyi-24. Kaloku igama elithi ‘usuku’ linokuthatha ixesha elingaphezu kweeyure eziyi 24 ezibakho ngosuku. Le nto siyibona kwiGenesis 2:4 xa usuku lusetyenziswa njengesithethantonye ‘nexesha’ kuze kushwankathelwe umsebenzi kaThixo wokudala ngokuthi uThixo wawenza lo msebenzi ‘ngosuku’ olunye.
Ubuxoki Obuthethwa NgeGenesis 1:1
Ubuxoki: Abantu abaninzi bakholelwa ukuba uThixo wadala umhlaba kwiminyaka embalwa eyadlulayo.
Inyaniso: IBhayibhile ayichazi ukuba kwadalwa nini. Into ethethwayo kwiGenesis 1:1 ayiphikisani noososayensi abathi kwadalwa kwiibhiliyoni zeminyaka eyadlulayo. c
Ubuxoki: IGenesis 1:1 ibonisa ukuba uThixo unguBathathu emnye ngenxa yokuba igama lesiHebhere elithi “Thixo” lisetyenziswe njengesininzi.
Inyaniso: Igama elithi “Thixo” liguqulela igama lesiHebhere elingu-Elohim, gama elo likwisininzi ukuze libonise ubukhulu hayi inani labantu. I-The New Catholic Encyclopedia iyavuma ukuba u-Elohim okwisininzi osetyenziswe kwiGenesis 1:1 “usoloko ethetha ngomntu omnye, uyafana nentetho esetyenziswa ngabantu bakwarhulumente xa besithi “thina” kodwa bebhekisela kwigunya labo hayi kuba bebaninzi.”—Second Edition, Umqulu 6, iphepha 272.
Funda iGenesis isahluko 1 kuquka nemibhalo esemazantsi.
a Xa ithetha ngeli gama iHCSB Study Bible ithi: “Igama lesiHebhere elithi bara elithetha ukudala, alikhe lichaze into eyenziwa ngumntu. Ngoko u-bara uthetha ngomsebenzi owenziwa nguThixo yedwa.” —Iphepha 7
b UYehova ligama likaThixo.—INdumiso 83:18.
c Xa ithetha ngegama lesiHebhere eliguqulelwe ngokuthi “ekuqaleni” i-The Expositor’s Bible Commentary ithi: “Igama eliguqulelwe ngokuthi ekuqaleni alicacisi ukuba lalilide kangakanani elo xesha.”—Revised Edition, Umqulu 1, iphepha 51.
Mhlawumbi Ungayithanda Nale
IMIBUZO YEBHAYIBHILE IYAPHENDULWA
UThixo Waqala Nini Ukudala Iinkwenkwezi Neeplanethi?
Impendulo ikwindlela igama elisetyenziswa ngayo igama elithi “ekuqaleni” nelithi “iMini” kwiGenesis.
UVUKANI!
Yintoni Efundiswa YiBhayibhile Ngokuphathelele Indalo?
IBhayibhile ikwachaza ‘iintsuku’ ezintandathu zokudalwa. Ngaba ezi ntsuku zazineeyure eziyi-24?
IMIBUZO YEBHAYIBHILE IYAPHENDULWA
Ngaba UThixo Wenza Izinto Ezahlukahlukeneyo Eziphilayo Zazivelela?
Akukho nto eBhayibhileni ebonisa ukuba ayivumelani noososayensi abathi uhlobo lwento ephilayo lunako ukuvelisa izinto ezahlukeneyo zohlobo olunye.
IIVIDIYO ZEBHAYIBHILE
Ngaba Umhlaba Wadalwa?
Into ethethwa yiBhayibhile ngendalo idla ngokungaqondwa kakuhle okanye kuthiwe bubuxoki. Ngaba singayithemba into ethethwa yiBhayibhile ngendlela owaqala ngayo umhlaba?
IZINTO EZIFUNDISWA YIBHAYIBHILE
Izixhobo Zokufunda IBhayibhile
Khetha izixhobo zokufunda iBhayibhile kunye nezinto ezenza kube mnandi ukuyifunda.
