“KIVUVU KELE . . . MFUNU MINGI SAMBU NA LUZINGU NA BETO YA KIMPEVE. Mpi yo kele nkisi ya kuluta mbote sambu na kununga mawi ya kudiwa kukonda lusadisu, ya kudivandila, mpi ya kuwa boma.”—Hope in the Age of Anxiety.

Biblia ke tubilaka mpusa na beto ya kuvanda ti kivuvu, yo ke kebisaka beto mpi na yina me tala kivuvu ya luvunu. Nkunga 146:3 ke tuba nde: “Beno tula ve ntima na bamfumu to na mwana ya muntu, yina lenda gulusa ve.” Na kisika ya kutula ntima na ngolo ya bantu sambu bo gulusa beto, beto fwete tula ntima na Ngangi na beto, yina kele ti ngolo ya kulungisa balusilu na yandi yonso. Inki yandi me silaka beto? Tadila mambu yai:

MAMBI TA SUKA; NA NIMA BANTU YA MBOTE TA VANDA NA NGEMBA YA KUKONDA NSUKA: Nkunga 37:10, 11 ke tuba nde: “Kubika kaka fioti, mpi bantu ya mbi ta vanda diaka ve . . . Kansi bantu ya kudikulumusa ta baka ntoto, mpi bo ta wa kiese mingi kibeni na ngemba ya mingi.” Verse 29 ke yika nde “bantu ya lunungu . . . ta zinga kimakulu” na ntoto.

BITUMBA TA SUKA: Biblia ke tuba nde: “Yehowa . . . ke sukisa bitumba na ntoto ya mvimba. Yandi ke buka munduki ya tolo-tolo mpi dikonga; yandi ke yoka bapusu-pusu ya basoda na tiya.”—Nkunga 46:8, 9.

MALADI, BAMPASI, MPI LUFWA TA VANDA DIAKA VE: Biblia ke tuba nde: “Tenta ya Nzambi kele ti bantu . . . Yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve.”—Kusonga 21:3, 4.

MADIA TA VANDA MINGI SAMBU NA BANTU YONSO: Biblia ke tuba nde: “Mbuma ta vanda mingi kibeni na ntoto; yo ta fuluka na nsongi ya bangumba.”—Nkunga 72:16.

LUYALU MOSI YA MBOTE TA TWADISA NTOTO—KIMFUMU YA KRISTU: Biblia ke tuba nde: “Bo pesaka [Yezu Kristu] luyalu, lukumu, mpi kimfumu, sambu bantu, makanda mpi bandinga, bo yonso kusadila yandi. Luyalu na yandi kele luyalu ya mvula na mvula yina ta luta ve, mpi bo ta fwa ve kimfumu na yandi.”—Daniele 7:14.

Inki ke ndimisa beto nde balusilu yai ta lungana? Ntangu Yezu vandaka na ntoto, yandi monisaka nde yandi vandaka Ntotila yina bo ponaka. Yandi belulaka bantu ya kubela, disaka bansukami, mpi yandi tedimisaka bafwa. Malongi na yandi vandaka kima ya kuluta mfunu sambu yo ke tubila minsiku yina ta sadisa bantu na kuzinga na bumosi mpi na ngemba mvula na mvula. Diaka, Yezu tubilaka mambu yina ta salama na bilumbu ke kwisa, mu mbandu mambu yina ta monisa nde nsi-ntoto yai me kuma na bilumbu ya nsuka.

Yezu tubaka nde ngemba mpi lutaninu ta vanda ve na bilumbu ya nsuka! Kidimbu na yandi ya “nsukilu ya ngidika ya bima” ke tubila mpi bitumba, nzala, maladi, mpi kunikana ya ntoto na ntoto ya mvimba. (Matayo 24:3, 7; Luka 21:10, 11; Kusonga 6:3-8) Yezu tubaka mpi nde: “Sambu kikalulu ya kufwa bansiku ta kuma mingi, zola ya bantu mingi ta mana.”—Matayo 24:12.

Kumana ya zola yai ke monana na mitindu mingi, mpi nsoniki ya nkaka ya Biblia tubilaka yo pwelele. 2 Timoteo 3:1-5 ke tuba nde na “bilumbu ya nsuka,” bantu ta kudizolaka, bo ta zolaka mbongo mpi biese. Bo ta vanda bantu ya lulendo mpi ya nku. Bantu ya mabuta ta zolanaka ve, mpi bana ta lemfukaka ve na bibuti. Mambu ya luvunu ya mabundu ta salama bisika yonso.

Bampasi yai ke ndimisa nde nsi-ntoto yai me kuma na bilumbu ya nsuka. Yo ke ndimisa mpi nde kubika fioti Kimfumu ya Nzambi ta nata ngemba. Ya kieleka, Yezu tubilaka mambu yai ya ke pesa kikesa na mbikudulu na yandi ya ke tubila bilumbu ya nsuka: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.”—Matayo 24:14.

Nsangu yai ya mbote ke pesa lukebisu na bantu ya mbi mpi kivuvu na bantu ya mbote, yo ke ndimisa bantu ya mbote nde kubika fioti balusakumunu yina Nzambi me silaka ta lungana. Keti nge ta zola kuzaba mambu mingi ya me tala balusakumunu yango? Kana ee, kwenda na lutiti ya nsuka ya zulunalu yai.