BANTU KE VANDAKA KIBENI TI MFUNU YA ZOLA. Ata makwela, dibuta, to kinduku mosi ve lenda toma kukonda zola. Yo yina, beto ke mona nde zola kele mfunu sambu na kuvanda ti mavimpi ya mbote mpi na kiese. Ebuna, “zola” ke tendula inki?

Zola ya bo ke tubila awa kele ve zola yina ke vandaka na kati ya bakala ti nkento, yina ke vandaka mpi mfunu. Kansi, yo kele zola ya mfunu kuluta mpi yo ke pusaka muntu na kudiyangisa na masonga yonso sambu na mambote ya bantu ya nkaka, nkutu na kutula yo na ntwala ya mambote na yandi mosi. Yo kele zola yina minsiku ya Nzambi ke twadisaka mpi yo ke vandaka tiya-tiya mpi ti mawi.

Verse mosi ke tendula mbote zola, yo ke tuba nde: “Zola kele ntima-nda mpi ntima-mbote. Zola kele na kimpala ve. Yo ke kudisikisaka ve, yo ke fulukaka ve na lulendo, yo ke salaka ve mambu ya nsoni, yo ke sosaka ve mambote na yo mosi, yo ke waka makasi ve. Yo ke bumbaka ve mbi yina bo me sala yo. Yo ke waka ve kiese sambu na kukonda lunungu, kansi yo ke waka kiese ti kieleka. Yo ke fikaka mambu yonso, . . . ke tulaka ntima na mambu yonso, ke kangaka ntima na mambu yonso. Zola ke sukaka ve.”—1 Bakorinto 13:4-8.

Zola ya mutindu yai “ke sukaka ve” ata fioti. Ya kieleka, yo lenda kuma ngolo na nima ya bantangu. Mpi yo “ke vukisaka beto na mutindu ya kukuka” sambu yo kele ntima-nda, ntima-mbote, mpi ke lolulaka. (Bakolosai 3:14) Yo yina, kinduku ya me salama na zola yai ke nataka lutaninu mpi kiese, ata bantu yango kele ya kukonda kukuka. Mu mbandu, beto tadila makwela.

Yezu Kristu longaka minsiku ya mfunu sambu na makwela. Mu mbandu, yandi tubaka nde: “‘Bakala ta bikisa tata na yandi ti mama na yandi mpi yandi ta kangama ti nkento na yandi, ebuna bo zole ta vanda nsuni mosi’ . . . Yo yina, bika nde muntu kukabula ve yina ya Nzambi me vukisaka.” (Matayo 19:5, 6) Verse yai ke tubila minsiku zole ya mfunu.

“BO ZOLE TA VANDA NSUNI MOSI.” Makwela kele kinduku ya kuluta ngolo yina bantu ke vandaka na yo, mpi zola lenda tanina yo na mambu ya kukonda kwikama, disongidila sambu bakala to nkento kukuma ve “nsuni mosi” ti muntu ya nkaka yina kele ve nkwelani na yandi. (1 Bakorinto 6:16; Baebreo 13:4) Kukonda kwikama ke salaka nde bankwelani kutudilana diaka ve ntima mpi yo lenda bebisa makwela. Kana bo kele ti bana, yo lenda sala nde bana yango kudiyangisa mingi kibeni, kumona nde bo ke zolaka bo ve, bo kele ve na lutaninu, to nkutu bo lenda wa makasi.

“YINA YA NZAMBI ME VUKISAKA.” Makwela kele mpi kima mosi ya santu. Bankwelani yina ke zitisaka diambu yai ke salaka bikesa sambu na kukumisa ngolo makwela na bo. Bo ke sosaka ve kufwa makwela ntangu bo ke kutanaka ti bampasi. Zola na bo ke vandaka ngolo kibeni. Zola yai ke “fikaka mambu yonso,” yo ke sadisaka na kununga bampasi mpi na kutanina bumosi mpi ngemba na makwela.

Kana bibuti ke zolana ngolo kibeni, yo ke natilaka bana yonso na dibuta mambote ya mingi. Jessica, leke mosi ya nkento, tubaka nde: “Bibuti na mono ke zolanaka mingi mpi ke kudimonisilaka kibeni luzitu. Ntangu mono ke monaka mama ke zitisa papa, mingi-mingi ntangu bo ke salaka yo na beto bana, yo ke pusaka mono na kulanda mbandu na yandi.”

Zola kele kikalulu ya kuluta nene ya Nzambi. Ya kieleka, Biblia ke tuba nde: “Nzambi kele zola.” (1 Yoane 4:8) Yo ke yitukisa ve sambu Biblia ke bingaka mpi Yehowa “Nzambi ya kiese.” (1 Timoteo 1:11) Beto ta vanda mpi na kiese kana beto ke sala ngolo na kulanda mbandu ya bikalulu ya Ngangi na beto, mingi-mingi zola na yandi. Baefezo 5:1, 2 ke tuba nde: “Beno landa mbandu ya Nzambi, sambu beno kele bana yina yandi ke zolaka mingi, mpi beno landa kutambula na zola.”