•  Duzu a le anyezohulolɛ?

•  Duzu ati a bie mɔ di anyezo a?

•  Esiane boni mɔ a wɔ nu a?

•  Mɔɔ ɛ tipɛnema ka la

Bie mɔ bu anyezohulolɛ kɛ ɔle adenle mɔɔ bɛdua zo bɛfa bɛ edwɛkɛ anzɛɛ bɛ nyɛleɛ bɛkile kɛ bɛkulo awie. Asoo ɔle nvonleɛ kɛ ɛbamaa awie anwu ye kɛ ɛkulo ye ɔ? Tɛ mɔɔ kile la ɛne. Bɛlɛra bie mɔɔ bɛfɛlɛ ye Ann la ka kɛ, “Saa ɛkulo kɛ ɛ nee awie tu na ɛgya ye a, yemɔ a le adenle mɔɔ ɛbalua zo wɔanwu ye kɛ ahenle anye die ɛ nwo a.”

Yɛbazuzu anyezohulolɛ mɔɔ maa awie mɔɔ ɛngulo ye la te nganeɛ kɛ ɛkulo ye la anwo wɔ edwɛkɛ ɛhye anu.

“Ngakyile wɔ debie mɔɔ ɛyɛ wɔamaa awie anwu ye kɛ ɛ nye die ɔ nwo yɛɛ mɔɔ ɛyɛ wɔamaa awie ade nganeɛ kɛ ɛkulo ye wɔ mekɛ mɔɔ ɛngulo ye la anu.”​—Deanna.

Bie mɔ da anyezohulolɛ ali amaa bɛabu bɛ. Bɛlɛra bie mɔɔ bɛfɛlɛ ye Hailey la ka kɛ, “Saa ɛyɛ debie na ɛnwu ye kɛ menli adwenle ɛra ɛ nwo zo a, ɔmaa ɛyɛ ye dɔɔnwo.

Noko saa ɛ nye fuu ɛmaa awie te nganeɛ kɛ ɛkulo ye wɔ mekɛ mɔɔ ɛngulo ye la a, ɔkile kɛ ɛndwenle ahenle nganeɛdelɛ nwo. Ɔmaa edwɛkɛ ba ɛ nwo. Baebolo ne ka kɛ: “Mɔɔ ɛnlɛ adwenle la, mgbane mgbane ɛyɛlɛ yɛ ye fɛ.”​—Mrɛlɛbulɛ 15:21.

Hailey dwulale ye edwɛkɛ ne kɛ, “Bie a anyezohulolɛ babɔ ɔ bo nwɔhoa nu, noko ɔwie anyebolo nu.”

• Anyezohulolɛ sɛkye wɔ duma kpalɛ ne.

  “Menwu awie mɔɔ di anyezo la kɛ ɔsulo debie yɛɛ ɔtɛtinle. Ɛte nganeɛ kɛ ɔlɛbɛlɛbɛla wɔ amaa yeanyia debie yeavi wɔ ɛkɛ.”​—Jeremy.

  Baebolo ne ka kɛ: “Ɛlɔlɛ . . . ɛnle angomedi.”​—1 Kɔlentema 13:4, 5.

  Dwenle ɛhye anwo: Edwɛkɛ anzɛɛ nyɛleɛ boni mɔ a bamaa wɔalie duma kɛ ɛdi anyezo a?

• Saa ɛ nee awie di anyezo a, ɛboda ye.

  “Saa menwu awie mɔɔ di anyezo la a, mengulo kɛ mebabikye ye. Ɛbaha kɛ mele raalɛ la ati a ɔkulo kɛ ɔ nee me tendɛ a. Menli mɔɔ di anyezo la ɛndwenle me nwo; mɔɔ bɛdwenle nwo la a le mɔɔ bɛyɛ a bɛ nye balie la.”​—Jaqueline.

  Baebolo ne ka kɛ: “Awie biala mmakpondɛ ɔ ngome ye boɛyɛlɛ, ɔkpondɛ awie mɔ ɛdeɛ noko.”​—1 Kɔlentema 10:24.

  Dwenle ɛhye anwo: Asoo awie ɛmaa wɔnyia adwenle kɛ ɔkulo wɔ na nzinlii ɛnwunle ye kɛ ɔnle zɔ ɔ? Saa ɔle zɔ a, kɛzi ɛdele nganeɛ ɛ? Kɛ ɔkɛyɛ na ɛdawɔ noko wɔamboda awie wɔ adenle ko ne ala azo ɛ?

• Anyezolilɛ sɛkye ɛhulolɛ kpalɛ mɔɔ kenle bie ɛbala ye ali la.

  “Awie mɔɔ di anyezo la ɛnle awie mɔɔ fɛta kɛ bɛ nee ye tu anzɛɛ bɛgya ye a. Kɛzi mebahola meanwu ye kɛ ahenle ɛlɛdi anyezo anzɛɛ ɔ nye ɛbolo ɛ?”​—Olivia.

  Edwɛndolɛnli Devidi hanle ye wɔ Baebolo ne anu kɛ: “Me nee nabalabama ɛndu.”​—Edwɛndolɛ 26:4.

  Dwenle ɛhye anwo: Nwane a anye die awie mɔɔ di anyezo la anwo a? Asoo sonla zɛhae a ɛkulo kɛ ɛfa ye agɔnwolɛ a?