Yɛn Bɔfo no nim nyansa sen yɛn. Esiane sɛ ɔyɛ Agya a ɔwɔ ɔdɔ nti, odwen yɛn ho. Afei nso, wammɔ yɛn sɛ yɛntwe yɛn ho mfi ne ho na yɛnyɛ nea yɛpɛ. (Yeremia 10:23) Enti sɛnea abofra kumaa hia n’awofo akwankyerɛ no, saa ara na yɛn nyinaa hia Onyankopɔn akwankyerɛ. (Yesaia 48:17, 18) Bible nnyinasosɛm ma yenya akwankyerɛ, na ɛyɛ akyɛde a efi Onyankopɔn hɔ.​—Kenkan 2 Timoteo 3:16.

Yehowa mmara ne ne nnyinasosɛm kyerɛ yɛn ɔkwan a eye sen biara a ɛsɛ sɛ yɛfa so bɔ yɛn bra nnɛ, na ɛma yehu nea yɛyɛ a ɛbɛma yɛanya nhyira a enni awiei daakye. Esiane sɛ Onyankopɔn na ɔbɔɔ yɛn nti, ɛfata sɛ yegye n’akwankyerɛ tom na yɛkyerɛ ho anisɔ.​—Kenkan Dwom 19:7, 11; Adiyisɛm 4:11.

Bible nnyinasosɛm yɛ nokwasɛm ahorow a ɛnsesa. Nanso, mmara de, wotumi hyɛ fa nneɛma pɔtee bi ho. (Deuteronomium 22:8) Ɛsɛ sɛ yɛde adwempa di dwuma na ama yɛahu ɔkwan a yɛbɛfa so de nnyinasosɛm bi adi tebea pɔtee bi ho dwuma. (Mmebusɛm 2:10-12) Sɛ nhwɛso no, Bible ma yehu sɛ nkwa yɛ akyɛde a efi Onyankopɔn hɔ. Saa nnyinasosɛm titiriw yi betumi aboa yɛn wɔ adwumam, ofie, ne bere a yɛretu kwan. Ɛboa yɛn ma yɛyɛ ahwɛyiye.​—Kenkan Asomafo Nnwuma 17:28.

Yesu kaa nnyinasosɛm abien a ɛho hia paa ho asɛm. Nea edi kan no ma yehu nea enti paa a  nnipa te ase; ɛne sɛ yebehu Onyankopɔn, yɛbɛdɔ no, na yɛasom no nokware mu. Ɛsɛ sɛ yesusuw nnyinasosɛm a edi kan yi ho wɔ gyinae biara a yesi mu. (Mmebusɛm 3:6) Onyankopɔn fa wɔn a wɔde nnyinasosɛm yi bɔ wɔn bra no nnamfo, wɔn ani gye ankasa, na wobenya daa nkwa.​—Kenkan Mateo 22:36-38.

Nnyinasosɛm a ɛto so abien no betumi aboa yɛn ma yɛne afoforo atena asomdwoe mu. (1 Korintofo 13:4-7) Ɛno a yɛde bedi dwuma no hwehwɛ sɛ yesuasua sɛnea Onyankopɔn ne afoforo di no.​—Kenkan Mateo 7:12; 22:39, 40.

Bible nnyinasosɛm boa mmusua ma wohu sɛnea wɔbɛbom atena wɔ ɔdɔ mu. (Kolosefo 3:12-14) Nnyinasosɛm foforo wɔ Onyankopɔn Asɛm no mu a ɛbɔ mmusua ho ban, ɛne sɛ ɛsɛ sɛ aware yɛ ade a ɛtena hɔ daa.​—Kenkan Genesis 2:24.

Sɛ yɛde Bible nnyinasosɛm bɔ yɛn bra a, ebetumi abɔ yɛn ho ban wɔ honam fam na ama yɛn koma atɔ yɛn yam. Sɛ nhwɛso no, adwumawuranom ani taa gye adwumayɛfo a Bible nnyinasosɛm a wɔde bɔ wɔn bra nti wodi nokware na wɔyɛ adwumaden no ho. (Mmebusɛm 10:4, 26; Hebrifo 13:18) Onyankopɔn Asɛm no san kyerɛkyerɛ yɛn sɛ ɛsɛ sɛ yɛma yɛn ani sɔ nneɛma a yehia ankasa ne yɛne Onyankopɔn adamfofa mmom sen honam fam nneɛma.​—Kenkan Mateo 6:24, 25, 33; 1 Timoteo 6:8-10.

Sɛ yɛde Bible nnyinasosɛm bɔ yɛn bra a, ebetumi abɔ yɛn ho ban ma yɛanya apɔwmuden. (Mmebusɛm 14:30; 22:24, 25) Sɛ nhwɛso no, Onyankopɔn mmara a ɛkasa tia asabow a yedi so no bɔ yɛn ho ban fi owuyare ne akwanhyia ahorow ho. (Mmebusɛm 23:20) Yehowa nkasa ntia asanom, nanso ɔmpɛ sɛ yɛnom tra so. (Dwom 104:15; 1 Korintofo 6:10) Onyankopɔn nnyinasosɛm boa yɛn ma yɛhwɛ yɛn nneyɛe ne yɛn nsusuwii yiye. (Dwom 119:97-100) Nanso, ɛnyɛ mfaso a nokware Kristofo benya nkutoo nti na wɔde Onyankopɔn gyinapɛn bɔ wɔn bra. Wɔyɛ saa de hyɛ Yehowa anuonyam.​—Kenkan Mateo 5:14-16.