کیا آپ کا کوئی عزیز موت کی وجہ سے آپ سے بچھڑ گیا ہے؟ اُس وقت شاید آپ کے ذہن میں یہ سوال آئے ہوں:‏ ”‏جب اِنسان مرتا ہے تو اُس کے ساتھ کیا ہوتا ہے؟ کیا ہم دوبارہ کبھی اپنے اُن عزیزوں سے مل پائیں گے جو فوت ہو گئے ہیں؟“‏ اِس سبق میں اور اگلے سبق میں بائبل سے اِن سوالوں کے جواب حاصل کر کے آپ کو بڑی تسلی ملے گی۔‏

1.‏ جب اِنسان مرتا ہے تو اُس کے ساتھ کیا ہوتا ہے؟‏

یسوع مسیح نے ظاہر کِیا کہ موت گہری نیند کی طرح ہے۔ جو شخص گہری نیند میں ہوتا ہے، اُسے اِس بات کی خبر نہیں ہوتی کہ اُس کے اِردگِرد کیا ہو رہا ہے۔ موت نیند کی طرح کیسے ہے؟ جب ایک شخص مر جاتا ہے تو اُسے کسی قسم کی تکلیف نہیں ہوتی۔ اُسے اپنے دوستوں اور گھر والوں کی یاد نہیں ستاتی پھر چاہے وہ اُن سے جتنا بھی پیار کرتا ہو۔ بائبل میں اِس کی وجہ یہ بتائی گئی ہے کہ ‏”‏مُردے کچھ بھی نہیں جانتے۔“‏‏—‏واعظ 9:‏5 کو پڑھیں۔‏

2.‏ موت کے بارے میں سچائی جاننے سے ہمیں کیا فائدہ ہوتا ہے؟‏

بہت سے لوگ موت سے یہاں تک کہ مُردوں سے بھی ڈرتے ہیں۔ لیکن آپ کو بائبل سے موت کے بارے میں سچائی جان کر تسلی ملے گی۔ یسوع مسیح نے کہا:‏ ‏”‏سچائی آپ کو آزاد کر دے گی۔“‏ (‏یوحنا 8:‏32‏)‏ کچھ مذاہب میں یہ سکھایا جاتا ہے کہ اِنسان کے اندر کوئی شے ہوتی ہے جو اُس کے مرنے کے بعد زندہ رہتی ہے۔ لیکن بائبل میں یہ تعلیم نہیں دی گئی۔ اِس لیے مرنے کے بعد کوئی بھی شخص تکلیف نہیں اُٹھاتا۔ اِس کے علاوہ مُردے ہمیں نقصان نہیں پہنچا سکتے کیونکہ وہ کچھ بھی نہیں جانتے۔ اِس لیے ہمیں نہ تو مُردوں کو خوش کرنے کی ضرورت ہے، نہ اُن کی عبادت کرنے کی ضرورت ہے اور نہ ہی اُن کے لیے دُعائیں کرنے کی ضرورت ہے۔‏

کچھ لوگ کہتے ہیں کہ وہ مُردوں سے رابطہ کر سکتے ہیں۔ لیکن ایسا ممکن نہیں ہے کیونکہ ہم نے سیکھا ہے کہ ”‏مُردے کچھ بھی نہیں جانتے۔“‏ جن لوگوں کو لگتا ہے کہ وہ اپنے اُن عزیزوں سے بات کر رہے ہیں جو فوت ہو چُکے ہیں، وہ اصل میں بُرے فرشتوں سے بات کر رہے ہوتے ہیں۔ دراصل بُرے فرشتے اُن لوگوں پر یہ ظاہر کرتے ہیں کہ وہ اُن کے فوت ہو جانے والے عزیز ہیں۔ اِس لیے اگر ہم مُردوں کے بارے میں سچائی جان جاتے ہیں تو ہم بُرے فرشتوں سے بچ سکتے ہیں۔ یہوواہ خدا ہمیں خبردار کرتا ہے کہ ہم مُردوں سے رابطہ کرنے کی کوشش نہ کریں کیونکہ وہ جانتا ہے کہ ایسا کرنے سے ہم بُرے فرشتوں سے بات کر رہے ہوں گے اور اِس سے ہمیں نقصان ہوگا۔—‏اِستثنا 18:‏10-‏12 کو فٹ‌نوٹ سے پڑھیں۔‏ a

3.‏ مُردوں کی حالت کے بارے میں سچائی جانیں

دُنیا بھر میں لوگوں کے اِس بارے میں فرق فرق نظریات ہیں کہ مرنے کے بعد اِنسان کے ساتھ کیا ہوتا ہے۔ ظاہری بات ہے کہ یہ سارے نظریات صحیح نہیں ہو سکتے۔‏

• آپ کے علاقے میں لوگ مُردوں کے بارے میں کیا مانتے ہیں؟‏

 4.‏ موت کے بارے میں سچائی جاننے سے ہمیں فائدہ ہوتا ہے

جب ہم موت کے بارے میں سچائی جان جاتے ہیں تو ہم مُردوں کے خوف سے آزاد ہو جاتے ہیں۔ واعظ 9:‏10 کو پڑھیں اور پھر اِس سوال پر بات‌چیت کریں:‏

• کیا مُردے ہمیں نقصان پہنچا سکتے ہیں؟‏

جب ہم بائبل سے موت کے بارے میں سچائی جان جاتے ہیں تو ہم یہ سمجھ جاتے ہیں کہ ہمیں مُردوں کو خوش کرنے یا اُن کی عبادت کرنے کی ضرورت نہیں ہے۔ یسعیاہ 8:‏19 اور مکاشفہ 4:‏11 کو پڑھیں اور پھر اِس سوال پر بات‌چیت کریں:‏

• آپ کے خیال میں جب کوئی شخص مُردوں کی عبادت کرتا ہے یا اُن کی مدد لینے کی کوشش کرتا ہے تو یہوواہ کو کیسا لگتا ہے؟‏

5.‏ موت کے بارے میں سچائی جاننے سے ہمیں تسلی ملتی ہے

بہت سے لوگوں کو سکھایا جاتا ہے کہ مرنے کے بعد اُنہیں اُن کے گُناہوں کی سزا ملے گی۔ لیکن ہمیں یہ جان کر بڑی تسلی ملتی ہے کہ مرنے کے بعد کسی کو بھی اذیت نہیں دی جاتی، اُن لوگوں کو بھی نہیں جنہوں نے بہت بُرے کام کیے ہوتے ہیں۔ رومیوں 6:‏7 کو پڑھیں اور پھر اِس سوال پر بات‌چیت کریں:‏

• بائبل میں لکھا ہے کہ جو شخص مر جاتا ہے، اُس کا گُناہ معاف ہو جاتا ہے۔ تو پھر کیا اُن لوگوں کو اُن کے گُناہوں کی سزا مل رہی ہے جو مر چُکے ہیں؟‏

جتنا زیادہ ہم یہوواہ خدا کو قریب سے جانتے ہیں اُتنی اچھی طرح ہم سمجھ جاتے ہیں کہ وہ کبھی بھی مُردوں کو اذیت نہیں دیتا۔ اِستثنا 32:‏4 اور 1-‏یوحنا 4:‏8 کو پڑھیں اور پھر اِن سوالوں پر بات‌چیت کریں:‏

• اِن آیتوں میں خدا کی فرق فرق خوبیوں کا ذکر کِیا گیا ہے۔ اگر خدا میں یہ خوبیاں ہیں تو کیا وہ چاہے گا کہ اُن لوگوں کو تڑپایا جائے جو مر چُکے ہیں؟‏

• کیا آپ کو موت کے بارے میں سچائی جان کر تسلی ملتی ہے؟ آپ نے جو جواب دیا ہے، اُس کی کیا وجہ ہے؟‏

 خلاصہ

جب ایک شخص مر جاتا ہے تو اُس کی زندگی ختم ہو جاتی ہے۔ مُردوں کو اذیت نہیں پہنچائی جاتی اور وہ اُن لوگوں کو نقصان نہیں پہنچا سکتے جو زندہ ہیں۔‏

دُہرائی

• جب ایک شخص مر جاتا ہے تو اُس کے ساتھ کیا ہوتا ہے؟‏

• موت کے بارے میں سچائی جاننے سے ہمیں کیا فائدہ ہوتا ہے؟‏

• موت کے بارے میں سچائی جاننے سے ہمیں تسلی کیسے ملتی ہے؟‏