“Киелі кітапты қалай оқу керектігін білмесең, ол саған қызықсыз болып көрінуі мүмкін” (Уилл, 18 жаста).

Киелі кітапты қызықты қылып оқудың сырын білгің келе ме? Бұл мақаладағы кеңестер саған пайдасын тигізеді.

•  Жазбаларға жан бітір

•  Ізденіс жүргіз!

•  Құрдастарыңның ой-пікірі

Оқып жатқандарыңды елестет. Бұл үшін былай істесең болады:

1. Киелі кітаптан бір үзіндіні таңдап ал. Өзіңе қызықтысын таңда. Бұл үшін Киелі кітаптағы бір оқиғаны немесе Исаның қызметі жайлы Ізгі хабарлардан бір үзіндіні оқысаң болады. Я болмаса jw.org сайтындағы “Киелі кітапты көркемдеп оқу” санатындағы аудиожазбалардың біреуін тыңда.

2. Енді үзіндіні оқып шық. Таңдап алған оқиғаны бір өзің немесе достарыңмен я отбасыңмен бірге дауыстап оқығаның жақсы. Бір адам автордың сөзін оқыса, басқалары сондағы кейіпкерлердің сөздерін бөліп оқи алады.

3. Келесі әдістердің біреуін не бірнешеуін қолдан:

   • Оқиғаны қағаз бетіне түсіріп, сурет салып көр. Я болмаса оқиғаның ағымын көру үшін бірнеше қарапайым суреттер салсаң болады. Әрбір суреттің қасына онда не болып жатқанын жазып қой.

   • Сызба жаса. Мысалы, адал кейіпкер туралы оқығанда, оның жақсы қасиеттері мен істерін ие болған баталарымен байланысын сызып көрсетсең болады.

   • Оқиғаны жаңалықтар сияқты айтып жеткіз. Жағдайды жан-жағынан ашып беруге тырыс. Басты кейіпкерлер мен куәгерлерден сұхбат алсаң болады.

   • Егер оқиғадағы кейіпкерлердің бірі ақылсыз әрекет жасап қойған болса, жағдай басқаша орын алғанда, не болуы мүмкін екенін елестетіп көр. Мысалы, Петірдің Исадан танған жерін қарастырып көр (Марқа 14:66—72). Петір сол жағдайда қалай дұрыс әрекет ете алар еді?

   • Егер қиын болмаса, Киелі кітаптың бір үзіндісіне сүйеніп, драма жазсаң болады. Содан қандай сабақ алуға болатынын да жазуды ұмытпа (Римдіктерге 15:4).

Егер сен оқиғаның ұсақ-түйек жеріне назар аударсаң, ондағы жасырын асыл тастарды таба аласың. Кейде Киелі кітаптағы бір-екі сөздің астарында үлкен мағына жатады.

Мысалы, Матай 28:7-ні Марқа 16:7-мен салыстырып көр.

•   Неге Марқа өзінің кітабында Исаның шәкірттерімен қоса “Петірге” де көрінетінін айтқан?

• Көмек: Марқа сол жағдайларды өз көзімен көрмеген; бұл туралы ол Петірден естісе керек.

• Жасырын асыл тас: Иса өзін қайтадан көргісі келетінін естігенде, неге Петір жұбанды деуге болады? (Марқа 14:66—72). Петірдің нағыз досы екенін Иса қалай дәлелдеді? Сен қалай Исаға еліктеп, өзгелерге нағыз дос бола аласың?

Жазбаларға жан бітірер болсаң және ұсақ-түйек мәліметтерге назар аударсаң, оны оқу әлдеқайда қызықты болады!