യുവജനങ്ങൾ ചോദിക്കുന്നു
എനിക്ക് ലൈംഗികമായ അതിക്രമം എങ്ങനെ ചെറുക്കാനാകും?
എന്താണ് ലൈംഗികമായ അതിക്രമം?
അനുചിതമായ ലൈംഗികച്ചുവയോടെയുള്ള ഏതൊരു പെരുമാറ്റവും—അനുചിതമായി തൊടുന്നതും, ലൈംഗികച്ചുവയുള്ള സംഭാഷണം നടത്തുന്നതും ലൈംഗികാതിക്രമത്തിൽ ഉൾപ്പെടുന്നു. എന്നാൽ ഇത് കളിയാക്കലാണോ ശൃംഗരിക്കലാണോ അതോ ലൈംഗികമായ അതിക്രമമാണോ എന്ന് തീരുമാനിക്കാൻ ബുദ്ധിമുട്ടുള്ള സാഹചര്യങ്ങൾ ഉണ്ടായേക്കാം.
ഇവ തമ്മിലുള്ള വ്യത്യാസം നിങ്ങൾക്ക് അറിയാമോ? ലൈംഗികമായ അതിക്രമമാണോ എന്നു കണ്ടുപിടിക്കാനുള്ള ഒരു ക്വിസ്സിൽ പങ്കെടുത്ത് നമുക്ക് ഉത്തരം കണ്ടെത്താം!
സ്കൂൾ പഠനം പൂർത്തിയാകുന്നതോടെ ലൈംഗികമായ അതിക്രമങ്ങളിൽനിന്ന് ഒഴിവുള്ളവരായി എന്ന് ചിന്തിക്കാനാകില്ല. എന്നാൽ ഈ പ്രായത്തിൽത്തന്നെ അതിനെ ചെറുക്കാനുള്ള ആത്മവിശ്വാസവും പ്രാപ്തികളും നേടിയെടുക്കുന്നെങ്കിൽ മുതിർന്നുകഴിയുമ്പോഴോ ജോലിസ്ഥലത്തോ ഈ പ്രശ്നത്തെ കൈകാര്യം ചെയ്യാൻ നിങ്ങൾ തയ്യാറായിരിക്കും. ഒരുപക്ഷേ മറ്റൊരാളെ ഇരയാക്കുന്നതിൽനിന്ന് അതിക്രമക്കാരനെ തടയാൻപോലും നിങ്ങൾക്കു കഴിഞ്ഞേക്കാം!
ലൈംഗികമായ അതിക്രമത്തിന് ഇരയായാൽ എനിക്ക് എന്ത് ചെയ്യാനാകും?
ലൈംഗിക അതിക്രമം എന്താണെന്നും അതിനോട് എങ്ങനെ പ്രതികരിക്കണം എന്നും അറിയാമെങ്കിൽ നിങ്ങൾക്ക് അതിനെ തടയാൻ കഴിയും. മൂന്ന് സന്ദർഭങ്ങളെക്കുറിച്ചും അതിനോട് പ്രതികരിക്കാവുന്ന വിധത്തെക്കുറിച്ചും നോക്കാം.
സാഹചര്യം:
“ജോലിസ്ഥലത്ത് ആയിരിക്കുമ്പോൾ എന്നെക്കാൾ പ്രായം കൂടിയ ആളുകൾ ഞാനൊരു സുന്ദരിയാണെന്നും അവർക്ക് ഇപ്പോൾ 30 വയസ്സ് കുറവായിരുന്നെങ്കിൽ എത്ര നന്നായിരുന്നു എന്നും പതിവായി പറയുമായിരുന്നു. അതിൽ ഒരാൾ എന്റെ പുറകെ വന്ന് എന്റെ മുടി മണത്തുപോലും നോക്കിയിട്ടുണ്ട്” എന്ന് 20 വയസ്സുള്ള തബീഥ പറയുന്നു.
തബീഥ ഇങ്ങനെ ചിന്തിച്ചേക്കാം: ‘ഞാൻ അത് അവഗണിക്കുകയോ സഹിച്ചുനിൽക്കുകയോ ചെയ്താൽ അയാൾ അതു നിറുത്തിയേക്കും.’
ആ ചിന്ത ശരിയല്ലാത്തത് എന്തുകൊണ്ട്? ലൈംഗികമായ അതിക്രമങ്ങൾക്ക് ഇരയാകുന്നവർ അത് അവഗണിച്ചാൽ പലപ്പോഴും അത് തുടരുകയോ വർധിക്കുകയോ ചെയ്യും എന്നാണ് വിദഗ്ധരുടെ അഭിപ്രായം.
ഇങ്ങനെ ചെയ്തുനോക്കൂ: അയാളുടെ സംഭാഷണവും പെരുമാറ്റവും നിങ്ങൾ ഒരുതരത്തിലും അംഗീകരിക്കുന്നില്ലെന്ന് ശാന്തമായി എന്നാൽ വ്യക്തമായി പറയുക. “ആരെങ്കിലും എന്നെ അരുതാത്തവിധം സ്പർശിച്ചാൽ മേലാൽ എന്നെ തൊടരുത് എന്നു പറയുമ്പോൾത്തന്നെ അയാൾ പിൻമാറിയേക്കും” എന്ന് 20 വയസ്സുള്ള ടാറിൻ പറയുന്നു. എന്നാൽ ചിലർ അവിടംകൊണ്ടും നിറുത്തുന്നില്ലെങ്കിൽ പറഞ്ഞകാര്യത്തിൽ ഉറച്ചുനിൽക്കുക, വിട്ടുവീഴ്ച ചെയ്യാതിരിക്കുക. ഉയർന്ന ധാർമികനിലവാരത്തോടു ബന്ധപ്പെട്ട കാര്യങ്ങൾ വരുമ്പോൾ ‘പക്വതയോടെയും ഉത്തമ ബോധ്യത്തോടെയും’ പ്രവർത്തിക്കാനാണ് ബൈബിൾ ആവശ്യപ്പെടുന്നത്.—കൊലോസ്യർ 4:12 ഓശാന ബൈബിൾ.
എന്നാൽ അനുസരിച്ചില്ലെങ്കിൽ ഉപദ്രവിക്കുമെന്ന് അയാൾ പറയുന്നെങ്കിലോ? അതാണ് സാഹചര്യമെങ്കിൽ അയാളെ എതിർക്കുന്നതിനു പകരം എത്രയും പെട്ടെന്ന് അവിടെനിന്ന് രക്ഷപ്പെടുക, ആശ്രയിക്കാൻ കൊള്ളാവുന്ന മുതിർന്ന വ്യക്തിയുടെ സഹായം തേടുക.
സാഹചര്യം:
“ഞാൻ ആറാം ക്ലാസിൽ പഠിക്കുമ്പോൾ രണ്ട് പെൺകുട്ടികൾ സ്കൂളിന്റെ ഇടനാഴിയിൽവെച്ച് എന്നെ പിടികൂടി. അതിൽ ഒരാൾ ഒരു സ്വവർഗാനുരാഗിയായിരുന്നു. അവളോടൊപ്പം കറങ്ങിനടക്കാൻ എന്നോട് ആവശ്യപ്പെട്ടു. അതിനു പറ്റില്ല എന്നു ഞാൻ പറഞ്ഞെങ്കിലും ക്ലാസ്സിന്റെ ഇടവേളകളിൽ അവർ പതിവായി ശല്യം ചെയ്യാൻ തുടങ്ങി. ഒരിക്കൽ അവർ എന്നെ ചുമരോട് ചേർത്തുനിറുത്തുകപോലും ചെയ്തു.”—വിക്ടോറിയ, 18.
വിക്ടോറിയ ഇങ്ങനെ ചിന്തിച്ചിട്ടുണ്ടാകാം: ‘ഇക്കാര്യത്തെക്കുറിച്ച് ഞാൻ ആരോടെങ്കിലും പറഞ്ഞാൽ ഞാനൊരു ഭീരുവാണെന്നു അവർ ചിന്തിച്ചേക്കാം. ഒരുപക്ഷേ ആരും ഇത് വിശ്വസിച്ചില്ലെന്നും വന്നേക്കാം.’
ആ ചിന്ത ശരിയല്ലാത്തത് എന്തുകൊണ്ട്? നിങ്ങൾ അത് മറ്റാരോടെങ്കിലും പറയുന്നില്ലെങ്കിൽ അയാൾ ലൈംഗിക അതിക്രമം തുടർന്നേക്കാം. മാത്രമല്ല, മറ്റു പലരോടും അയാൾ ഇത് ആവർത്തിച്ചേക്കാം.—സഭാപ്രസംഗകൻ 8:11.
ഇങ്ങനെ ചെയ്തുനോക്കൂ: സഹായം സ്വീകരിക്കുക. അതിക്രമക്കാരനെ നേരിടാനുള്ള സഹായം മാതാപിതാക്കൾക്കും ടീച്ചർമാർക്കും നൽകാനാകും. എന്നാൽ നിങ്ങൾ പറയുന്നത് അവർ ഗൗരവമായി എടുക്കുന്നില്ലെങ്കിലോ? അതിനൊരു വഴിയുണ്ട്: ഓരോ തവണയും അയാൾ ശല്യം ചെയ്തതിന്റെ വിശദാംശങ്ങൾ എഴുതിവെക്കുക. അതിന്റെ സമയം, തീയതി ഓരോ തവണയും സംഭവം നടന്ന സ്ഥലം, അയാൾ പറഞ്ഞ കാര്യങ്ങൾ എന്നിവ. എന്നിട്ട് ഇതിന്റെ ഒരു കോപ്പി മാതാപിതാക്കൾക്കോ ടീച്ചർക്കോ കൊടുക്കുക. വാമൊഴിയായി പറയുന്ന ഒരു പരാതിയെക്കാൾ എഴുതിക്കൊടുക്കുന്ന പരാതിക്ക് ആളുകൾ കൂടുതൽ ഗൗരവം കൊടുക്കാറുണ്ട്.
സാഹചര്യം:
“റഗ്ബി ടീമിലെ കളിക്കാരനായിരുന്ന ആ കുട്ടിയെ എനിക്ക് വല്ലാത്ത പേടിയായിരുന്നു. അവന് 6 അടി 5 ഇഞ്ചോളം ഉയരവും 135 കിലോ ഭാരവുമുണ്ട്! ഏതുവിധേനയും ഞാനുമായി ലൈംഗികമായി ബന്ധപ്പെടണമെന്ന് അവൻ നിശ്ചയിച്ചിരുന്നു. അതിനുവേണ്ടി കഴിഞ്ഞ വർഷം മുഴുവൻ അവൻ എന്നെ ശല്യം ചെയ്തു. ഒരു ദിവസം ഞാനും അവനും മാത്രം ക്ലാസ്സിൽ ഒറ്റയ്ക്കായി. ഈ സന്ദർഭം മുതലാക്കി അവൻ എന്റെ അടുത്തേക്കു വന്നു. എന്നാൽ ഞാൻ അവിടെനിന്ന് ചാടി വാതിലിനു പുറത്തേക്ക് ഓടി രക്ഷപ്പെട്ടു.”—ജൂലിയറ്റ 18
ജൂലിയറ്റ ഇങ്ങനെ ചിന്തിച്ചേക്കാം: ആണുങ്ങൾ എപ്പോഴും അങ്ങനെയാണ്.
ആ ചിന്ത ശരിയല്ലാത്തത് എന്തുകൊണ്ട്? ഇത് എല്ലാം പൊതുവേ നടക്കുന്ന കാര്യമാണെന്ന് എല്ലാവരും ചിന്തിച്ചുതുടങ്ങിയാൽ അതിക്രമക്കാരൻ തന്റെ പെരുമാറ്റത്തിന് മാറ്റം വരുത്താൻ സാധ്യതയില്ല.
ഇങ്ങനെ ചെയ്തുനോക്കൂ: ഈ സാഹചര്യത്തെ ചിരിച്ചുതള്ളുകയോ നിസ്സാരമെന്ന മട്ടിൽ പ്രതികരിക്കുകയോ ചെയ്യരുത്. പകരം ഇത്തരം കാര്യങ്ങൾ നിങ്ങൾ ഒരിക്കലും വെച്ചുപൊറുപ്പിക്കില്ല എന്ന വ്യക്തമായ സന്ദേശം—മുഖഭാവങ്ങൾ ഉൾപ്പെടെ—അതിക്രമക്കാരന് നൽകുക.
ഞാൻ എന്തു ചെയ്യും?
ജീവിതകഥ 1:
“ആളുകളോട് ചൂടായി സംസാരിക്കുന്ന ഒരു പ്രകൃതമല്ല എന്റേത്. അതുകൊണ്ട് ആൺകുട്ടികൾ എന്നെ ശല്യം ചെയ്യുമ്പോൾ ഞാൻ അവരോട് നിറുത്താൻ പറയുമെങ്കിലും തറപ്പിച്ചുപറയാറില്ലായിരുന്നു. അതൊക്കെ ചിരിച്ചുകൊണ്ട് സാദാ മട്ടിലാണ് പറയാറുള്ളത്. ഞാൻ ശൃംഗരിക്കുകയാണെന്ന തോന്നലാണ് അത് അവരിൽ ഉളവാക്കിയത്”—തബീഥ
തബീഥയുടെ സ്ഥാനത്ത് നിങ്ങളായിരുന്നെങ്കിൽ അതിക്രമക്കാരെ എങ്ങനെ നേരിടും, എന്തുകൊണ്ട്?
നിങ്ങൾ ശൃംഗരിക്കുകയാണെന്ന് അവനോ അവളോ ചിന്തിക്കാൻ എന്തായിരിക്കും കാരണം?
ജീവിതകഥ 2:
“കായികവിദ്യാഭ്യാസക്ലാസ്സിൽവെച്ച് ചില ആൺകുട്ടികൾ വൃത്തികെട്ട തമാശകൾ പറഞ്ഞുകൊണ്ടാണ് സംഭവത്തിന് തുടക്കമിട്ടത്. കുറച്ച് ആഴ്ചത്തേക്ക് ഞാൻ അത് സഹിച്ചെങ്കിലും ദിവസം ചെല്ലുന്തോറും അത് വഷളായിക്കൊണ്ടിരുന്നു. പിന്നെപ്പിന്നെ ആൺകുട്ടികൾ എന്റെ അടുത്ത് ഇരിക്കാനും തോളത്ത് കൈയിടാനും തുടങ്ങി. ഞാൻ അവരെ തള്ളിമാറ്റിയെങ്കിലും അവർ അതിൽനിന്ന് പിന്മാറിയില്ല. ഒടുവിൽ അവരിൽ ഒരാൾ മോശമായ ഒരു സന്ദേശം എനിക്ക് എഴുതിത്തന്നു. ഞാൻ അത് കൈയോടെ ടീച്ചറെ ഏൽപ്പിച്ചു. ആ ആൺകുട്ടിയെ സ്കൂളിൽനിന്ന് പുറത്താക്കി. ഞാൻ ഇതിനെക്കുറിച്ച് നേരത്തേതന്നെ ടീച്ചറോട് പറയേണ്ടതായിരുന്നെന്ന് എനിക്ക് പിന്നീടു തോന്നി.”—സബീന.
തുടക്കത്തിൽത്തന്നെ ടീച്ചറോട് പോയി പറയേണ്ട എന്ന് സബീന തീരുമാനിക്കാൻ കാരണം എന്താണെന്നാണു നിങ്ങൾ വിചാരിക്കുന്നത്? അവൾ എടുത്ത തീരുമാനം ശരിയായിരുന്നോ, അതോ അല്ലേ? എന്തുകൊണ്ട്?
ജീവിതകഥ 3:
“എന്റെ അനിയൻ ഗ്രെഗ് കുളിച്ചുകൊണ്ടിരിക്കെ മറ്റൊരു ആൺകുട്ടി അവന്റെ അടുത്തേക്കു ചെന്നു. എന്നിട്ട് ഉമ്മ തരാൻ ആവശ്യപ്പെട്ടു. ഗ്രെഗ് അതിനു വഴങ്ങിയില്ല. എങ്കിലും ആ കുട്ടി അവിടെനിന്ന് പോകാൻ കൂട്ടാക്കിയില്ല. ഒടുവിൽ ഗ്രെഗിന് അവനെ തള്ളിമാറ്റേണ്ടിവന്നു.”—സുസാൻ
ഗ്രെഗ് ലൈംഗികമായ അതിക്രമത്തിന് ഇരയായോ? അതോ ഇല്ലേ? എന്തുകൊണ്ട്?
മറ്റൊരു ആൺകുട്ടിയിൽനിന്ന് ലൈംഗിക അതിക്രമം നേരിടുന്ന ആൺകുട്ടികൾ അതെക്കുറിച്ച് തുറന്നുപറയാൻ മടിക്കുന്നത് എന്തുകൊണ്ടാണെന്നാണ് നിങ്ങൾ വിചാരിക്കുന്നത്?
ഗ്രെഗ് ചെയ്ത കാര്യം ശരിയാണെന്ന് നിങ്ങൾക്കു തോന്നുന്നുണ്ടോ? നിങ്ങളായിരുന്നെങ്കിൽ എന്തു ചെയ്യുമായിരുന്നു?
കൂടുതൽ വിവരങ്ങൾക്ക്: യുവജനങ്ങൾ ചോദിക്കുന്ന ചോദ്യങ്ങളും—പ്രായോഗികമായ ഉത്തരങ്ങളും, വാല്യം 1 (ഇംഗ്ലീഷ്) പുസ്തകത്തിലെ “എനിക്ക് എങ്ങനെ ലൈംഗിക ഇരപിടിയന്മാരിൽനിന്ന് സംരക്ഷണം നേടാം” എന്ന 32-ാം അധ്യായം കാണുക.