Pakapera Hondo Yenyika II muna 1945, nzvimbo dzakawanda muGermany dzakanga dzava matongo. Maguta akanga aparara, zvikoro zvisisina vana, zvipatara zvisisashandisiki, uye mabhomba asina kuputitswa aiva pese pese. Uye zvekudya zvaiva zvishoma, saka zvakanga zvava kudhura. Semuenzaniso, vanhu vanotengesa zvinhu zvisiri pamutemo vaitengesa magiramu 500 emajarini nemari yaishandirwa nemunhu kwemavhiki 6.

 Vamwe vanhu vaitamburawo vaiva Zvapupu zvaJehovha, avo vakanga vaita makore vari mumajeri nemumisasa yevasungwa nemhaka yezvavanotenda. Muna 1945, vakasunungurwa vasina kana chinhu kunze kwehembe dzaingova pamuviri. Zvimwe Zvapupu zvakanga zvakarasikirwa nedzimba uye zvinhu zvavo. Vamwe vaikuvara nenzara zvekuti vaifenda misangano yechiKristu iri pakati.

 Zvapupu zvaJehovha zvekune dzimwe nyika zvakakurumidza kubatsira nezvekudya uye zvekupfeka. Hama dzekumahofisi makuru kuUnited States dzakakumbira hofisi yebazi iri muBern, kuSwitzerland, kuti ibatsire hama dzekuGermany. Nathan H. Knorr, mumiririri wemahofisi makuru, akaenda kuEurope kuti abatsire kuronga uye kuona kuti zvinhu zvekuyamura zvakurumidza kuendeswa.

 Zvapupu zvemuSwitzerland zvakapa chikafu, hembe, nemari. Zvinhu zvakatanga zvatumirwa kuBern kwazvainorongedzwa zvisati zvatumirwa kuGermany. Zvapupu zvekune dzimwe nyika dzakadai seSweden, Canada, uye United States zvakayamurawo, uye izvi zvakabatsira vanhu vaJehovha vemuGermany nemune dzimwe nyika dzakawanda dzemuEurope nemuAsia dzakanga dzasakadzwa nehondo.

 Mumwedzi mishomanana, hofisi yebazi yemuSwitzerland yakatumira kofi, mukaka, shuga, michero yakaomeswa, miriwo, uye nyama nehove zvemumagaba. Vakatumirawo mari.

 Zvapupu zvemuSwitzerland zvakatumirawo matani 5 ehembe dzaisanganisira majasi, hembe dzevakadzi uye masutu evarume. Nharireyomurindi yeChirungu yaJanuary 15, 1946, yakati: “Hama hadzina kupa zvinhu zvadzakanga dzisingachadi, asi dzakapa zvainge zvakanakisisa. Vakazvipira zvikuru kuti vabatsire hama dzavo dzekuGermany.”

 Zvapupu zvemuSwitzerland zvakapawo mapeya ebhutsu anoda kusvika 1 000, uye dzakatanga dzatariswa kuti dzichakanaka here dzisati dzatumirwa. Hama nehanzvadzi dzakavhura zvinhu zvacho muWiesbaden, Germany, dzakashamiswa nekunaka uye kusiyana-siyana kwezvinhu zvacho. Chimwe Chapupu chakati: “MuGermany hamuwaniki shopu ine zvinhu zvemhando yepamusoro seizvi.”

 Zvinhu zvekuyamura zvakaramba zvichitumirwa kusvika muna August 1948. Zvinhu zvese zvakatumirwa kuGermany neZvapupu zvemuSwitzerland zvairema matani 25. Sezvambotaurwa, Zvapupu zvemuSwitzerland handizvo zvega zvakatumira zvinhu zvekuyamura. Asi pane vanhu vese vakabatsira, ndivo vaiva vashoma. Panguva iyoyo muSwitzerland maingova neZvapupu 1 600 chete!

 Jesu Kristu akati: “Vese vachaziva kuti muri vadzidzi vangu neizvi, kana muine rudo pakati penyu.” (Johani 13:34, 35) Rudo rwakaita kuti vanhu vaJehovha vape zvinhu zvakanakisisa zvavaiva nazvo, kwete zviya zvavainge vasisadi. (2 VaKorinde 8:1-4) Tsamba yakabva kuguta reZurich yakataura kuti “hama dzakawanda dzaidawo kubatsira kunyange idzo pachadzo dzaiva varombo. Saka dzakapawo mari yadzaiva nayo.”

 Vanhu vaJehovha muGermany vakakurumidza kugadzikana kubva pakutambudzwa kwavakaitwa uye pamatambudziko akakonzerwa nehondo. Chimwe chakaita kuti zvidaro ndechekuti vakapiwa rubatsiro rwakanaka nehama dzavo idzo dzakaratidza rudo rwekuzvipira.