BAG I 16

Ke ze Yésu naʼ ngù ngelañ a be num nsitshaʼ à?

Mbeʼyàm benntùn num nkwade mbe Yésu bʼa taʼ ménfi, taʼ ngatshob ntshob Nsi zʼa ghù zenu, ke taʼ mandum zʼa tshwèt ngwù vù lo. Ndaʼndù bag bin kuʼni nebèn ndèn tshu yàm mfà num i a be ze be ziʼde yôg se ngelañ a naʼ mbe num nsitshaʼ ké? Ntùm yen bag i li bag bin aʼ ziʼde tsemoʼ tshu tse Yésu naʼ ngù là, mbèn njen mba tshen tshu là tshwèt ndôde ben nà.

1. Faʼ ndùb Yésu naʼ ngù num nsitshaʼ là bʼa ke?

Faʼ ndùb Yésu naʼ mbʼa “nesoñ nkùn mebwô Nufen Nsi”. (Siañ Lukas 4:43.) Yésu naʼ soñ nkùn mebwô mbe Nsi aʼ te taʼ Nufen zʼa nsi nabte njoñ ngùtni benntùn nyiañtu fa là. * Yésu naʼ soñ yen nkùn mebwô là bo fiag wut num nguʼ tat ghabe.—Matio 9:35.

2. Bin ba mesim Yésu naʼ ngù là naʼ bʼa ke?

Ñwaʼni Nsi tshwèt mbagde mbeʼyàm “mfaʼ neta, nu netshàme, mba [mesim ze Nsi naʼ ngù ntshùade njam Yésu là].” (Mfaʼ Ghantum 2:22) Bo ngùʼ Nsi naʼ mfà yi là, Yésu naʼ tshùb fetmbañ, nkém ntshaʼ ntshaʼ benntùn, njade ghangokèt mbèn mbam fe ben num vù. (Matio 8:23-27; 14:15-21; Marko 6:56; Lukas 7:11-17) Ba mesim Yésu naʼ ngù là naʼ laʼde kuaʼ ndañndañ mbe Nsi bèn ntum i. A naʼ bèn ndaʼdʼà mbe Nsi ghù mbaʼ nenabte njoñ tsebe ngùtni fa.

3. Ke ze be kuʼni neziʼde num mat ze Yésu naʼ njôg yi num nsitshaʼ à?

Yésu naʼ juʼ ntshu Yaweh Nsi ntùm njoñ tshu fa. (Siañ Yohané 8:29.) Mba tà ndù bo naʼ nke ntshoʼ nku mi kebàn nà, Yésu naʼ ghù njoñ tshu fa tàab nke mbèttʼé yi là kà nkum num vù se. A laʼde mbe mèn nyiañtu kuʼni neghamde Nsi mba ntùm ngeʼ. Ndùlà, Yésu naʼ “fañ mfiʼ [ben], ndùlala ndù [bag bin] zin num ze manze, ntam njam i.”—1 Pétro 2:21.

TSWEʼ NTUN MI

Yen mba Yésu naʼ soñ nkùn mebwô benntùn mbèn ngù ba mesim nà.

4. Yésu naʼ soñ nkùn mebwô

Yésu naʼ zin kilométa nkù nkù num ba manze mbabe, nke nsoñ nkùn mebwô njoñ benntùn fa zʼa naʼ nke njen nà. Siañ Lukas 8:1, mbèn mbùnde tshen mbètte li:

Yésu naʼ soñ nkùn mebwô à ndaʼ benntùn bo naʼ nke nkùmde num nejuʼ i ké?
Tsit nkagtùn Yésu naʼ ngù num nediag benntùn à?

Nsi naʼ tshob mbe Mésia nsi soñ nkùn mebwô. Siañ Esaya 61:1, 2, mbèn mbùnde tshen mbètte li:

Yésu naʼ dunde yen ntshob ndamnjù lʼà ndùke?
O kwade mbe sènni benntùn ghù nzi nejuʼ yen nkùn mebwô là ké?

5. Yésu naʼ tswide ba nenùn ndùb

Nkwiʼde num nesoñ nkùn mebwô Nufen Nsi, Yésu naʼ bèn ntswide ba nenùn ndùb tsʼa be njwimde là. Yen bon mfiʼ li ntùm ze tu ntshob num mbale. Siañ Matio 6:14, 34 bo 7:12, mbèn mbùnde tshen mbètte li:

Tsit mbwô ntag Yésu naʼ fà ntùm tshen nka Ñwaʼni Nsi lʼà?
O kwade mbe tshen ntag là kuʼni neywimde benntùn mba sènni ké?

6. Yésu ghù ba mesim

Yaweh Nsi fà mbaʼ Yésu neghù mbeʼyàm mesim. Num neyen taʼ mfiʼ, siañ Marko 5:25-34 ke là lôde LAʼDE NETSHAÑ. Mbèn mbùnde tshen mbètte li.

LAʼDE NETSHAÑ: Jésus guérit une femme malade (5:10)

Ntùm laʼde netshañ, mènnzwi zʼa nke ngon nà naʼ ghù bamntù mfà à num ke?
Ke zʼa bwô o ntùm yen mesim ni à?

Siañ Yohané 5:36, mbèn mbùnde yen bètte li:

Ba mesim Yésu naʼ ngù là, naʼ laʼdʼà ke mfà num i à?

O naʼ lèn ké?

Mbeʼyàm tshu be lèn mfà num Yésu là fe à ntùm Ñwaʼni Nsi, bag i bo be ntsiañ mbe nkùn mebwô—Matio, Marko, Lukas bo Yohané là. Mba zit ngakide nkùn mebwô lo tshob taʼ ju mfà num Yésu ze moʼ keʼ tshob là. Njoñ tshen tshu là fa tamde, mbagde yôg Yésu kuaʼ mebwô.

MATIO

bèn mbwôgmbwe nkide ze nkùn mebwô. A sañlañ num ntswide Yésu, nsañlañ à kuaʼ num ju zʼa tswide mfà num Nufen Nsi là.
MARKO

kide nkùn mebwô zʼa vôg ntshùa tsemoʼ là. A tshwèt nsoñ mbeʼyàm mbwô mbwô tshô.
LUKAS

nke nsañlañ à num leʼde bo mat Yésu naʼ nke ndoʼ bènnzwi yi là.
YOHANÉ

nke nsoñ mbeʼyàm tshu num yôg Yésu, nsoñ ba nswade ntshob zʼa naʼ nke ngù bo shun tse mba tsemoʼ benntùn nà.