BAG I 28

Laʼde mbʼo nyàmde ju ze Yaweh Nsi bo Yésu ghù wù là

O nke njuʼ wul o à ndùke ngelañ nshun o fà taʼ mbwô ndaʼ wù à? Magde ke bwe mbʼa num mfà tsiañde wù, o bèn nke nkô nelaʼde nshun o mbʼo nyàmde ndaʼ zʼa fà wù là. Yaweh Nsi bo Yésu fà taʼ ndaʼ ndùb ben ze mèn keʼ toʼ fà ben nà. Yen ndaʼ là bʼa zile? Be bag bin laʼdʼà ndùke mbe be nyàmdʼé à?

1. Taʼ manze nelaʼde mbe be nyàmde ju ze Nsi bo Kristô ghù ben nà bʼa zile?

Ñwaʼni Nsi tshwèt mbù mbe “mba we lo zʼa ghù bamntù mfà num [Yésu] là” aʼ ghù yôg matmat. (Yohané 3:16) Neghù bamntù nke mbagdʼà mbe ke? A keʼ be tsʼa ndaʼ nebam Yésu. A bètte be laʼde zebe bamntù ntùm ba mfiʼ tse be num ndoʼ là mba ntùm tshu be num ngù là. (Yakobo 2:17) Ngelañ bag bin num ndaʼde bamntù ntùm ngùninu mba ntùm ntshob ben nà, yennà so kù num zebe kushun bo Yésu ngù tàab, Yaweh Nsi.—Siañ Yohané 14:21.

2. Zit ntumlam jùa bèn nke njwimde ben nelaʼde Yaweh Nsi bo Yésu mbe be nyàmde ju ze bo ghù ben nʼà?

Tèttsweʼ a tôg kʼa kwù là, Yésu naʼ laʼde ghaziʼde nu i moʼ manze ze be bo tshùade bwe, ndaʼde mbe bo nyàmde ju tshuʼ là. A naʼ te taʼ ntumlam jùa ze Ñwaʼni Nsi tshwèt ntsiañ mbe “jujù Tshùaben” nà; bo num mbèn ntsiañ i mbe nekwimde vù Yésu. (1 Korintô 11:20) Yésu naʼ te yen jùa lʼà neywimde ghantum tse—bo njoñ benkristô tse nenùn fa tse bo seʼ njam bo là—bo nke nkwimde mbe a naʼ fà yôg se num tu bo. Num ju zʼa tshwèt ndôde yen jùa là là, Yésu naʼ tshob mbe: “Bin nke ngù yen ni, nke nkwimdʼàm yi.” (Lukas 22:19) Ngelañ o num nèn yen jùa là là, o laʼde mbe o nyàmde nkôni Yaweh Nsi bo Yésu ghù mfà num o là.

TSWEʼ NTUN MI

Ziʼde tsemoʼ mat nenyàmde nkôni ndùb ze Yaweh Nsi bo Yésu laʼde ben nà. Mbèn njen ju zʼa ghù nekwimde vù Yésu be ju ndùb là.

3. Laʼde yu nenyàmde ntùm mfaʼ

Naʼ nkwade mbʼo gwù ntse, mènntùn yôg o. Oaʼ lagde ju ze yen mèn nà ghù wù là ké? Ke oaʼ diag ba manze nelaʼde yi mbʼo nyàmde ju zʼa ghù wù lʼà?

Yaweh Nsi yôg ben. Siañ 1 Yohané 4:8-10, mbèn mbùnde tshen mbètte li:

Numke vù Yésu bʼa taʼ ntumlam ndaʼ à?
O nke njuʼ wul o à ndùke mfà num ju ze Yaweh Nsi bo Yésu ghù wù à?

Bag bin kuʼni nelaʼde mbe be tshwèt nyàmde ju ze Yaweh Nsi bo Yésu ghù ben nʼà ndùke? Siañ 2 Korintô 5:15 bo 1 Yohané 4:11; 5:3. O miagde nesiañ mba zit nka Ñwaʼni Nsi lo, o bùnde tshen mbètte li:

Mba tshen nka Ñwaʼni Nsi li tshwèt ntshob là, ke ze bag bin kuʼni neghù nelaʼde mbe be nyàmde ju tshuʼ à?

4. Fiʼde Yésu

Moʼ manze nelaʼde mbe bag bin nyàmde ju tshuʼ bʼa nefiʼde Yésu. Siañ 1 Pétro 2:21 mbèn mbùnde yen bètte li:

Ke ze be bag bin ghù nelaʼde mbe be tshwèt mfiʼde Yésu kuaʼ mebwô à?

Bàn bo nduʼ bʼa netshañ tshu. Bàn nke ndaʼdʼà wut nelàn Yésu zʼa naʼ mfà num tu ben nà. Nduʼ nke ndaʼdʼà lem tse.

5. Kà tag nenèn jujù Tshùaben

Nedù o lèn ju zʼa naʼ ntôg num mbwe jujù Tshùaben nà, siañ Lukas 22:14, 19, 20 mbèn mbùnde tshen mbètte li.

Ke zʼa naʼ ntôg num jujù Tshùaben à?
Bàn bo nduʼ nke ndaʼdʼà ke? (Lôde nka 19 bo 20.)

Yésu naʼ kô mbe ghaziʼde nu i nke nze jujù Tshùaben taʼ yoñ ntùm nguʼnjù num nekwimde vù se. Ndùlà, ghakwénta Yaweh Nsi be nkùmde taʼ yoñ ntùm nguʼnjù num nekwimde vù Yésu mbʼa naʼ mbètte là. O kô nelèn mba yen jùa là num tôg là, o lôde LAʼDE NETSHAÑ. Mbèn mbùnde yen bètte li.