Yaweh Nsi nabte ben, mfà taʼ me mbwô ndaʼ ben—yen ndaʼ là bʼa nekuʼni netshob nu. Mat be num mfaʼ bo yen mbwô ndaʼ là bʼa ju ndùb yi ké? Ñ! (Siañ Yakobo 1:26.) Ndùlà, be bag bin tsiañde ntù Yaweh Nsi bo ntshob ben à ndùke?

1. A bètte be faʼ à ndùke bo ndaʼ netshob nu à?

Ñwaʼni Nsi tshwèt ntshob mbe “bin tsweʼde ntù tsin bin bin, nkut wut tsin bin bin.” (1 Tésalônikà 5:11) O kwade benntùn tsʼa bètte bo so kù num bo là ké? O kuʼni neghù à ke nedù bo juʼ mebwô à? Neghù bo lèn mbʼo tshwèt nywin num bo, bʼo nyàmde yub num tshu tse bo num ngù là. O kwade taʼ bag Ñwaʼni Nsi ze bʼa so kù num taʼ mèn o lèn nà ké? Ba nka Ñwaʼni Nsi tse bʼo tshoʼ là yàme. Kwimde mbe ju zʼo tshob là, mba mat o loʼ tshob yi là, kuʼni neso kù num benntùn kuaʼ mebwô. Ndùlà, kagtùn netshob nu njoñ ngelañ fa à bo bwôntù ngù mbétni.—Tànkùt 15:1.

2. A bètte be ghuaʼ à ke lèn ntshob à?

Ñwaʼni Nsi mbe: “kà sàm ntshob kebwô tum ntshu bin.” (Siañ Efésô 4:29.) Yenni nke mbagdʼà mbʼa bètte be ghuaʼ tshùagkèt ntshobe, ke bi ntshob lo tse bʼa keʼ mènntùn nà. A bèn mbètte be ghuaʼ mat ne nke nsaʼ ndàm, mba netshob ntshob tatte num benntùn.—Siañ Tànkùt 16:28.

3. Ke zʼa ywimde ben ne nke ntshob ntshob so kù à?

Tshu tse be num ntshob là num ndaʼde ju zʼa be ntùm ntù ben, mba nkwade ben nà. (Lukas 6:45) Ndùlà, a bètte be kagtùn nekwade num tshu mebwô—tshu netsine, tshu nelàne, tshu nkôni, mba tshu neghamde. (Filipi 4:8) Ju zʼa ywimde ben nekwade mfà num tshen tshu là là, bʼa netshoʼ tseben sa mba mba shun ben bo zenu. (Tànkùt 13:20) A bèn mbʼa mbwô ju nesiañde nu kà ntshobe. Siañde mfà num ju ze ntshob mu kuʼni neghù num tsemoʼ là. Ñwaʼni Nsi mbe: “moʼ mènntùn be mbe bwe, ntshob mi nke nkeb à mba ñwi là! Là lém ghazenu nke njade ze neyade.”—Tànkùt 12:18.

 TSWEʼ NTUN MI

4. Bàm nà num ju zʼo num ntshob là, mat o num ntshob yi, mba ngelañ o num ntshob là

Tsemoʼ ngelañ, njoñ be fa num ntshob ju ke kwade, kà be nèn mbwe, njuʼ kebwô num bwe. (Yakobo 3:2) Siañ Galatia 5:22, 23, mbèn mbùnde tshen mbètte li:

• Bo tunde ba mat nzenni tse bʼa ywimdʼo nezede num ntshob mu là; tsit netèt bwe o kuʼni nebètte Yaweh Nsi yi ntùm leʼde à? Be tshen mat là ywimdʼo à ndùke?

Siañ 1 Korintô 15:33, mbèn mbùnde yen bètte li:

• Shun tsho mba tshu tsʼo num ndôde là kuʼni neghù à ke num yu mat netshob nu à?

Siañ Eklésia 3:1, 7, mbèn mbùnde yen bètte li:

• Tsemoʼ ngelañ, a zenu netswe ntshu miʼi ke nebéb mbwô ngelañ kà ntshob taʼ ju lo; zit ngelañ o kwade mbʼa bwô neghù yennʼà?

 5. Tshob ntshob mebwô mfà num tsemoʼo

6. Laʼde bwôntù ngelañ o tshwèt ntshobte bo yu tunndà là

 JU NETSHÙBE

Miben ntshob kuʼni neywimde ke nekeʼ tsemoʼ lo. A bètte be bàm nà num ju ze be num ntshob là, mat be num ntshob yi là, mba ngelañ be num ntshob là.

Mbètte nekwimde

• Ba mat tse bʼo loʼ ntshob mu njwimde tsemoʼ yi là bʼa tsile?

• Ke lèn ntshob o kô neghuaʼ à?

• Ke ze bʼa ywimde ben njoñ ngelañ fa netshob nu tsemoʼ bo bwôntù mbèn nso kù num bo à?