BAG I 41
Ke ze Ñwaʼni Nsi tshwèt ntshob mfà num ntamde mandum bo mènnzwi à?
Mbeʼyàm benntùn num nko tuswe netshob mfà num ntamde mandum bo mènnzwi. Ndaʼndù, ngelañ Ñwaʼni Nsi num ntshob nu mfà num bwe là, a tshob à kuaʼ ndañndañ ke lem ju mbèn ntshob à bo nkuʼni. Ju zʼa num ntshob là be njwimde ben. A keʼ bʼa ju netshàm nummbe Ñwaʼni Nsi fe à Yaweh Nsi ngabom ben. Ndùlà, a lèn ju zʼa bwô num ben nà. A num ntshob tshu tsʼa bètte be ghù num netsiañde ntù i là ben, mba ba tshu tsʼa kuʼni neywimde ben nejù bin yôg matmat là.
1. Nkwade Yaweh Nsi mfà num ntamde mandum bo mènnzwi bʼa zile?
Ntamde mandum bo mènnzwi bʼa taʼ ndaʼ a fe Yaweh Nsi là. A kô mbe taʼ mandum bo taʼ mènnzwi bo na ndà là jù bin yen ndaʼ là. Yen mbwô ndaʼ là keʼ be ywimde yub à ndaʼ neghù bônkeʼ, là a bèn mbʼa taʼ mat nelaʼde yub nkôni netèt bo, bo bo. A ju zʼa ghù Ñwaʼni Nsi nke ntshob mbe: “Tsiañde bin mènnzwi ze bin yi lo ngon nà.” (Tànkùt 5:18, 19) Yaweh Nsi kô mbe mba zit mènkristô lo a na ndà là lat num ndu i ke nzwi i lo, ndùlà, aʼ tshètte yub neghù mandà.—Siañ Héber 13:4.
2. Tshunu ghàne nke mbagdʼà ke?
Ñwaʼni Nsi tshwèt ntshob mbe “ghaghù [tshunu ghàne] . . . ke nsi ghù yub bag i ntùm Nufen Nsi.” (1 Korintô 6:9, 10) Ghakide Ñwaʼni Nsi ntùm ntshob Grikia naʼ loʼ lag ntshob por·neiʹa num nebagde ju ze tshunu ghàne be yi là. Yen lag ntshob là nke mbagdʼà (1) taʼ mandum ke taʼ mènnzwi lo nezi * bo moʼ mèn a keʼ na ndà bo yi là, (2) taʼ mandum nezi bo moʼ mandum ke taʼ mènnzwi nezi bo moʼ mènnzwi lo, mba (3) taʼ mènntùn nyiañtu nezi bo nyàm. Bag bin num ntsiañde ntù Yaweh Nsi mbèn njù bin yàm ngelañ be “kù [tshunu ghàne]” nà.—1 Tésalônikà 4:3.
TSWEʼ NTUN MI
Yen mbʼo kuʼni nekù tshunu ghàne mba bin zʼo kuʼni nejù be zʼo tswe nelàn ntùm nkwade mu mba ntùm ntù o là.
3. Kù tshunu ghàne
Taʼ mènnzwi naʼ diag neghù mandà bo ngabamntù Yosèf, ndaʼndù a gha. Siañ Netoʼde 39:1-12, mbèn mbùnde tshen mbètte li:
-
Numke Yosèf naʼ nkù à?—Lôde nka 9.
-
O kwade mbe Yosèf naʼ ndoʼ à mbwô mfiʼ ké? Numke?
Be ghuan benntùn fiʼde Yosèf nkù tshunu ghàne sènni à ndùke? Lôde LAʼDE NETSHAÑ.
Yaweh Nsi kô mbe njoñ ben fa kù tshunu ghane. Siañ 1 Korintô 6:18, mbèn mbùnde tshen mbètte li:
-
Ke ze bʼa tènde mènntùn negwù ntùm tshunu ghàne à?
-
Bʼo kù tshunu ghàne à ndùke?
4. O kuʼni nenya ke gwù ntùm tshunu ghàne
Numke bʼa ta nenya ke gwù ntùm tshunu ghàne à? Lôde LAʼDE NETSHAÑ, mbèn mbùnde yen bètte li.
-
Ngelañ ze mvèt ntùm laʼde netshañ naʼ njen mbe nkwadenu mba ngùninu mi naʼ kuʼni netèndʼé a gwù ntùm mandà mfù nzwi i là, a ghù à ndùke?
Tsemoʼ ngelañ, mba ghafaʼ Nsi tse nenùn num nzwe num neghuaʼ nkwade kebwô. Bʼo ghuaʼ mat ne nke nkwade mfà num tshunu ghàne njoñ ngelañ fa à ndùke? Siañ Filipi 4:8, mbèn mbùnde tshen mbètte li:
-
Tsit tshu a bètte be nke nte nkwade ben num bwe à?
-
Ne nke nsiañ Ñwaʼni Nsi mbèn nke ngù faʼ yàm ntùm ghamde Yaweh Nsi kuʼni netshètte be negwù ntùm nukebwô à ndùke?
5. Ntshùʼ Yaweh Nsi bʼa num zebe ntswe mebwô
Yaweh Nsi lèn ju zʼa bwô num ben nà. A num ntshob ben mba be kuʼni netswe nelàn ntùm nkwade ben mba ntùm ntù ben nà, mba bin tse be jù njam bwe là. Siañ Tànkùt 7:7-27 ke là, o lôde LAʼDE NETSHAÑ, mbèn mbùnde tshen mbètte li.
-
Yen nguanmèn ni fà wul i ntùm lañdʼà ndùke?—Lôde Tànkùt 7:8, 9.
-
Mba Tànkùt 7:23, 26 tshwèt ntshob là, tshunu ghàne kuʼni neloʼ kebwô yàm nseʼ yi num ben. Be tswe nelàn ntùm nkwade ben, mba ntù ben mba be kuʼni nekù à tsit ngùtni à?
-
Netswe nelàn ntùm nkwade ben mba ntù ben kuʼni neywimde ben nejù bin yôg matmat à ndùke?
Tsemoʼ benntùn num nkwade mbe ju ze Ñwaʼni Nsi tshwèt ntshob mfà num ntamde mandum bo mandum ke mènnzwi bo mènnzwi lo taa neshu. Ndaʼndù Yaweh, Nsi nkôni kô mbe mba we lo jù bin yôg matmat. Neghù yen yôg matmat là, a bètte be zin num ntshùʼ mi. Siañ 1 Korintô 6:9-11, mbèn mbùnde yen bètte li:
-
Yaweh Nsi nke mbàn à ndaʼ ntamde mandum bo mandum ke mènnzwi bo mènnzwi lo ké?
A bètte njoñ benntùn fa ghù ba mbade num netsiañde ntù Nsi. Bin be là neghù yennà ké? Siañ Yobkwi 19:8, 11, mbèn mbùnde tshen mbètte li:
-
O kwade mbe a taa neze ntshùʼ Yaweh Nsi ké? Numke?
Yaweh Nsi ywimde bwoñ benntùn neze ntshùʼ mi. Be a ywimde mba wù
TSEMOʼ BENNTÙN NUM NTSHOB MBE: “Moʼ ngùtni keʼ be a be ze mènntùn zi bo mba zit mèn no a kô i là.”
-
Ke zʼo kwade yu à?
JU NETSHÙBE
Ntamde mandum bo mènnzwi bʼa taʼ ndaʼ ze Yaweh Nsi fà ben bo na ndà là.
Mbètte nekwimde
-
Tshunu ghàne nke mbagdʼà ke?
-
Ke zʼa ywimde ben nekù tshunu ghàne à?
-
Tsit bin be jù be ze be bét ntshùʼ Yaweh Nsi mfà num tshunu ghàne à?
DIAGE
Yen ju zʼa ghù a be ju ndùb Nsi mbe taʼ mandum bo taʼ mènnzwi na ndà kà ntam ntswe là.
“Vivre en couple sans être mariés: quʼen dit la Bible?” (Ñwaʼni num jw.org)
Ntswide Ñwaʼni Nsi mfà num ntamde mandum bo mandum, ke mènnzwi bo mènnzwi lo nke mbagdà mbe a bètte be dùʼ nkebàn mfà num tshen benntùn nà ké?
Yen mba ntshùʼ tse Nsi num mfà num ntamde mandum bo mènnzwi num tshètte ben nà.
“Les relations bucogénitales sont-elles vraiment des relations sexuelles?” (Ñwaʼni num jw.org)
Ntùm tshô “Ils ont respecté ma dignité”, yen ju zʼa naʼ ntènde taʼ mandum a naʼ nke nzi bo tsemoʼ bandum nà mbʼa bade kuzin se, ntsiañde ntù Nsi là.
“La Bible transforme des vies” (La Tour de Garde, 1er avril 2011)
^ Ntùm tshunu ghàne be bag bin bèn ntunde tsemoʼ mat nezi bo mèn ghua mba rapports buccogénitaux (bo ntshu), sodomie bo masturbation (ba mat nekwagde ba bag wut mènntùn).
