LES 08
Yu kan tron wan mati fu Yehovah
Yehovah wani taki yu kon sabi en moro bun. Fu san ede? A e howpu taki te yu kon sabi fa a de, fa a e yepi sma èn san a wani du gi yu, dan yu o wani tron en mati. Yu e bribi taki yu kan tron wan mati fu Gado? (Leisi Psalm 25:14.) San yu kan du fu tron wan mati fu Gado? Bijbel e piki den aksi disi èn a e sori fu san ede Yehovah na a moro bun mati di yu kan abi.
1. San Yehovah wani yu fu du?
„Kon krosibei na Gado èn a o kon krosibei na unu” (Yakobus 4:8). San disi wani taki? Disi wani taki dati Yehovah wani taki yu tron en mati. Son sma no man bribi taki den kan tron wan mati fu Gado fu di den no man si en. Ma na ini en Wortu Bijbel, Yehovah e sori wi fa a de èn dati kan yepi wi fu tron mati fu en. Te wi e leisi a Wortu fu Gado wi kan tron moro bun mati fu en, awinsi wi no man si en.
2. Fu san ede Yehovah na a moro bun mati di yu kan abi?
Nowan sma lobi yu moro Yehovah. A wani taki yu de koloku èn taki yu taki nanga en te yu abi yepi fanowdu. Yu kan ’trowe ala yu hebi na en tapu, bika a e broko en ede nanga yu’ (1 Petrus 5:7). Ala ten Yehovah e yepi den mati fu en, a e trowstu den èn a e arki den.—Leisi Psalm 94:18, 19.
3. San wi musu du efu wi wani tron Yehovah mati?
Yehovah lobi ala sma, „ma a de bun mati nanga den sma di ati krin” (Odo 3:32). Yehovah abi wet di e sori san bun èn san no bun. Efu wi wani tron mati fu en, dan a wani taki wi gi yesi na den wet disi. Son sma e frede taki den no o man hori densrefi na den wet fu Yehovah. Ma Yehovah sabi san wi man du èn san wi no man du. Efu wan sma lobi en èn a e du ala san a man fu gi yesi na en, dan a o teki en leki en mati.—Psalm 147:11; Tori fu den apostel 10:34, 35.
SORTU TRA SANI YU KAN LERI?
Wi o si sortu tra sani yu kan du fu tron wan mati fu Yehovah èn fu san ede en na a moro bun mati di yu kan abi.
4. Abraham ben de wan mati fu Yehovah
A tori fu Abraham (Bijbel e kari en Abram tu) e sori san a wani taki fu de wan mati fu Gado. Leisi a tori fu Abraham na Genesis 12:1-4. Baka dati taki fu den aksi disi:
-
San Yehovah aksi Abraham fu du?
-
San Abraham du di Yehovah aksi en a sani dati?
-
San Yehovah pramisi Abraham?
5. San Yehovah e fruwakti fu den mati fu en?
Wi lobi en te den mati fu wi e du son sani gi wi
-
San yu ben o wani den mati fu yu du gi yu?
Leisi 1 Yohanes 5:3 èn taki fu na aksi disi:
-
San Yehovah e fruwakti fu den mati fu en?
Fu man gi yesi na Yehovah, dan kande a o de fanowdu fu tyari wisrefi tra fasi èn fu kenki den maniri fu wi. Leisi Yesaya 48:17, 18 èn taki fu na aksi disi:
-
Fu san ede Yehovah wani taki den mati fu en tyari kenki kon?
6. Den sani di Yehovah e du gi den mati fu en
Yehovah e yepi den mati fu en te den abi problema. Prei a FELEM èn taki fu na aksi disi:
-
A frow na ini a felem ben feti nanga son firi, ma fa Yehovah yepi en?
Leisi Yesaya 41:10, 13 èn taki fu den aksi disi:
-
San Yehovah pramisi fu du gi ala den mati fu en?
-
Yu denki taki Yehovah ben o de wan bun mati gi yu? Fu san ede yu e taki dati?
7. Efu yu wani de wan mati fu Yehovah, yu musu taki nanga en èn yu musu arki en
Sma e tron moro bun mati fu makandra te den e taki nanga makandra. Leisi Psalm 86:6, 11 èn taki fu den aksi disi:
-
Fa wi kan taki nanga Yehovah?
-
Fa Yehovah e taki nanga wi?
SON SMA E TAKI: „Libisma no man tron mati fu Gado.”
-
Sortu Bijbeltekst yu ben o gebroiki fu sori wan sma taki wi kan tron wan mati fu Yehovah?
SAN YU LERI?
Yehovah wani de yu mati èn a o yepi yu fu tron wan mati fu en.
Fa yu ben o piki den aksi disi?
-
Fa Yehovah e yepi den mati fu en?
-
Fu san ede Yehovah wani taki den mati fu en tyari kenki kon?
-
Yu denki taki Yehovah e aksi tumusi furu fu den mati fu en? Fu san ede yu e taki dati?
TRA SANI DI YU KAN LUKU
Na artikel disi e sori fa yu libi o kon moro bun te yu tron wan mati fu Gado.
„Yehovah—Wan Gado di warti fu sma sabi en” (A Waktitoren, 15 februari 2003)
Leisi fa yu kan tron wan mati fu Gado.
„Fa mi kan tron Gado mati?” (Sani di yongusma e aksi—Piki di kan yepi den, Pisi 2, kapitel 35)
Na ini na artikel disi wan uma e fruteri fa en libi kon moro bun di a tron wan mati fu Yehovah.
Na ini a felem disi wan tu yonguwan e fruteri fa den feni en fu de mati fu Yehovah.