LES 13
Falsi kerki e gi Gado porinen
Efu Gado na lobi, dan fu san ede den kerki di e taki dati den e du a wani fu Gado e du someni ogri? Fu di den kerki disi na falsi kerki. Den e gi Gado porinen. Fa den gi Gado porinen? Fa Gado feni en taki den du dati? Èn san a o du nanga den?
1. Fa den sani di den falsi kerki e leri sma e gi Gado porinen?
Den falsi kerki e leri sma lei fu Gado, na presi fu leri sma den tru sani fu Gado (Romesma 1:25). Fu eksempre, furu kerki no leri den bakaman fu den san na Gado nen. Ma Bijbel e taki dati wi musu gebroiki Gado nen (Romesma 10:13, 14). Te wan ogri sani e pasa, dan son kerki fesiman e taki dati na Gado ben wani en so. Ma dati na wan lei. Noiti Gado e du ogri nanga sma. (Leisi Yakobus 1:13.) A sari taki den lei disi meki taki a muilek gi furu sma fu lobi Gado.
2. Fa den sani di falsi kerki e du e gi Gado porinen?
Den kerki fesiman no lobi sma leki fa Yehovah lobi sma. Bijbel taki dati ’den sondu fu den kon so furu taki den doro te na hemel’ (Openbaring 18:5). Hondrohondro yari kaba, kerki e bumui na ini politiek, den e horibaka gi feti èn den meki taki furu sma lasi den libi. Son kerki fesiman e aksi den sma fu a kerki fu gi den moni, soso fu man libi wan bigi libi. Den sani disi di den e du e sori taki den no sabi Gado èn dati meki den no abi a reti fu leri sma sani fu en.—Leisi 1 Yohanes 4:8.
3. Fa Gado e denki fu falsi kerki?
Efu den sani di den falsi kerki e du e meki yu ati bron, dan fa yu denki Yehovah e firi? Yehovah lobi sma, ma en ati e bron nanga den kerki fesiman di e leri sma lei fu en èn di no lobi den bakaman fu den. A pramisi taki a o pori den falsi kerki èn taki ’noiti moro sma o feni den’ (Openbaring 18:21). Heri esi Gado o pori ala den falsi kerki.—Openbaring 18:8.
SORTU TRA SANI YU KAN LERI?
Wi o taki fu tra sani di den falsi kerki du èn fa Gado feni den sani dati. Wi o si tu fu san ede den sani di den kerki e du no musu tapu yu fu kon sabi Yehovah.
4. Gado no feni ala kerki bun
Furu sma e bribi taki den difrenti kerki de leki difrenti pasi di e tyari yu go na Gado. Ma a sani dati tru? Leisi Mateyus 7:13, 14 èn taki fu na aksi disi:
-
San Bijbel e taki fu a pasi di e tyari sma go na libi?
Prei a FELEM èn taki fu na aksi disi:
-
Bijbel e leri taki Gado feni ala kerki bun?
5. Den falsi kerki no e sori lobi leki Gado
Den falsi kerki du furu sani di e meki taki sma e denki ogri fu Gado. Wan bigi ogri di den e du na taki den e horibaka gi feti. Meki wi luku wan eksempre. Prei a FELEM èn taki fu den aksi disi:
-
San furu kerki du na a ten fu a Di Fu Tu Grontapufeti?
-
Fa yu feni a sani di den du?
Leisi Yohanes 13:34, 35 nanga 17:16. Baka dati taki fu den aksi disi:
-
Fa Yehovah e firi te den kerki e horibaka gi feti?
-
Den falsi kerki du furu ogri. Sortu ogri yu si den kerki du?
Den falsi kerki no e sori lobi leki Gado
6. Gado wani yepi sma fu komoto na ini den falsi kerki
Leisi Openbaring 18:4 a èn taki fu na aksi disi:
-
Fa yu feni en taki Gado wani yepi sma fu komoto na ini falsi kerki?
7. Tan du muiti fu kon sabi a tru Gado
Den sani di den falsi kerki e du noso di den e leri sma musu meki taki yu denki ogri fu Gado? Prakseri wan boi di no wani teki a bun rai di en papa e gi en. A e gowe libi oso èn a e go du wan lo ogri. A papa no lobi den sani di a boi e du. Na a papa abi a fowtu taki a boi e libi so?
-
Na Yehovah abi a fowtu fu den ogri di den falsi kerki e du? Den sani di den e du musu tapu wi fu kon sabi Yehovah?
SON SMA E TAKI: „Den kerki e du so furu ogri.”
-
Na so yu e denki tu?
-
Fu san ede den sani di den falsi kerki e du no musu meki taki yu denki takru fu Yehovah?
SAN YU LERI?
Den ogri sani di den falsi kerki e du èn den lei di den e leri sma e meki taki Gado e kisi porinen. Gado o pori ala den falsi kerki.
Fa yu ben o piki den aksi disi?
-
Fa yu feni den sani di den falsi kerki du èn den sani di den e leri sma?
-
Fa Yehovah e denki fu den falsi kerki?
-
San Gado o du nanga den falsi kerki?
TRA SANI DI YU KAN LUKU
Na ini na artikel disi yu o leisi fu tu sani di furu kerki e du di Gado no feni bun.
„Ala kerki na a srefi? Den alamala e yepi sma fu dini Gado?” (Web-artikel)
Fu san ede wi musu anbegi Yehovah makandra nanga trawan?
Wan priester no ben lobi den sani di a kerki fu en ben du. Ma a sani disi no tapu en fu meki muiti fu kon sabi a tru Gado.
„Fu san ede wan priester gowe libi en kerki?” (Ontwaakt!, februari 2015)
Hondrohondro yari kaba den kerki e leri sma lei fu Gado. Den sani disi e meki taki sma e bribi taki Gado ogri èn taki a no e broko en ede nanga den. A tijdschrift disi e taki fu dri fu den lei disi.
„Lei di e meki taki sma no man lobi Gado” (A Waktitoren, 1 november 2013)
a Efu yu wani sabi fu san ede a buku Openbaring e agersi den falsi kerki nanga wan uma di nen Babilon a Bigiwan, dan luku „Ete wan tu sani 1”.
