LES 45

Fa wi kan sori taki wi e horibaka soso gi a regering fu Yehovah?

PREI

Yesus leri den bakaman fu en taki den ’no musu de wan pisi fu grontapu’ (Yohanes 15:19). Disi wani taki dati wi e horibaka soso gi a regering fu Yehovah. Fu eksempre, wi no e bumui na ini politiek èn wi no e go na ini a legre. Ma a no makelek fu du disi. A kan taki sma o spotu wi fu di wi no wani bumui nanga politiek. Fa wi kan sori taki wi e horibaka soso gi a regering fu Yehovah?

1. Fa tru Kresten e si den regering fu libisma?

Kresten e sori lespeki gi den tiriman. Wi e du san Yesus ben taki. Wi e „pai Grankownu san na fu Grankownu”. Dati meki wi e gi yesi na den wet fu a kondre. Wan fu den wet na taki wi musu pai belasting (Markus 12:17). Bijbel e leri taki libisma e tiri soso fu di Yehovah e gi den pasi fu du dati (Romesma 13:1). Dati wani taki dati den libisma regering no abi so furu makti leki Gado. Wi sabi taki Gado wawan nanga a Kownukondre fu en na hemel o man lusu den problema fu libisma.

2. Fa wi kan sori taki wi e horibaka soso gi a regering fu Yehovah?

Neleki Yesus wi no e bumui na ini politiek. Di den sma ben si wan fu den wondru di Yesus ben du di a ben de na grontapu, den ben wani meki a tron kownu. Ma a no ben wani (Yohanes 6:15). Fu san ede? Yesus ben taki: „Mi kownukondre no de fu a grontapu disi” (Yohanes 18:36). Wan tu fasi de fa wi leki disipel fu Yesus kan sori taki wi e horibaka gi a regering fu Yehovah. Fu eksempre, wi no e go na ini a legre. (Leisi Mika 4:3.) Wi e lespeki a fraga, ma wi no e anbegi en (1 Yohanes 5:21). Èn wi no e horibaka gi nowan politiek partèi. Disi na wan tu fasi fa wi kan sori taki wi e horibaka soso gi a regering fu Gado, dati na a Kownukondre.

SORTU TRA SANI YU KAN LERI?

Wi o si san kan meki en muilek gi wi fu no bumui na ini politiek èn fa wi kan teki bosroiti di e meki Yehovah breiti.

3. Tru Kresten no e bumui na ini politiek èn den no e go na ini a legre

Na eksempre fu Yesus nanga den bakaman fu en e sori wi fa wi kan du dati. Leisi Romesma 13:1, 5-7 nanga 1 Petrus 2:13, 14. Baka dati prei a FELEM èn taki fu den aksi disi:

FELEM: Tru Kresten no e teki sei—Pisi 1 (4:28)

Fu san ede wi musu lespeki den tiriman?
Fa wi kan sori taki wi e lespeki den?

Son leisi te tu kondre e feti, dan tra kondre e taki dati den no de na ini a feti, ma toku den e horibaka gi wan fu den tu kondre. Fa wan Kresten kan sori taki a no e teki sei? Leisi Yohanes 17:16. Baka dati prei a FELEM èn taki fu na aksi disi:

FELEM: Tru Kresten no e teki sei—Pisi 2 (3:11)

Fa wan Kresten kan sori taki a no e teki sei?

San yu o du efu den tiriman aksi yu fu tapu fu du wan sani di Yehovah e aksi fu yu? Leisi Tori fu den apostel 5:28, 29. Baka dati prei a FELEM èn taki fu den aksi disi:

FELEM: Tru Kresten no e teki sei—Pisi 3 (1:18)

Efu den tiriman aksi yu fu tapu nanga wan sani di Gado e aksi fu yu, dan na suma yu o gi yesi?
Na ini sortu situwâsi wan Kresten no o gi yesi na den tiriman?

4. A fasi fa yu e denki èn den sani di yu e du

Leisi 1 Yohanes 5:21. Baka dati prei a FELEM èn taki fu den aksi disi:

FELEM: Tru Kresten abi deki-ati fanowdu—Fu no teki sei na ini grontapu afersi (2:49)

Fu san ede Ayenge no ben wani tron wan memre fu wan politiek partèi èn fu san ede a no ben wani singi gi a fraga?
Yu denki taki a du wan koni sani?

Na ini sortu tra situwâsi wi musu sori taki wi no e teki sei? Prei a FELEM èn taki fu den aksi disi:

FELEM: San wi e leri fu a Waktitoren—No teki sei na ini wan grontapu di prati (5:16)

Fa yu kan sori taki yu no e teki sei te tu kondre e prei wan sport teige makandra?
Fa wi kan sori taki wi no e teki sei awinsi den politiek man e du bun noso ogri?
Fu san ede wi musu luku bun sortu nyunsu wi e arki noso nanga suma wi e bumui?