Yu go wan leisi kaba na wan konmakandra fu Yehovah Kotoigi? Efu noiti yu no go, dan kande yu e frede pikinso fu go. Kande yu e aksi yusrefi: ’San e pasa na den konmakandra? Fu san ede den prenspari? Fu san ede mi musu go?’ Na ini a les disi yu o si fa den konmakandra kan yepi yu fu tron wan bun mati fu Gado èn fu abi wan bun libi.

1. Fu san ede Yehovah Kotoigi e hori konmakandra?

Wan Bijbel skrifiman ben sori fu san ede a prenspari fu kon makandra nanga trawan. A ben taki: „Mi o prèise Yehovah te mi de na mindri den sma di kon makandra” (Psalm 26:12). Na a srefi sani Yehovah Kotoigi e du na ini a ten disi. Na heri grontapu den e kon makandra ibri wiki fu anbegi Gado, fu singi èn fu begi. Èn wan tu leisi na ini a yari den e kon makandra na ini bigi grupu.

2. San yu o leri na den konmakandra?

Na den konmakandra yu o kisi leri fu Bijbel èn yu o kon frustan Bijbel moro bun. (Leisi Nehemia 8:8.) Te yu go na den konmakandra, dan yu o leri moro tu fu Yehovah nanga den moi fasi fu en. Te yu kon frustan o furu a lobi yu, dan yu o tron wan moro bun mati fu en. Yu o leri tu fa a kan yepi yu fu abi wan bun libi.​—Yesaya 48:17, 18.

3. Fa den sma di yu o miti na a konmakandra kan yepi yu?

Yehovah e taigi wi fu ’poti prakseri na makandra, so taki wi kan gi makandra deki-ati fu abi lobi èn fu du bun wroko’. A e taigi wi tu fu „no misi konmakandra” (Hebrewsma 10:24, 25). Na den konmakandra yu o miti sma di lobi makandra èn di wani sabi moro fu Gado neleki yu. Den sani di yu o yere na a konmakandra o gi yu deki-ati. (Leisi Romesma 1:11, 12.) Yu o miti sma tu di de koloku aladi den abi problema. Disi na wan tu reide fu san ede Yehovah wani taki wi kon makandra!

 SORTU TRA SANI YU KAN LERI?

4. Den konmakandra fu Yehovah Kotoigi

Den Kresten fu fosi ben gwenti kon makandra fu anbegi Yehovah (Romesma 16:3-5). Leisi Kolosesma 3:16 èn taki fu na aksi disi:

• Fa den Kresten fu fosi ben anbegi Yehovah?

1. Na den konmakandra fu wi lezing nanga demonstrâsi e hori èn den e sori felem. Na a bigin èn na a kaba fu den konmakandra wi e singi èn wi e begi

2. Na son pisi fu a konmakandra sma kan gi piki

3.   Ala sma kan kon​—mansma, umasma, owrusma nanga yongusma

4. Yu no abi fu pai fu kon na inisei. Yehovah Kotoigi no e piki moni na den konmakandra

5. Wi musu meki muiti fu go na den konmakandra

• Fu san ede a prenspari fu go na den konmakandra?

 SAN YU LERI?

Te yu o kon na den konmakandra, dan yu o leri moro fu Yehovah, yu o tron wan moro bun mati fu en èn yu o anbegi en makandra nanga trawan.

Fa yu ben o piki den aksi disi?

• Fu san ede Yehovah e taigi wi fu kon makandra nanga trawan?

• San yu o leri te yu go na den konmakandra fu Yehovah Kotoigi?

• Sortu tra wini yu o feni te yu go na den konmakandra?