LES 15
Suma na Yesus?
Furu sma yere fu Yesus. Ma aladi den sabi en nen, den no sabi suma na en. Sma e taki ala sortu sani fu Yesus. Ma san Bijbel e leri fu en?
1. Suma na Yesus?
Yesus na wan makti engel di e libi na ini hemel. En na a fosi sani di Yehovah Gado meki. Dati meki Bijbel e kari en „a fosiwan fu ala sani di Gado meki” (Kolosesma 1:15). Bijbel e kari Yesus a „wan-enkri Manpikin” tu fu di en na a wan-enkri sma di Yehovah srefi meki (Yohanes 3:16). Yesus wroko makandra nanga en Papa Yehovah fu meki ala tra sani. (Leisi Odo 8:30.) A sani disi meki taki den kon lobi makandra moro. Èn te now ete den na bun mati fu makandra. Bijbel e kari Yesus „a Wortu” tu fu di a e meki sma kon sabi san Gado o du èn san Gado e fruwakti fu den.—Yohanes 1:14.
2. Fu san ede Yesus ben kon na grontapu?
Sowan 2000 yari pasa Yehovah du wan wondru. A teki a libi fu Yesus di ben de na hemel èn a poti en na ini a muru fu Maria, wan yongu uma di no ben sribi nanga wan man ete. Na so Yesus gebore leki wan libisma na grontapu. (Leisi Lukas 1:34, 35.) Yehovah ben seni Yesus kon na grontapu fu frulusu libisma. a En ben de a Mesias noso a Krestes di Gado ben pramisi a pipel fu en. Ala den sani di Bijbel ben taki fu a Mesias pasa na ini a libi fu Yesus. Na so sma ben kon sabi taki Yesus na „a Krestes, a Manpikin fu a libilibi Gado”.—Mateyus 16:16.
3. Pe Yesus de now?
Baka di Yesus dede a kisi wan opobaka leki wan engel èn a drai go baka na hemel. Drape ’Gado poti en moro hei leki fa a ben de kaba’ (Filipisma 2:9). Now Yesus abi furu makti. Yehovah wawan abi makti moro Yesus.
SORTU TRA SANI YU KAN LERI?
Wi o leri moro fu Yesus èn wi o si fu san ede a prenspari fu du dati.
4. Yesus a no na Almakti Gado
Bijbel e leri wi taki aladi Yesus na wan makti engel na ini hemel, toku a e saka ensrefi ondro Yehovah Gado, en Papa. Prei a FELEM fu si fu san ede Yesus a no na Almakti Gado.
Den Bijbeltekst disi o yepi wi fu frustan taki Yesus nanga Yehovah a no a srefi sma. Leisi ibri Bijbeltekst èn taki fu den aksi.
Leisi Lukas 1:30-32.
-
Fa na engel e kari Yesus na ini a tekst disi?
Leisi Mateyus 3:16, 17.
-
San wan sten taki komoto fu hemel di Yesus dopu?
-
Suma yu denki ben taki komoto fu hemel?
Leisi Yohanes 14:28.
-
Suma moro bigi? Wan papa noso a boi fu en?
-
Yesus ben kari Yehovah en Papa. San a sani disi e leri wi?
Leisi Yohanes 12:49.
-
Yesus e denki taki en nanga en Papa na a srefi sma? San yu e denki?
5. San e sori taki Yesus ben de a Mesias?
Bijbel abi furu profeititori fu a Mesias, dati na a sma di Gado seni fu frulusu libisma. Den profeititori disi yepi sma fu kon sabi suma ben de a Mesias. Prei a FELEM fu kon sabi wan tu fu den profeititori di kon tru di Yesus ben de na grontapu.
Leisi den profeititori disi èn taki fu den aksi:
Leisi Mika 5:2 fu kon sabi pe a Mesias ben o gebore. b
-
Yesus ben gebore na ini a foto di kari na ini a profeititori disi?—Mateyus 2:1.
Leisi Psalm 34:20 nanga Sakaria 12:10 fu si san Bijbel e taki fu a dede fu a Mesias.
-
Den sani disi pasa nanga Yesus?—Yohanes 19:33-37.
-
Yu denki taki Yesus srefi ben kan meki den sani disi pasa?
-
Te yu luku ala den profeititori disi, dan suma Yesus ben de?
6. A prenspari fu leri moro fu Yesus
Bijbel e sori taki a prenspari fu leri fu Yesus èn fu kon sabi san a o du. Leisi Yohanes 14:6 nanga 17:3. Baka dati taki fu na aksi disi:
-
Fu san ede a prenspari fu leri fu Yesus?
Yesus e yepi wi fu tron mati fu Gado. A ben leri sma suma na Yehovah èn den wan di e bribi na ini en o kisi têgo libi
SON SMA E TAKI: „Yehovah Kotoigi no e bribi na ini Yesus.”
-
San yu ben o taigi den?
SAN YU LERI?
Yesus na wan makti engel. En na Gado Manpikin èn en na a Mesias.
Fa yu ben o piki den aksi disi?
-
Fu san ede Bijbel e kari Yesus „a fosiwan fu ala sani di Gado meki”?
-
San Yesus ben du fosi a kon na grontapu?
-
Fa wi du sabi taki Yesus na a Mesias?
TRA SANI DI YU KAN LUKU
Na ini na artikel disi yu kan leisi fu tra sani di e sori taki Yesus na a Mesias.
„Den profeititori di e taki fu a Mesias e sori taki Yesus ben de a Mesias trutru?” (Web-artikel)
Bijbel e leri taki Gado meki Yesus na a srefi fasi leki fa libisma e meki pikin?
„Fu san ede den e kari Yesus, a Manpikin fu Gado?” (Web-artikel)
Na artikel disi e sori taki a leri taki Gado na dri sma na ini wán no komoto fu Bijbel.
Na artikel disi e sori fa a libi fu wan uma kenki, baka di a ondrosuku san Bijbel e taki fu Yesus.
„Wan Dyu uma e fruteri fu san ede a go ondrosuku en bribi” (Ontwaakt!, mei 2013)
b Na „Ete wan tu sani 2” yu kan leisi wan profeititori di e sori o ten Yesus ben o kon na grontapu.
