JIʼTE 11

Tchi paʼ o fing ne tchente dzu pé ne Bible a

YOU’ NE

O tsem fe tcheng ne toʼ ne ghe taʼ faʼ gwye daʼge djô ge a bo tuô téʼ ne ghe ya a ? Mouʼtchwe ne ne gre ge a hwi ne ghe, o ke yaʼte faʼ bô mkam mkam. A be a kwaʼ poʼo tchwe ye pe bo tcheng ne ké Bible a. O fing ne hente ge, ‘ge gô toʼ m he ?ʼ Tchum yeng jiʼte, pe gô yô she potse tsye o fing ne ghe ne ne kwite ge you ne ké neng jiʼte Bible tchente boung o a.

1. Nweke a tcheng ge pe pe khé Bible goung mtyèʼ awè ?

Taʼ mo ye é khé Bible ke “mtchoʼ Jéova” a le, goung mtyèʼ awè a, gô pe tchum ŋwègne, goung potse tsye é gre a gô neng ying. (Ké Mghôm ghamte 1:1-3.) Ne ne thoʼ, tela ne pe ké Bible baya tyèʼdzu le ne mou deng m menêk. Tchwe ye o gô pe le you ne ké Bible ne ghô a dze a, you ji ne pe khé ya gô ping kwiʼ.

2. Ke gô kwite o ne tsu pé ne ne ké Bible ?

Ne ne tchente dzu pé ne ne ké Bible, a tcheng ge pe tingne neng sè nwe ne ywe ye pe bo khé a. A tcheng ge pe ké neng “tchente sè nwe ne.” (Yoshwa 1:8, ywe ne thoute) Tchwe ye o bo khé a, sè nwe ne mhente paʼ menge a : ‘Ywe yenge dagne a ke ne Jéova Si ? Ge fing ne ying ne tchum ye vôk m tchi ge ke ? Ge fing ne wim mkhè Bible menge ne ne kwite pyeshe pô m tchi ge ke ?ʼ

3. O fing ne ghe la te ne ne djô tam ne pe khé Bible ?

A tchuô bou ne yô tam ne ne khé Bible a ? A tchuô ba bi medou pô ne pe. Tela ne takte “pôpte mou mtchwe dzu.” (Éféso 5:16) O fing ne ghe ya tchye m ne ne yap kwaʼ taʼ tam ne ne be khé Bible baya tyèʼdzu le. She pô djap tam ne ne khé Bible me fôkdzu. She pô pe djap tam ne khé ya ne mouʼ hawa tchum tyèʼdzu, mouʼtchwe ne tam ye wap bo hwite a. She pô pe khé yap m bwadzu te gô di. You tam pepoung ne khé ya gô pe tchweke ?

PING TCHENG NE GÔ DZE

Lagne tchi paʼ o fing ne ghe ge you ne ké Bible ping tchente boung a. Yô tchi paʼ o fing ne tchente nyapte ne o poʼ ne ne tchente dzu pé ne you jiʼte Bible a.

Dendeng paʼ pe fing ne lagne ne pe khoung ne tsu taʼ ywetsu ye pe lam fe djwiʼ a, pe fing ne lagne ne pe khoung ne ké Bible

4. Lagne ne pe khoung ne ké Bible

A fing ne tuô ne toʼ ne pe ké Bible. Daʼge, o fing ne lagne ne pe khoung ne khé Bible dendeng paʼ o fing ne lagne ne pe khoung ne tsu taʼ ywetsu ye o lam fe djwiʼ a. Ké 1 Pètro 2:2, neng gômte ne hente yenge :

O pe khé Bible goung mtyèʼ awè, be o kwè ge a gô poung o te kwiʼ ba you ji ne pe khé ya ne gô a dze a ?

Yô VIDÉO ne ne djô tchi paʼ she pô thoʼ ne koung ne pe khé Bible a. Neng gômte ne mhente menge.

VIDÉO: Des jeunes qui apprennent à aimer la parole de Dieu (5:33)

Tchum vidéo, po msem ke kouʼgne ne loʼ ma mketuʼ ?
Ke ke kwite wap ne pe khé Bible goung mtyèʼ awè pe te yaʼ, ne gô a dze ?
Wap ke ghe ge yap ne ké Bible ping tchente boung m tchi ge ke ?

She potse tsye a fing ne kwite o ne toʼ a :

Tchi taʼ Bible ye pou toute kwaʼ pepoung a, ye a neng gwim taʼ ghôm ye a hwi ne youʼ a. Foʼte ne wim La Bible. Traduction du monde nouveau be ye a si ne ghôm tsu a, ke ne mouʼ ghôm ye o tchente jye a le.
Toʼ pou a pap Bible ye o kwè ge a fing ne tchente boung o a. Ne ne djô ye pap ye o fing ne toʼ m ne a, lé tablo “Ne ne gre ji ne be khé Bible.”
Ve ye pap ye o tsem ké a. Wim tablo “Yô paʼ you ne khé Bible bo ne gô dze a” ye a tchum ŋwaʼgne yenge a.
Wim aplikation JW Library^®. Pou a ya bô, o fing ne ké neng djouʼ Bible ba tsuʼkele ye o ne a pou a téléfon o ke mouʼ mesing paʼ ye bô a le.
Wim m apendis mye a tchum Traduction du monde nouveau a. Mkarte, mgrafik ba mshweghôm thoutetoute be tchum o, mye a fing ne ghe ge you ne ké Bible ping tchente boung a.

5. Pe nyapte ne o ne you jiʼte Bible

Ké Mghôm ghamte 119:34, neng gômte ne hente yenge :

Nweke a be a poung ne pe gre priya te khé Bible, ke te ne nyapte ne o ne you jiʼte Bible ?

O fing ne tchente dzu pé ne baya tchwe le ye o jiʼte Bible a m tchi ge ke ? Ne nyapte ne o ne taʼ jiʼte tchum ŋwaʼgne yenge, tela ne foʼte yeng tchi ne ghe :

Pou djô ma te khem tsuʼ ye a be pou ve ge Ping tcheng ne gô dze a.

A ke be o ji jye le ?

Mkwithè Jéova be wap wim tchitchi mtoute Bible. Daʼge, ye pye khoung téʼ a, be La Bible. Traduction du monde nouveau nekele a be pou toute ya kwaʼ pepoung, be a hwi ne youʼ, tso Si neng be tchum o.—Ké ne jw.org “Les témoins de Jéhovah ont-ils leur Bible à eux ?”

SHE PÔ GÔM GE : “Ne jiʼte Bible be a tuô téʼ. Ka ghe tam, ka neng gre guʼ.”

O sè you ge ke ?

YE NE KHAMTE

Ne ne tchente dzu pé ne Bible, yap tam ye o gô pe khé ya ne a, ghe priya ne ne djouʼ ywe ye o bo khé a, neng be nyapte ne o ne baya tchwe le ye o gô jiʼte Bible a.