Ba m be ye o tchente khoung Jéova, neng be khaktuô ne tchyete ghe ge tum tsye yè a, o gô pe she mtchum hôgne. Daʼge she mhô be a pôk te tchye she. (1 Korinto 6:9, 10) O ghe taʼ hô gwye, o ke kwè ge Jéova te dje bo khoung o pe; kamte ge é bo tcheng ne tchousi o, ba ne kwite o.

1. Pe gô ghe la te Jéova tchousi yôkpe ?

Tchwe ye pô pye wap khoung Jéova a djô ge wap ghe taʼ hô gwye a, wap tchente djwing téʼ. Daʼge, kaʼgne Jéova yenge ha juete bi pou : “Ba m be ye mhô mô tchwe paʼ ting bèpè a, ma bô gô fôk te tchwe paʼ ŋem a.” (Izaya 1:18) Pe pue tum tsôkpe kwaʼ nyenyô, be Jéova gô tchousi yôkpe, neng tuôgne. Pe bue tum tsôkpe m tchi ge ke ? Pe tchente diʼ ywe ye pe gre a, djaʼ ne ghe ywe ye a pôk a, neng do bi Jéova ge é tchousi yôkpe. Pe neng dou kwyepgne mkwègne, ba mghegne tse tchwepoung mye a gre ge pe hô a, neng khaktuô ne ying ne mkhète dôlô Jéova.—Ké Izaya 55:6, 7.

2. Jéova gwim mghetso ne kwite wôkpe tchwe ye pe hô a m tchi ge ke ?

A pe be pe ghe taʼ hô gwye, be Jéova gôm bi pe ge “pe ké mghetso tchouʼte pô Kristo.” (Ké Yakop 5:14, 15.) Mghetso khoung Jéova ba mjuju pye. A be wap khouʼgne ne kwite wôkpe ne ping gre taʼ tchi ne tchwe pepoung pou a Jéova.—Galata 6:1.

Mghetso kwite wôkpe m tchi ge ke, be ye pe ghe taʼ hô gwye a ? Mghetso pepue ke peta le, gô wim Bible ne laʼte bi pe nweke ywe ye pe gre a be a pôk a. Wap gô ghôm ba potse tsye pe fing ne ghe a, neng ha ba mghôm kaktuô ye a gô kwite wôkpe ne pôm ne tchyete ping hô a. Wap fing ne ghôm ge pe ke ping gre she potse tchum bemte ne mouʼ deng tam, te khem tchwe ye pe yè ne gheng jwégne a. Tchwe ye taʼ mo ghe taʼ hô gwye, é le neng bue tum tsye a, mghetso thé é tchum bemte, ne ne bômte pyeshe pô tchum bemte ne ma tchwepoung é.

 PING TCHENG NE GÔ DZE

3. Tchwe ye pe gôm ywe ye pe gre a, a kwite wôkpe ne yè

Baya hô le ye pe ghe a djè Jéova; poʼo, a tcheng ge pe ghôm ywe ye pe ghe a bii. Ké Mghôm ghamte 32:1-5, neng gômte ne hente yenge :

• Nweke a be a poung ge pe ghôm mhô mye pe gre a bi Jéova, tse ne tela ne tumgne ma ?

 4. Tchi paʼ ne té mo tchum bemte ne kwite a

Taʼ mo ye é ghe taʼ hô gwye, neng bo khengne ne ying ne khète Jéova a, ka fing ne ping tchwe tchum bemte. Pou thé é tchum bemte, pe le neng bing be kheka é, pe a pou le neng bing be gômte. Ké 1 Korinto 5:6, 11 ba 2 Yohané 9-11, neng gômte ne mhente menge :

• Ke tchyete tchwe ye pou ning ywe ne kwôʼ felawa tchum felawa a ? Taʼ mo ye é hônwe é le pue tum tsye a fing ne ghe la ne bemte ?

 YE NE KHAMTE

Pe ghe taʼ hô gwye daʼge tchente diʼ ya bô, neng de khète ne yaʼ ne ghe ywe ye a pôk a, be Jéova gô tchousi yôkpe.

O lagne ke ?

• Nweke a be a poung ge pe ghôm mhô mye pe gre a bi Jéova ?

• A tcheng ge pe ghe la te Jéova tchousi yôkpe ne mhô môkpe ?

• Pe ghe taʼ hô gwye, be nweke a tcheng ge pe lo kwite bi mghetso ?