JIʼTE 31

Nefo Si be ke ?

YOU’ NE

Nefo Si be ke ?

Ye tchoung tuôdeng téʼ tchum Bible be ne Nefo Si. Jéova gô ti wim Nefo bô ne ghe ge demtchaʼ ji taʼ paradisi. Nefo Si be ke ? Pe jye m ge ke, ge a bo saʼ tchwelô ? A be a tsèm ghe ke ? A gô neng ti ping ghe ke tchum mtyèʼdzu dze ? Jiʼte yeng, ba mye mebue mye a dze a gô ha mpaʼ ne mhente menge.

1. Nefo Si be ke, Fo é neng be we ?

Nefo be taʼ tchi ne saʼ be Jéova ne tchu. Fo é, Yéso Kristo tchwe m kèbeng te saʼ. (Matio 4:17; Yohané 18:36) Bible gôm ne Yéso ge : “É gô sôʼ pe fo mama.” (Loukasi 1:32, 33) Paʼ Fo Nefo Si a, Yéso gô ti saʼ ne goung pô demtchaʼ.

2. Pe we saʼ pou a Yéso ?

Yéso te saʼ do é pe. Pô be fe ne “goung mgwya awè ba ne goung mghôm awè pou a ne goung mgoung awè . . . gô laʼ pe saʼ demtchaʼ.” (Apokalipse 5:9, 10) Te fe paʼ Yéso le sôʼ demtchaʼ a, shouʼmshouʼ pô be wap ji pekhu pye. Goung yap awè gô ti saʼ pou a yu a ? Gè, daʼ pô 144 000 ne pou gô ghô m kèbeng ne saʼ pou a Yéso. (Ké Apokalipse 14:1-4.) Goung pyeshe mkritè awè demtchaʼ gô ti pe pô pye Nefo gô saʼ ne pou a.—Mghôm ghamte 37:29.

3. Nweke Nefo Si be a poung te tchye goung mnefo momsoung awè ?

Ba m tchwe ye pô pye wap saʼ a, thela ne ghe potse pepoung a, wap te gre pawa ne gre goung ywe ye wap tcheng a pe. Pyeshe mghè saʼ pye wap neng de tsuʼ yap a, fing ne pe bo tcheng a map mpé. Daʼge sômmo te gô laʼ le tsuʼ Yéso, Fo Nefo Si pe. Si “be é tu taʼ nefo ye pou te gô laʼ saʼte a pe.” (Danièl 2:44) Yéso gô ti saʼ ne goung demtchaʼ awè, é te gô ti neng ghe khye ne sômmo pe. É be é ghe koungne, be ŋwègne neng be dendeng. É gô neng ti jiʼte bi pômneng ne pe gre koungne, ŋwègne ba ma dendeng pou a pyeshe pô.—Ké Izaya 11:9.

PING TCHENG NE GÔ DZE

Yô nweke Nefo Si be a poung te tchye baya nefo momsoung le.

4. Taʼ Nefo be a tuô, gô ti saʼ ne goung demtchaʼ awè

Yéso Kristo be é ghe pawa ne saʼ te tchye baya gè saʼ le ye é le fe be we a. Ké Matio 28:18, neng gômte ne hente yenge :

Pawa ne saʼ ye Yéso be é ghe a, be a tchye ye baya gè saʼ momsoung le m tchi ge ke ?

Mnefo pômsoung kwyepgne goung mtam awè, baya gè saʼ le neng be saʼ daʼ ne mouywe pap tsuʼ demtchaʼ. A be m ge ke pou a Nefo Si ? Ké Danièl 7:14, neng gômte ne mhente menge :

Nweke a be a poung paʼ “pou te gô laʼ saʼte” Nefo Si a pe ?
Nweke a be a poung paʼ a gô ti saʼ ne goung demtchaʼ awè a ?

5. A tcheng ge pou thé mnefo pômsoung

Nweke Nefo Si gô le tsuʼ mnefo pômsoung ? Yô VIDÉO, neng gômte ne mhente menge.

VIDÉO: Nefo Si be ke ?—Pap é (1:41)

Ye ne saʼ momsoung be a le ke ne sôʼô ?

Ké Ékléziaste 8:9, neng gômte ne mhente menge :

O kwè ge a tcheng ge Nefo Si le tsuʼ mnefo momsoung a ? Nweke ?

6. Nefo Si be a ghe mghè saʼ pye wap djouʼ wôkpe a

Ne paʼ Fo yôkpe Yéso, be é le pe taʼ momsoung a, é fing “ne jye pwa yôkpe.” (Ébraika 4:15) Pô dendeng 144 000 pebè ba pedjwi pye wap gô ti saʼ pou a Yéso a, be pô be Jéova tchi wap “ne goung mgwya awè, ba ne goung mghôm awè pou a ne goung mgoung awè.”—Apokalipse 5:9.

O kwè ge a ha juete, ne jye ge Yéso ba goung pô pye wap gô saʼ pou a yu a, be wap jye ywe ye ne pe taʼ momsoung be ya a ? Nweke ?

Jéova be é tchi pebè ba pedjwi be fe m ne tchitchi mtsuʼ, ge wap saʼ pou a Yéso

7. Mtchoʼ Nefo Si be a poung te tchye mtchoʼ baya nefo momsoung le

Mnefo pômsoung tchu mtchoʼ mye wap kwè ge a gô kwite neng pômte pô pap a. Ba Nefo Si be a ghe mtchoʼ mye, myé pô pye gô ying ne a. Ké 1 Korinto 6:9-11, neng gômte ne mhente menge :

O kwè ge dzu gô pe m ge ke, tchwe ye goung pô awè gô pe ying ne mtchoʼ Si a ? *
O kwè ge Jéova be é kouʼgne ne pyap ge, pô pye Nefo gô ti saʼ wap a youʼgne ne mtchoʼ bô a ? Nweke ?
Ke daʼte ge pô pye wap te bo ging ne mtchoʼ bô a fing ne kwyepgne ? —Lé khè 11.