Sòm 52:1-9
Pou moun k ap dirije mizisyen yo. Maskil*. Yon chante David te ekri. Li gen rapò ak lè Dowèg, moun Edòm nan, t al fè Sayil konnen David t al lakay Ayimelèk+.
52 Poukisa w ap vante tèt ou poutèt move bagay ou fè, ou menm ki san pitye+?Lanmou fidèl Bondye genyen an ap dire pou toutan+.
2 Lang ou file tankou razwa+E l ap fè konplo pou l fè sa ki mal e pou l twonpe moun+.
3 Ou pi renmen sa ki mal pase sa ki byen,Ou pi renmen bay manti pase w di laverite. (Sela)
4 Ou renmen tout move pawòl ki ka fè moun mal.Ala w ka bay manti ak lang ou!
5 Se sa k fè Bondye ap lage w atè pou toutan+,L ap pran w e l ap rale w soti nan tant ou+.L ap derasinen w pami moun ki vivan yo+. (Sela)
6 Moun ki jis yo ap wè sa, y ap sezi anpil+E y ap ri moun k ap fè sa ki mal la+. Y ap di:
7 “Men yon gason ki pa pran Bondye kòm refij* li+,Ki met konfyans li nan pil richès li yo+,E ki konte sou* konplo* l ap fè.”
8 Men, mwen menm, m ap vin tankou yon bèl pye oliv nan kay Bondye a,M ap gen konfyans nan lanmou fidèl Bondye genyen an+ pou tout tan gen tan.
9 O Bondye, m ap fè louwanj pou ou pou toutan pou aksyon w fè yo+.Devan moun ki fidèl avè w yo,M ap montre m met konfyans mwen nan non w+, paske li bon.
Nòt anba paj
^ Gade Lis mo yo esplike yo.
^ Oswa: “fòtrès”.
^ Oswa: “ki pran refij nan”.
^ Lit.: “bagay mal”.
